Read Yimchungru Naga Mah 11 Bible Online

Mah 11 - Yimchungru Naga bible

Mah 11

¹Kheakü Gileadrü Jephtha ju athrungrü thirithsürü lakheah, tüshe api ju müzammüramrü tsührü lakheah; tüsho Gilead kheaknü Jephtha trükkhit.

²Gilead niubenü tsührü athrürübo zübe; tüsho küyimki anihbe tsührübo zode akamkhea, arünü Jephtha yankhit tüsho api ki tha, “Isa jipürü yamkhün ching nü yamrüplurüp müla, tümüde nü a püpürü liberü tsührü ah.”

³Judüki Jephthanü api keoniorübo kheaknü tso tüsho Tob lomi ching la; tüsho mudukmüke mihtsürübonü api yande tsah.

⁴Kim anükhüh dunglim Amon mihtsürübonü Israel bede thirithsü,

⁵jumonü Gilead limberübo Tob lomi chingnü Jephtha bea lupü yü.

⁶Arünü tha, “ Arang tüsho isa limbeang, junangde isanü Amon mihtsürü bede keochihbah.”

⁷Jumonü Jephthanü Gilead limberübo ki tha, “Nüsanü I thraneande I buh yamkhün chingnü yanabahkhi yung de? Tümüde nüsa küpkhuk ching lachoki lang I kilim arücho?”

⁸Tüsho Gilead limberübonü Jephtha ki tha, “ Jumonü kheakü isa nü kilim alode arükheah, junangde nü isa lung yübah Amon mihtsürü bede keochihbah, tüsho Gilead ching larü isa alala kurungkheak aku thsang.”

⁹Jumonü Jephthanü Gilead limberübo ki tha, “Nüsanü I Amon mihtsürü bede keochihpü thüyam lim belode yübah, ATUNGPUHNÜ arübo I kilim jihsho, I nüsa aku thsüba shi?”

¹⁰Tüsho Gilead limberübonü Jephtha ki tha, “Isanü nü yubo yande mürhimosho, isa dükeak ATUNGPUH thiyumütsan labah.”

¹¹Judüki Jephthanü Gilead limberübo lung yü, tüsho mihtsürübonü api arü kurungkheak aku tüsho limthorü thsüshih; tüsho Jephthanü api yu alala Mizpa ching ATUNGPUH miki asuk.

¹²Kheakü Jephthanü yunithsürübo Amon kiulongthsüpuh kilim thiyia yüshih, “Nünü tümü I azhihkhi, I bede keochihpü I lo ching arükhea?”

¹³Tüsho Amon kiulongthsüpuhnü Jephtha yunithsürübo ki alo, “ Tümütüsho Israelnü arü Ijip chingnü akhiukchoki, Arnon chingnü Jabbok tüsho Jordan khiungde I lomi lude tsodo. Jumonü kheakü, mungtsü chingnü alobo ju jihloang.”

¹⁴Jumonü Jephthanü kheaküshe Amon kiulongthsüpuh kilim yunithsürübo yüshih,

¹⁵tüsho api ki tha, “ Jephthanü ha thachoh: Israelnü Moab lomi yungsho Amon mihtsürü lomi lude mutso;

¹⁶küyimki Israel Ijip chingnü atukheanü, arübo sunglo tsahhode Amürüm Keto khiung tüsho Kadesh lim arü.

¹⁷Judüki Israelnü Edom kiulongthsüpuh kilim yunithsürü yüshih, ‘ Muzhobah I nü lo hode yüanü.’ Tüshe Edom kiulongthsüpuhnü mani. Junangde arünü Moab kiulongthsüpuh kilim yüshih, tüshe apinü mümülü. Jumonü Israel ju Kadesh ching lalo.

¹⁸Arünü sunglo hode yübah Edom tüsho Moab lomi mükamde ho tüsho Moab lomi aniakhiuklim arübah Arnon thripkhüh binkheam. Tüshe arünü Moab aredungyean ching müyüzah, tümüde Arnon ju Moab aredungyean lakheah.

¹⁹Judüki Israelnü yunithsürübo Heshbon ching yakzan shuhde alabuh, Amor kiulongthsüpuh Sihon kilim yüshih, ‘ Muzhobah nü lomi hode isa lapung ching yüshang.’

²⁰Tüshe Sihonnü Israel api lomi hode ayüpü mükin. Jumonü Sihonnü api mihtsürü alala Jahaz ching trüngmukhung tüsho Israel bede keochih.

