Read Yimchungru Naga 1 Johan 5 Bible Online

1 Johan 5 - Yimchungru Naga bible

1 Johan 5

¹Jisu ju Khrista de akinrü aban Thrünpuh tsührü ah, tüsho shepünü abuh muzhochonü atsührü she muzhochoh.

²Küyimki isanü Thrünpuh muzhoba tüsho api yuzüng anibanü ha hode isanü Thrünpuh tsührübo muzholah de mükheahchoh.

³Tümüde isanü api yuzüng anikhi ju Thrünpuh muzhokhi ah tüsho api yuzüng ju hahmülang yung.

⁴Tümütüsho Thrünpuh tsührübo abannü alomi kukchoh; tüsho isa akin hode isanü alomi kurungkheak akuk ngükhi lah.

⁵Shepünü alomi kukpü la? Jisu ju Thrünpuh tsührü de akinrünü lang ah.

⁶Jisu Khrista ha ke tüsho thiyih hode arükhi lah, ke hodü lang yung; tüshe ke tüsho thiyih hode ah.

⁷Tüsho Me ju thiyumütsan lah, tümütüsho Me thiyuro ah.

⁸Thiyumütsan mahsam lah, Me, ke, tüsho thiyih; tüsho harü mahsam arihlah.

⁹Isanü mihtsürü thiyumütsan leangkhichoh, tüshe Thrünpuh thiyumütsan atobe ah tümütüsho apinü atsührü dünkheak jihkhi Thrünpuh thiyumütsan ah.

¹⁰Shepünü Thrünpuh tsührü kinchonü amulong ching ha thiyumütsan lah. Shepünü Thrünpuh mükinnü api akeangyu tharü kamshihdo, tümütüsho Thrünpuhnü atsührü dünkheak thiyumütsan thsükhi ching apinü mükin.

¹¹Tüsho Thrünpuhnü isa kilim lün rhangdung jihkhi ha thiyumütsan ah, tüsho ha rhangdung api tsührü kheak lah.

¹²Shepü atsührü lanü rhangdung lah; shepü Thrünpuh tsührü mülanü rhangdung müla.

¹³Sherünü Thrünpuh tsührü mung ching kinchonü inü ha nüsa kilim thrütchoh, junangde nüsa lün rhangdung lah de nüsanü amükheahbah.

¹⁴Tüsho ha isanü api kheak mulongram lakhi lah, junangde isanü api lümkhi yande tümükhüh kheangsho apinü isa ki anijihchoh.

¹⁵Tüsho isanü tümüpürü kheangbanü apinü isa ki anijihchoh de isanü mükheahsho, isanü api ki mushukhi ngüdo de isanü mükheahchoh.

¹⁶Khürünü nihbuh keoniorü ashepü müthsüde neak yihbeakde ngüsho, apinü tamkhüntamnüjang tüsho Thrünpuhnü api kilim rhangdung jihbah. Inü ha amüshebe neak ki thachoh. Ashepü thsüde neak khülang lah. Ju dünkheak apinü tamkhüntamnübeah de inü thachoh yung.

¹⁷Amülim rhimokhi alala neak ah, tüshe amüshepü thsüde neak lah.

¹⁸Thrünpuh tsührünü a neak müyihbeak de isanü mükheahlah, tüshe shepü Thrünpuh tsührüanü apinü kümchoh, tüsho amüneannü api müqiu.

¹⁹Isa Thrünpuh yo, tüsho alomiküp athrünkhi amünean wu ching lah de isanü mükheahlah.

²⁰Thrünpuh tsührü arüdo tüsho thiyuro lakhi api mükheahpü isa kilim anikhitkhi jihdo de isanü mükheahlah; tüsho thiyuro lakhi, api tsührü Jisu Khrista kheak isa lah. Ha thiyuro Thrünpuh tüsho lün rhangdung.

²¹I tsührübo, sangthsübo kheaknü nüsa tsokhide laang.