Read Yimchungru Naga 1 Peter 4 Bible Online

1 Peter 4 - Yimchungru Naga bible

1 Peter 4

¹Tümütüsho isa dünkheaknü Khrista shih ching thsünüdü le, nüsa ju lümkhinü reangzahang, tümüde shepü shih ching thsünükheanü neak ching mübedebahdo,

²junangde kheaküa aningkhi api alomi rhangdung ju mihtsürünü akünkhinü yung tüshe Thrünpuh lümkhinü lachoh.

³Tümüde nüsanü ahokhi ching amükinrünü arhimopü mokhitkhi rhimopü kim suhdahde bahdo — mümüsühkhi ching lapü, shihkünkhi, müshangmuru, yüliyüra, kushimkhi tüsho athraneanbe sangthsübo.

⁴Tüsho kheakü nüsanü arü lung müdanyukkhi tüsho yancho lakhi ching müberungmonü amükinrübonü nüsa azhihde amütsü thachoh;

⁵tüshe arünü arhang larü tüsho asherü mahkhappü thsakhama labuh kilim nihbuh mütsanmükhia jihbah.

⁶Jumonü thiyusheak-atsü ju asherü ki she thsangyuthsangrakheah, junangde shih ching mihtsürü nangde arübo mahkhapbah, tüshe Thrünpuh nangde me ching labah.

⁷Alala akheam thüninde lah; jumonü nüsanü tamkhüntamnüpü kukpü thsüde lümkhi amüsüh tüsho zangrü danyukde laang.

⁸Alala kheaknü, khülangnü khülang muzhoachihang, tümütüsho amuzhonü neak hihdakkhi yihdoabahchoh.

⁹Müsüngde khülangnü khülang beyukachihang.

¹⁰Mihbüm abannü, Thrünpuh thsambah aphuaphu kümsorü thsüde, apinü Thrünpuh kilimnü aleangkhikhi ju püpürü tsüpü thsungkheak ahoribeah.

¹¹Shepünü thachonü Thrünpuh yu thabeah; shepünü tankihchonü, Thrünpuhnü api kilim jihkhi sühmühnü atankihbeah, junangde lüpdükhi ching Jisu Khrista hode Thrünpuh müretahbah. Müretah tüsho wu lünnü lün api yo ah. Amen.

¹²Amuzho müyamrübo, nüsa rükaki thsünü lachoki nüsa ki tümükhüh aso dünjikhi nangde dümüyinsah.

¹³Tüshe Khrista thsünükhi ching shihcham lukhi asühachihang, junangde api müretah akhiukchoki nüsa asühachihbah,

¹⁴Khrista mung dünkheaknü nüsa mükhemükimsho, nüsa müngühmühi ah, tümüde müretahkhi Thrünpuh Me nüsa kheak lah.

¹⁵Tüshe nüsa sheshe mihkhukrü, yungsho ahührü, yungsho amülim rhimorü, yungsho arahrungrü thsümonü thsünüa dülu;

¹⁶tüshe khürü Khristan thsümo thsünüsho, apinü dachih, tüshe ju mung ching apinü Thrünpuh müretahshang.

¹⁷Tümüde Thrünpuh yamkhün chingnü mahkhap tankihpü arüdo; tüsho ju isa kheaknü tankihsho, Thrünpuh thiyusheakatsü mihyumanirü küde akheam thsüba?

¹⁸Amüsühyunü thachoh, “Thiyuro-lungki mihtsürü she arothsünnü khümkhitsho, amükinrü tüsho aneakrü a tümü kamba?”

¹⁹Jumonü sherü Thrünpuh lümkhi yande thsünüchonü thiyuro Athrünrü kilim arü shuhmülanga jihang tüsho mutuklode atsü rhimobeah.