Read Yimchungru Naga Mah 12 Bible Online

Mah 12 - Yimchungru Naga bible

Mah 12

¹Judüki Ephraim mihtsürübo mukhungbah Zaphon hode yü, tüsho Jephtha ki tha, “ Tümü thsükhi nü Amon mihtsürü bede keochihpü hode ayükhea tüsho nü lung yüpü isa müjikhea? Isanü nü kheaknü nü yam takkheamjihbah!”

²Tüsho Jephthanü arü ki tha, “I tüsho I mihtsürübo Amon mihtsürü kheak tode rukachihde alakheah; tüsho küyimki inü nü ki jikhea, nünü I arü khah chingnü mübekhit.

³Jumonü küyimki nünü I mübekhit de inü angükhea, inü I rhangdung shuhmülanga jihde Amon mihtsürü azhihde hode ayükheah; tüsho ATUNGPUHNÜ arübo I khah ching jih. Dale tümüde nüsa khihni I bede keochihpü atukhea?”

⁴Kheakü Jephthanü Gilead mihtsürü alala bemukhung tüsho Ephraim bede keochih. Tüsho Gilead mihtsürübonü Ephraim kuk, tümütüsho arünü tha, “Nüsa Gileadrü ju Ephraim tüsho Manaserü bolung tsotsahrümtsahrü ah.”

⁵Ephraimrü mukhiungyide Gileadrünü Jordan dükihhopung yandoabah. Ephraimrü atsokhitrü khürünü tha, “I dükihhoanü,” Gilead mihtsürübonü api ki tha, “Nü Ephraimrü a de?” Apinü, “Yung,” de thasho,

⁶arünü api ki tha, “Dale, Shibboleth de thaang.” Tüsho apinü athabah, “Sibboleth,” tümütüsho apinü dükde müthakhitkhuk. Judüki arünü api bede yübah Jordan dükihhopung laksah-a bahde alakheah. Ju kim khülang chingnü Ephraimrü 42,000 laksah.

⁷Tüsho Jephthanü kam thuruk Israel mahkhap. Jushu Gileadrü Jephtha sheabah tüsho Gilead kiuto khülang ching kiuyukabah.

⁸Api dunglim, Bethlehemrü Ibzannü Israel mahkhap.

⁹Atsührü athrürü 30 tüsho aliberü 30 lakheah, atsührü 30 rhangshih, tüsho atsührübo thsungkheak aliberü 30 bedarü. Apinü kam thüne Israel mahkhap.

¹⁰Jushu Ibzan sheabah tüsho Bethlehem ching kiuyukabah.

¹¹Api dunglim, Zebulunrü Elonnü Israel mahkhap. Apinü kam thürü Israel mahkhap.

¹²Zebulunrü Elon sheabah tüsho Zebulun lomi Aijalon ching kiuyukabah.

¹³Api dunglim, Pirathonrü Hillel tsührü Abdonnü Israel mahkhap.

¹⁴Atsührü 40 tüsho tsührü-tsührü 30, donki 70 kheak binrü lakheah. Apinü kam tizheah Israel mahkhap.

¹⁵Judüki Pirathonrü Hillel tsührü Abdon sheabah tüsho Amalekrü wungbo, Ephraim lomi, Pirathon ching kiuyukabah.