Read Yimchungru Naga 1 Peter 5 Bible Online

1 Peter 5 - Yimchungru Naga bible

1 Peter 5

¹I azothsürü, Khrista thsünükhi thiyumütsan jihrü tüsho amikheak akhiukpü lakhi müretahkhi ching shihcham lubuhnü nüsa bolung azothsürübo ki tuthsukchoh.

²Nüsanü akümpü lakhi Thrünpuh namfimihnu boto neakang, mükünde yung tüshe künsahde, thiyuro mülakhi alü thsüpü yung tüshe mulongsahde,

³nüsa bukkhüp zojihkhi junode yung, tüshe namfimihnu boto ki amütsan laang.

⁴Tüsho küyimki namfimihnu neakrü atobuh arübanü amükheambe müretah kuthran nüsanü angübah.

⁵Junangde nüsa athunurübonü azorü bukkhüp laang. Nüsa khülangnü khülang miki azhihayihde laang, tümüde “Thrünpuhnü akükheangrü zhipdochoh, tüshe azhihayihrü kilim amüthsüm jihchoh.”

⁶Jumonü kim dükdü ching apinü nüsa shuhkihshihpü thsüde Thrünpuh wuto khah bukkhüp azhihayihang.

⁷Nüsa lümthsünübo alala api ki zojang, tümüde apinü nüsa kümchoh.

⁸Zangrü danyukang tüsho kurhangang. Nüsa riri arimri, arungkhi kekhüzü nangde shepü muyubaki de yimde tsahchoh.

⁹Nüsa akin ching düküngang tüsho api yanloang, tümütüsho alomi ching nüsa keoniorübo rukhüh thsünü dünjichoh de nüsanü mükheahlah.

¹⁰Tüsho nüsa thsünübah anükhüh dunglim, alala amüthsüm Thrünpuh, Khrista ching api lünnü müretah lim nüsa jibuhnü nüsa laloshihbah, arünkihshihbah tüsho düküngshihbah.

¹¹Api kilim lünnü lün wu lashang. Amen.

¹²Athülünkhi keoniorübo de inü khejihde alakhi Sila arung hode, ha atsütsü Thrünpuh amüthsüm ah de tuthsukde tüsho khipkhitde inü nüsa kilim akhihkhühnü thrütchoh.

¹³Thrünpuhnü mokhitkhi Babilon ching lakhi borü tüsho I tsührü Marknü nüsa kilim salüm mühahchoh.

¹⁴Khristan amuzho mün müthsüpkhinü khülangnü khülang salüm jihachihang. Khrista ching lakhi nüsa alala kilim mungtsü laang.