²¹Tüsho ATUNGPUH Israel Thrünpuhnü Sihon tüsho api mihtsürü alala Israel khah ching jih, tüsho arünü kuk. Junangde Israelnü arü lakhi lomi Amorrü lo alala lukheah.

²²Arünü Amorrü lo, Arnon chingnü Jabbok tüsho sunglo chingnü Jordan khiungde lu.

²³Jumonü kheakü ATUNGPUH Israel Thrünpuhnü api mihtsürü Israel müngühnü Amorrü yankhitabah; dale nünü ju luba shi?

²⁴Nü thrünpuh Kemoshnü nü müküh-a lupü jihkhi nünü muluba de? Jumonü ATUNGPUH isa Thrünpuhnü tümüpürü isa müngüh müküh-a luchonü isanü alubah.

²⁵Kheakü nü ju Zippor tsührü, Moab kiulongthsüpuh Balak kheaknü atsübea de? Apinü Israel müneahakheahdü de yungsho keochihdü de?

²⁶Israel kam chi mahsam Heshbon tüsho ju kiulongbo, Aroer tüsho ju kiulongbo, tüsho Arnon yean kiutobo alala ching lachoki nünü tümü thsükhi jurü mululokhea?

²⁷Jumonü inü nü azhihde neak müyihbeak, tüshe I bede keochihkhinü nünü I amülim kamshih. ATUNGPUH , mahkhapbuhnü Israelrü tüsho Amon mihtsürü dükeak khihni mahkhapshang.”

²⁸Jude thsüthsü she, Amon kiulongthsüpuhnü Jephthanü ayüshihkhi yubo mani.

²⁹Judüki ATUNGPUH me Jephtha kheak arü, tüsho apinü Gilead tüsho Manase tsahho, tüsho Gilead ching Mizpa tsahho; tüsho Gilead ching Mizpa chingnü Amon mihtsürübo kilim yü.

³⁰Jephthanü ATUNGPUH ki thiyuchihchim thsü tüsho tha, “Nünü Amon mihtsürü I khah ching jihsho,

³¹Amon mihtsürü kilimnü I mungtsü chingnü ayülobah, I yam ripit chingnü tümü I shorupü akhiukbanü, tsükjide ATUNGPUH yo thsübah, tüsho inü ju taka kingaün jihbah.”

³²Jumonü Jephthanü Amon mihtsürü kilim arü bede keochihpü yü, tüsho ATUNGPUHNÜ arübo api khah ching jih.

³³Tüsho apinü arübo Aroer chingnü Minnith tüsho Abel Keramin khiungde kiuto muku thsümünimde ahihdo laksahde kuk. Hanangde Amon mihtsürü ju Israelrünü kukabah.

³⁴Küyimki Jephtha Mizpa ching anihbuh yam lim alungkhea, atsührübe ju züpzüppü shuhbah tsünde api shorupü akhiuk; tüsho api tsührü alibe ju lang alakheah. Alibe kheak kihode tsührü athrürü yungsho aliberü mülakheah.

³⁵Küyimki apinü alibe ngükhea, apinü akhim thorüp tüsho zhi, “O! I tsah-a! Nünü I mulong rozhakde thsünüshihdo, tümütüsho inü ATUNGPUH kilim müthsümünimpü thsüde thiyuchihchim khülang thsüdo.”

³⁶Jumonü alibenü api ki tha, “ Abuh, nünü ATUNGPUH kilim nü yubo jihdüsho, nü mün chingnü akhiukkhi yande I kheak rhimoang, tümütüsho ATUNGPUHNÜ nü riri Amon mihtsürü kheak royimdo.”

³⁷Alibenü abuh ki tha, “ Ha I thsungkheaknü rhimoang: I langzü khinu mahne zojang, junangde inü yübah awungbo kheak rümde atsahbah tüsho I müyamrü le inü I tsangkhitkhi tüzhobah.”

³⁸Jumonü apinü tha, “Yüang.” Tüsho apinü alibe ju khinu mahne thsungkheak thiyia yüshih; alibenü amüyamrü lung yü tüsho anihbe tsangkhitkhi awungbo kheaknü tüzho.

³⁹Khinu mahne dunglim alibenü abuh kilim alode arü, tüsho apinü thiyuchihchimkhi yande alibe sheshih. Alibe ju atsangkhitkhi lakheah. Tüsho ha Israel ching yakli khülang kam,

⁴⁰junangde Israel tsührü aliberübonü Gileadrü Jephtha tsührübe dünkheak tüzhopü kam aban nimung phüyi yüde alakheah.