Read Yimchungru Naga Jakob 2 Bible Online

Jakob 2 - Yimchungru Naga bible

Jakob 2

¹I keoniorübo, isa Atungpuh Jisu Khrista, müretahkhi Atungpuh kheak nüsanü kinla le, jakkheahkhi dühuh.

²Tümütüsho mihtsürü khülang suna nüpü tüsho khimmih atsü yihbah nüsa mukhungmüdan ching arü, tüsho zhochih mihtsürü she khimmih amürhüt yihbah azahsho,

³tüsho nüsanü khimmih atsü yihbuh ki mulong jihde, “Muzhobah ha kheak binang,” tüshe zhochihbuh ki, “Nü ha kheak zhipang,” yungsho, “I jing ki adampü kheak binang,” de thasho,

⁴nüsanü nüsa bolung yakkhitchoh yung de, tüsho amütsü lümkhibo bede mahkhaprübo kamchoh yung de?

⁵Aniang, inü muzhokhi keoniorübo. Akin ching alarü thsüpü tüsho apinü amuzhorü ki alokhikhi kiulongthsü yamrüplurüp lupü Thrünpuhnü zhochihrü mokhitkhi yung de?

⁶Tüshe nüsanü zhochihrü mükhemükimdo. Nüsa junokhi ju alarünü yung de, nüsa mahkhappung ching nima yüshihkhi arü yung de?

⁷Nüsa kilim jihkhi mung atsü mükhemükimkhi arü yung de?

⁸Nüsanü atsütsü amüsühyu yande, “Nünü nü yamhingrü ki nihbuh nangde muzhoang,” dükhi kiulongthsü yakzan rhimochosho, tsüde rhimochoh.

⁹Tüshe nüsanü jakkheahkhi huhsho, nüsanü neak yihbeakchoh, tüsho athsümünimrü ah de yakzannü mütsanchoh.

¹⁰Tümüde shepünü yakzan athrünkhi zocho tüshe thiyuji khülang lakphahsho ju alala amülim kamshihchoh.

¹¹Tümütüsho khürünü, “Müzammüram düyihbeak,” kheaküshe, “Dülaksah,” de tha. Nünü müzammüram müyihbeak tüshe laksahsho, nü ju yakzan thsümünimrü kamdo.

¹²Jumonü zuzu kampü yakzannü mahkhaprü lakhi mihtsürübo nangde asukang tüsho rhimoang.

¹³Tümüde mihmüthsüm muhuhrü ki mahkhapkhinü mihmüthsüm mülachoh; tütüshe mihmüthsümnü mahkhap kurungkheak kukchoh.

¹⁴I keoniorübo, mihtsürü khülangnü api akin lah de thabah rhimobo mülasho, junü tümü alü thsücho? Api akinnü anihbuh khümkhitpü kukba de?

¹⁵Keoniorü yungsho keonioberü khülang khimmih yungsho tsühyungbe mülasho,

¹⁶tüsho nüsa khülangnü arü pang thsungkheak yihnüpü lakhi kukruk müjihde arü ki, “Mungtsü chingnü yüang, lamlamang tüsho bukthsüang,” de thasho, ju tümü alü la?

¹⁷Jumonü akin müthsünnü, ju ching rhimobo mübesho ashekhi ah.

¹⁸Tüshe khürünü athabah, “Nü akin lah tüsho I a rhimobo lah.” Nü rhimobo mübede I ki nü akin huhang, tüsho I rhimobo hode inü nü ki I akin huhbah.

¹⁹Thrünpuh khülang lah de nüsanü kinchoh; tsülah! Arimrinü she kinchoh tüsho trede ajanchoh.

²⁰Nü makha mihtsürü, rhimobo mübesho akin ju akeangkeang de nünü thiyumütsan lunela de?

²¹Apinü atsührü Isak kingaün sadam kheak jihchoki, isa abuh Abraham rhimobonü alim mütsankhi yung de?

²²Api rhimobo lungnü akin müzhakde alakhi nüsanü ngülah, tüsho akin ju rhimobonü banthsangshih,

²³tüsho amüsühyu dünjide tha, “Abrahamnü Thrünpuh kin, tüsho api kilim thiyuro-lungki khejih”; tüsho api ju Thrünpuh müyambuh de ji.

²⁴Mihtsürü khülang ju akinnü lang yungde, rhimobonü alim mütsankhi nüsanü ngülah.

²⁵Tüsho junangde müzammürambe Rahabnü she yunithsürübo beyukbah limro püpünü awukhiukshihchoki rhimobonü anihbe alim mütsankhi yung de?

²⁶Tümüde me mübesho pang ju ashekhi lakhi nangde, rhimobo mübesho akin ju ashekhi ah.