Read Yimchungru Naga Mah 13 Bible Online

Mah 13 - Yimchungru Naga bible

Mah 13

¹Kheaküshe Israel mihtsürünü ATUNGPUH miki amütsü rhimo, tüsho ATUNGPUHNÜ arü kam yirü Filistiarü khah ching jih.

²Kheakü mihtsürü khülang Dan yamkhün Zora chingnü amung Manoa lakheah; aniube ju tsührü mülade aniungyüh lakheah.

³Tüsho ATUNGPUH yunirü alibe ki akhiuk tüsho tha, “ Kheakü nü aniungyüh ah tüsho tsührü müla, tüshe nü büm makeangde akambah tüsho tsührü khülang labah.

⁴Jumonü kheakü, muzhobah yukhu yungsho amüshangbe muyungpü kümkangang, tüsho amümüsüh tümü she dütsüh.

⁵Tümütüsho kheahang, nü büm makeangde akambah tüsho tsührü khülang labah. Tüsho aku kheak kuyüliuh müyihkih, tümüde khungarü ju buk chingnü Thrünpuh kilim Nazirit khülang thsübah; tüsho apinü Israel ju Filistiarü khah chingnü bekhitpü tankihbah.”

⁶Jumonü alibenü arübah aniubuh ki tha, “ Thrünpuh mihtsürü khülang I ki arü tüsho api akheahpü ju Thrünpuh yunirü nangde khide amüyinsahbe lakheah; tüshe api küchingnü arükheanü inü api ki mükeokhi, tüsho apinü I ki amung mütha.

⁷Tüshe apinü I ki tha, ‘ Kheahang, nü büm makeangde akambah tüsho tsührü khülang labah. Kheakü yukhu yungsho amüshangbe tümü she düyung, yungsho amümüsüh tümü dütsüh, tümüde khungarü ju buk chingnü api she nimung khiungde Thrünpuh kilim Nazirit khülang labah.’ ”

⁸Judüki Manoanü ATUNGPUH ki tamkhüntamnü tüsho tha, “O I tungpuh, muzhobah nünü athiyikhi Thrünpuh mihtsürü isa kilim alode arüshang tüsho azübepü lakhi khungarü thsungkheak isanü tümü rhimobeanü isa ki thsangyushang.”

⁹Thrünpuhnü Manoa düsheak ani, tüsho alibe thulu ching binde alachoki Thrünpuh yunirü alode arü; tüshe aniubuh Manoa anihbe lung mülakheah.

¹⁰Judüki alibenü niokheamde alihde yübah aniubuh ki tha, “ Kheahang, püpü nimung arükhi mihtsürü kheakü I ki akhiukdo!”

¹¹Jumonü Manoanü wusubah aniube yande yü. Küyimki api mihtsürü kilim arükhea, apinü anihbuh ki tha, “Nü ha liberü ki asukbuh mihtsürü a de?” Tüsho apinü tha, “I ah.”

¹²Tüsho Manoanü tha, “ Kheakü nü yubo dünjishang! Azübuh rhangdung yakli tüsho api rhimo tümü laba?”

¹³Jumonü ATUNGPUH yunirünü Manoa ki tha, “Inü alibe ki thakhi alala anihbenü kümkangshang.

¹⁴Alibenü kurungaso chingnü akhiukkhi tümü she mütsühbeah, yungsho yukhu le amüshangbe düyung, yungsho amümüsüh tümü dütsüh. Inü anihbe ki thakhi alala alibenü rhimoshang.”

¹⁵Judüki Manoanü ATUNGPUH yunirü ki tha, “ Muzhobah aleangang, tüsho isanü nü thsungkheak mihnu nunu khülang mozümodoanü.”

¹⁶ATUNGPUH yunirünü Manoa ki tha, “Nünü I beloa binshihshih she, inü nü tsühyungbe mütsüh. Tüshe nünü taka kingaünkhi jihpü lasho, nünü ATUNGPUH kilim jihang.” ( Tümüde Manoanü api ju ATUNGPUH yunirü ah de mümükheah.)

¹⁷Judüki Manoanü ATUNGPUH yunirü ki tha, “Nü yubo dünjichoki isanü nü wüntre jihpü thsüde, nü mung she a?”

¹⁸ATUNGPUH yunirünü api ki tha, “ Ha amüyinsahbe ah de ngübah, tümüde nünü I mung keokhicho?”

¹⁹Jumonü Manoanü hi kingaün lung mihnu nunu lubah ATUNGPUH kilim lungto kheak jih. Tüsho Manoa le aniube anenü ju kheak kheahchoki apinü amüyinsahbe rhimo thsü:

²⁰Kingaün sadam kheaknü motru thüning lim yükihchoki, ATUNGPUH yunirü kingaün sadam motru ching aki. Küyimki Manoa tüsho aniubenü ha ngükhea, anenü ane miro alo lim mükhüm.

²¹Küyimki ATUNGPUH yunirü ju Manoa tüsho aniube ki makhiuklode akamkhea, api ju ATUNGPUH yunirü thsüa lah de Manoanü mükheah.

²²Manoanü aniube ki tha, “Isa tsükjide ashebah, tümütüsho isanü Thrünpuh ngüdo!”

²³Judüki aniubenü api ki tha, “ATUNGPUHNÜ isa laksahpü lümkhülaa, apinü taka kingaün tüsho hi kingaün isa khah chingnü müleangkhi, yungsho isa ki hadürü alala muhuh, yungsho ha kim ching hadürü apinü isa ki müthaa labah.”

²⁴Jumonü alibenü tsührü khülang zübe tüsho amung Samson de ji; khungarü ju zode asürü, tüsho ATUNGPUHNÜ api müngühjih.

²⁵Tüsho Zora le Eshtaol dükeak Mahane Dan ching A TUN GPU H menü api kheak thurumusupü tankih.