Read Yimchungru Naga Ibri 7 Bible Online

Ibri 7 - Yimchungru Naga bible

Ibri 7

¹Ha buh Melkizedek ha Salem kiulongthsürü tüsho Khide Achang Thrünpuh amükeamrü lakheah. Abrahamnü kiulongthsürü phüyi laksahbah alode arüchoki apinü shoru tüsho api müngühjih,

²tüsho Abrahamnü api kilim lüpdükhi yo thürü shihcham jih. Akhuhde, api mung amütsan “Thiyuro-lungki kiulongthsürü”; kheaküshe, “Salem kiulongthsürü” amütsan “Mungtsü kiulongthsürü”.

³Abe yungsho abuh, trükji, atankih nimungbo yungsho akheam rhangdung mülade Thrünpuh tsührü kiphahde api lünnü amükeamrü ah.

⁴Kheahang, api küdükhüh ato a! Jipürü Abrahamnü ayankhikhi thürü shihcham api kilim jih.

⁵Tüsho Levi tsühsoniuso amükeamrü thsürübo ju arü keoniorübo Abraham kheaknü trükkhitde arüa lalashe arü kheaknü thürü shihcham lupü yakzan ching thiyukhüm lah.

⁶Tüshe trükji yungde alakhi ha mihtsürünü Abraham kheaknü thürü shihcham leangkhi tüsho alokhikhi labuh müngühjih.

⁷Tüsho akheambuh ju azopünü müngühjihkhi lümshangmang tümü müla.

⁸Ha ching a thürü shihcham ju ashepü lakhi mihtsürübonü luchoh; tüshe Melkizedek thsungkheak a thürü shihcham ju arhang larünü alukheah de amüsühyunü thachoh.

⁹Thürü shihcham lude alakhi Levirünü she Abraham hode thürü shihcham jihdo de khürünü athabah,

¹⁰tümütüsho küyimki Melkizedeknü Abraham shorukheanü, Levi ju api jipürü büm ching lakheah.

¹¹Levirü amükeamrü rhimonü khiukdahde lakhülaa (tümüde ha hode mihtsürübo kilim yakzan jih), Aron kiphahde yungde, Melkizedek kiphahkhi ching tümü thsüpü amükeamrü püpü arüpü yihnüpü lakhea?

¹²Tümütüsho küyimki amükeamrü rhimo ching amüthrikhi labanü, yakzan ching she amüthrikhi yihnüpü lah.

¹³Shepü thsungkheak harü thachonü püpürü trük ah, tüsho ju trük chingnü küyimkishe kingaün sadam kheak mütankihakheah.

¹⁴Tümüde isa Atungpuh ju Juda chingnü atrükkhitkheah de mütsanlah, tüsho ju trük amükeamrübo dünkheaknü Mosanü tümü she mütha.

¹⁵Melkizedek kiphahde amükeamrü püpü arüsho isanü athakhi ju alü mütsande lah.

¹⁶Api ju mihtsürü yukhüm yande yung tüshe akheam müla rhangdung wu yande amükeamrü kam.

¹⁷Tümüde api dünkheak thiyumütsan ha lah, “Melkizedek kiphahde nü a lün thsungkheak amükeamrü ah.”

¹⁸Awün yukhüm ju shuhmuwuh-a zo, tümütüsho ju reangmüzah tüsho yihnüpü mülade alakheah.

¹⁹Tümüde Mosa yakzannü tümü she khiukdahde mükamshih. Tüsho kheakü mulonglam atsübe jihkhi hode isanü Thrünpuh thüninde arükhukchoh.

²⁰Tüsho ju thiyuchihchim mübede mülakheah.

²¹Sherü akhuhlim amükeamrü kamkheanü thiyuchihchim mübede arü rhimo lu, tüshe ha buh a thiyuchihchim lude tha, “Atungpuhnü thiyuchihchimdo tüsho api lümkhi mümüthri, ‘Nü a lün thsungkheak amükeamrü ah.’ ”

²²Hanü Jisu ju atsübe tangzüng mütsande kamshihchoh.

²³Akhuhlim amükeamrübo hihde alakheah, tümütüsho mutuklode arhimopü chingnü ashenü zhipdo;

²⁴tüshe api a lünnü alakhinü api amükeam rhimo lün thsungkheak lah.

²⁵Jumonü api hode Thrünpuh thüninde arürü apinü kim alala ching arü khümkhitpü kuklah, tümütüsho arü thsungkheak mushujihpü api kamruhroro lah.

²⁶Hadürü amükeamrü amüsüh, jakreak mükihkhi, aneakrü kheaknü achamkhikhi, yinmibo kumung shuhkihkhi isa thsungkheak lapü ayedo.

²⁷Achangbe amükeamrübo nangde apinü akhuhde nihbuh neakbo tüsho mihtsürübo neak thsungkheak nimung aban laksah-a kingaünpü yihnüpü müla, apinü anihbuh jihabahchoki khülangkinü ha rhimoabahdo.

²⁸Tümüde yakzannü achangbe amükeamrü thsüpü müthülünkhi mihtsürübo mokhit; tüshe yakzan dunglim arükhi thiyuchihchimnü lün thsungkheak thülünde akamshihkhi atsührü mokhit.