Read Yimchungru Naga Jakob 5 Bible Online

Jakob 5 - Yimchungru Naga bible

Jakob 5

¹Nüsa alarübo kheakü aniang, nüsa kheak thsümütsü arüpü lakhi dünkheak tripang tüsho tüzhoang.

²Nüsa lakhitbo shuhabahdo tüsho nüsa khimmihbo arinü tsühabahdo.

³Nüsa yo suna tüsho shotoyinchi thrungnü tsühabahdo, tüsho thrung ju nüsa azhihde thiyumütsan labah tüsho monü nangde nüsa shihtsü tsühabahbah. Nüsanü ahokhi nimungbo ching lakhitbo hanmukhungdo.

⁴Kheahang, nüsanü nüsa lubo ching rhimorübo ki mihkhah dün müjihrünü nüsa azhihde zhichoh; tüsho yimlurübonü azhikhi Wuto Atungpuh nükhünbo khiungdo.

⁵Nüsanü alomi kheak müthangmüsünde tüsho asühakode lado; alaksahkhi nimung ching nüsa shihkih-a ludo.

⁶Nüsanü bahyukdo, nüsanü thiyuro-lungki mihtsürü laksahdo; nüsa ki marochih.

⁷Jumonü keoniorübo, Atungpuh arüpü nimung khiungde arümkheamang. Kheahang, thulu-thsürünü alonü hi atsü akhiukshihpü mumükin tüsho mükheankim tsüng arümkheamde aleangchoh.

⁸Nüsa she arümkheamang, mulong ayihyih thsang, tümüde Atungpuh arüpü thüninde lah.

⁹Keoniorübo, nüsa thiyumükhappü thsüde khülangnü khülang azhihde datsangachih; kheahang, Thiyukhaprü khimdopü ki zhiplah.

¹⁰Keoniorübo, thsünü tüsho arümkheampü ching Atungpuh mung ching asukrü wukihrübo kheaknü amütsan luang.

¹¹Kheahang, arümkheamrü isanü asühpü de jichoh. Jobnü arümkheamkhi nüsanü sodo, tüsho nüsanü Atungpuh lümkhi, Atungpuh amuzho tüsho mihmüthsüm ngüdo.

¹²Tüshe keoniorübo, alala kheaknü alü thsüde, yinmi tamde yungsho alomi tamde yungsho püpü thiyuchihchim düthsü, tüshe nüsa Thrünpuh mahkhap khüp müyüzahpü thsüde, nüsanü am a-sho am dang yung a-sho yung dang.

¹³Nüsa bolung khürü küpkhukla shi? Apinü tamkhüntamnüang. Khürü asühde la shi? Apinü mungshi khün thsang.

¹⁴Nüsa bolung khürü tukthsüla shi? Apinü borü azothsürübo jiang, tüsho arünü Atungpuh mung chingnü api kheak müdangke mujujihde tamkhüntamnüshang;

¹⁵akin tamkhüntamnükhinü tukthsübuh ju athsüngubah, tüsho Atungpuhnü api asürüshihbah; tüsho anihbuhnü neak yihbeaka lasho apinü abahjihbah.

¹⁶Jumonü nüsa neakbo khülangnü khülang ki thakhitang, tüsho tamkhüntamnü ching rungachihang, junangde nüsa athsüngubah. Thiyuro-lungki mihtsürü tamkhüntamnükhi ching wu ato lah.

¹⁷Elija ju isa nangde mihtsürü lakheah tüsho tsüng marüshihpü apinü shuhmülanga jihde tamkhüntamnü, tüsho kam mahsam kheak khinu thuruk alomi ching tsüng marü.

¹⁸Jushu apinü tamkhüntamnülo tüsho thüningnü tsüng jih, tüsho alonü hibo mukhuhshih.

¹⁹I keoniorübo, nüsa bolung khürü thiyuro chingnü tsokhia labah püpürünü api belode arüsho,

²⁰ha lümkhitang: shepünü aneakrü api amülim limro chingnü belode arübanü ashe chingnü api me khümkhitbah tüsho mükhebinkhi neakbo mujumüyita bahjihbah.