Read Yimchungru Naga 2 Peter 3 Bible Online

2 Peter 3 - Yimchungru Naga bible

2 Peter 3

¹Amuzho müyamrübo, kheakü ha nüsa kilim I yo kihüm mahnepü ah. Inü ane chido nüsa lümkhi kurhangpü lümkhitloshihde thrütdo;

²junangde amüsüh wukihrübonü müchitkhi tüsho nüsa amüsühthsangyurübo hode Atungpuh tüsho akhümkhitbuh yukhüm nüsanü alümkhitbah.

³Akhuhde, akheam nimungbo ching luhmünerünü luhmünede tüsho arü nihbuh amütsü künkhi chingnü arübah de nüsanü anikhitbeah.

⁴Arünü athabah, “Api arüpü alokhikhi küching la? Isa bebuhrübo sheabahdo, tüshe lüpdükhi alomiküp thrünchoki ruk lang lah.”

⁵Tüshe adüso Thrünpuh yu hode thüningbo lakheah tüsho ke chingnü tüsho ke hode alomi kamkheah dükhi akhekhungnü thiyuro mihchoh.

⁶Ke harünü judüki alomi she kingdoabah tüsho dükheakshih.

⁷Ju yunü kheakü lakhi thüningbo tüsho alomi, mahkhap nimung tüsho amükinrü mihtsürü dükheakshihpü khiungde mo thsungkheak akhua zolah.

⁸Tüshe amuzho müyamrübo, ha thiyuro dümih: Atungpuh lung nimung khülang ju chithürü tüsho chithürü ju nimung khülang nangde lah.

⁹Khürünü ruhlah dükhi nangde, Atungpuhnü apinü alokhikhi muruhchoh. Apinü she lang she müdükheakshihne, tüshe mihbüm aban mulong müthrishihpü nüsa kheak arümkheamde lah.

¹⁰Tüshe Atungpuh nimung ju ahührü khülang nangde arübah. Judüki thüningbo arungde tsoabahbah; chiningbo atakkhinü niuabahbah, tüsho alomi le ju ching lakhi rhimobo aniuabahbah.

¹¹Tümütüsho lüpdükhi hanangde athsümünimpü lale, nüsa küdürü mihtsürü labea? Nüsanü müsühde tüsho kinde,

¹²Atungpuh nimung nahde arükhi kheahde alabeah. Ju nimungnü mo hode thüningbo athsümünimpü hande arübah tüsho chiningbo atakkhinü aniubah.

¹³Tüshe apinü alokhikhi zode isanü yinmi aso tüsho alomi aso, thiyurolungkirü lapung kheahchoh.

¹⁴Jumonü amuzho müyamrübo, tümütüsho nüsanü ha kheahde lale, areak mükihde, amudopü mülade tüsho mungtsü lade apinü angüshihpü mürangang.

¹⁵Isa keoniorü Paulnü, Thrünpuhnü api kilim jihkhi lümlung hode nüsa kilim thrütkhi nangde, Atungpuhnü arümkheamkhi ju akhümkhit ah de lümang.

¹⁶Apinü hadürü thade api yo kihüm alala ching rukhüh thrütchoh. Api kihümbo ching, mümükheahrü tüsho dükde mülakhi mihtsürünü arü nihbuh thsümünimpü püpü amüsühyu ki rhimokhi nangde, arükchihnü athanakkhi anikhitpü khürü a chakde lah.

¹⁷Jumonü amuzho müyamrübo, nüsanü ha mükheahla le, mihbukmuyuk mihtsürü amülimnü nüsa bede mutsopü tüsho nüsa düküngkhi chingnü mangakpü kurhangang.

¹⁸Tüshe isa Atungpuh tüsho akhümkhitbuh Jisu Khrista amüthsüm tüsho mükheahmudu ching zokihang. Kheakü tüsho lünnü api müretah lashang! Amen.