Read Yimchungru Naga Jakob 4 Bible Online

Jakob 4 - Yimchungru Naga bible

Jakob 4

¹Nüsa bolung thirithsü tüsho rukachih tümünü akhiukshihcho? Ju nüsa shihkünkhinü nüsa bolung thirithsü lah yung de?

²Nüsanü künlah tüshe müla; jumonü nüsanü laksahchoh. Tüsho nüsanü mürühlah tüshe müngükhuk; jumonü nüsanü rukachihchoh tüsho keochihchoh. Nüsa müla, tümütüsho nüsanü mükheang.

³Nüsanü kheangchoh tüshe müngü, tümütüsho nüsanü nüsa shihkünkhi ching bahpü amülimnü kheangchoh.

⁴Mulong müzamrübo! Alomi lung müyamrü thsükhi ju Thrünpuh kilim thiriri ah de nüsanü mümükheah de? Jumonü shepünü alomi lung müyamrü thsüpü lümchonü api ju Thrünpuh riri kamchoh.

⁵Yungsho amüsühyunü, “Thrünpuhnü isa kheak lashihkhi menü mükthsüpü künchoh,” de athakhi akeangkeang ah de nüsanü lümcho shi?

⁶Tüshe apinü amüthsüm alü jihchoh; jumonü apinü thachoh, “Thrünpuhnü akükheangrü yanlochoh, tüshe azhihayih kilim amüthsüm jihchoh.”

⁷Jumonü nüsanü Thrünpuh bukkhüp laang. Amünean yanloang tüsho api nü kheaknü atsobah.

⁸Thrünpuh thüninang tüsho apinü nü thüninbah. Aneakrübo, nüsa khahbo tüsho mulongbo müsühang, nüsa lümtrüp mihtsürübo.

⁹Mulong tukthsüang, tripang tüsho tüzhoang. Nüsa münekhi mulong rozhak tüsho nüsa asühkhi miro mitingkhi kamshang.

¹⁰Nüsanü Atungpuh miki azhihayihang tüsho apinü nüsa shuhkihbah.

¹¹Keoniorübo, khülangnü khülang azhihde amütsü düthaachih. Shepünü keoniorü azhihde amütsü asukcho yungsho keoniorü yukhapchonü yakzan azhihde amütsü asukchoh tüsho yakzan yukhapchoh. Tüshe nünü yakzan yukhapsho, nü a yakzan yande arhimorü yung tüshe thiyukhaprü ah.

¹²Akhümkhitpü tüsho athsümünimpü kukkhi yakzan jihrü tüsho thiyukhaprü khülang lah, tüshe nü yamhingrü yukhappü thsüde nü she a?

¹³Kheakü aniang, nüsa shepünü thacho, “Khihni yungsho shido isa ha ching yungsho ju kiuto ching yübah kam khülang mungde shothsümolobah tüsho sho yinbubah.”

¹⁴Nüsanü shido tümü dünjibanü mümükheah. Nüsa rhangdung ju tümü a? Tümüde nüsa ju shumuliu anükhühkheak labah kheamabahkhi nangde lah.

¹⁵Ju müthri nüsanü athabeah, “Atungpuhnü mulongsho, isa alabah tüsho ha yungsho ju rhimobah.”

¹⁶Tüshe nüsanü kheakü kükheangde lülüshishichoh. Hadürü kükheangkhi alala amütsü ah.

¹⁷Shepünü alim rhimopü mükheahbah ju rhimopü lakphahchonü, api thsungkheak ju neak ah.