Read Yimchungru Naga Ibri 8 Bible Online

Ibri 8 - Yimchungru Naga bible

Ibri 8

¹Isanü athakhi yu ju ha ah: Yinmi ching wüntre-müretah kiulongthsü-binkiu tsülim binkhi isa hadürü amükeamrü lah.

²Apinü mihtsürü yungde, Atungpuhnü athsükhi thiyuro arüngkhimyam yo arüngakopung ching tankihchoh.

³Tümüde achangbe amükeamrü aban thsambahbo tüsho laksah-a kingaünkhi jihpü mokhita lah; jumonü ha amükeambuhnü she tümüanü ajihbeah.

⁴Api alomi ching lakhülaa, api amükeamrü müthsüde alabah, tümütüsho yakzan yande thsambahbo jihpü amükeamrübo lah.

⁵Arünü yinmi ching lakhi arüngakopung kiphahkhi tüsho ame ching tankihchoh; tümüde Mosanü khimyam thsüpü lachoki Thrünpuhnü api ki thsangdande tha, “Inü müzüng kheak nü ki huhkhi nangde lüpdükhi rhimopü thsang.”

⁶Tüshe api tangzüng yo limburü thsükhi awünbe kheaknü atobe lakhi nangde Jisunü aleangkhikhi tankihpü ju arü yo kheaknü atobe ah, tüsho ju alokhikhibo atsübe kheak ningkihlah.

⁷Akhuhbe tangzüngkhi ching amülim mülakhülaa, mahnepü lapü yihnüpü mülade alabah.

⁸Tümüde apinü arü kheak amülim yimkhit tüsho tha: “Atungpuhnü thachoh, Küyimki inü Israel yamkhün tüsho Juda yamkhün kheak tangzüng aso thsübanü nimungbo arübah;

⁹inü Ijip lomi chingnü arü khah kheaknü bekhitkhi nimung arü jipürü ki tangzüngkhi nangde yung; tümüde arünü I tangzüng ching müladebah, jumonü inü arü ki manijih, Atungpuhnü thachoh.

¹⁰Ju nimung dunglim inü Israel yamkhün kheak tangzüngpü ha lah, Atungpuhnü thachoh: Inü arü lümkhi ching yakzan yukjihbah, tüsho arü mulongbo kheak thrütbah, I arü Thrünpuh thsübah tüsho arü I mihtsürü thsübah.

¹¹Tüsho arü mihbüm abannü müyamrü yungsho keoniorü ki, ‘Atungpuh mükheahang’ de müthsangyu, tümüde aninibenü atobe khiungde arü alalanü l mükheahbah.

¹²Tümüde arü mülimkhibo lim inü mihmüthsüm labah, tüsho inü arü neakbo kheaküa mülümkhit.”

¹³Aso tangzüng thade apinü akhuhbe ju yihnüpü mülakhi kamshihchoh, tüsho küpü yihnüpü mülade kamcho tüsho awün kamchonü nahde dükheakabahbah.