Read Yimchungru Naga Mah 15 Bible Online

Mah 15 - Yimchungru Naga bible

Mah 15

¹Ju dunglim, wheat yimlu kim ching Samsonnü mihnu nunu lu tüsho aniube rhua kheahpü yü. Apinü tha, “I niube yappung ching, anihbe kilim yüanü.” Tüshe abuhnü api ayüzahpü mümülü.

²Alibe abuhnü tha, “ Atsütsü nünü alibe thraneanlah de inü lümdo; jumonü inü anihbe nü atrubuh kilim jihdo. Aniurü akheambe anihbe kheaknü atsübe yung de? Muzhobah amüthri anihbe luang.”

³Tüsho Samsonnü arü ki tha, “ Hakhip a inü Filistiarü thsümünimkhi I mungchih müla!”

⁴Judüki Samsonnü yübah rimre 300 tholo, tüsho mahnene thsübah amo chingarün. Jushu apinü amo chingarünkhi kheak tsünduphung rhükkih.

⁵Küyimki apinü tsünduphungbo kheak mo thsahkihkhea, apinü rimrebo ju Filistiarü lubo ching dükhea yüshih, tüsho yimlukhi le zhipde alakhi hi tüsho kurungasolu le oliv dungbo takabah.

⁶Judüki Filistiarünü tha, “ Ha shenü arhimokhea?” Tüsho arünü alo, “ Timnarü tsühmeakbuh Samsonnü ah, tümütüsho apinü aniube lubah api atrubuh kilim jihabah.” Jumonü Filistiarünü atubah alibe le abuh ane chido monü takabah.

⁷Tüsho Samsonnü arü ki tha, “ Tümütüsho nüsanü hadürü rhimodo, tsükjide inü nüsa kheak royimbah, jushu inü arün thsübah.”

⁸Jumonü apinü arübo lungchihde yan tüsho hihde laksah; jushu apinü yükibah Etam lungkhün ching la.

⁹Kheakü Filistiarünü wutu tüsho Juda ching, Lehi phünide hiukhia bin.

¹⁰Juda mihtsürübonü keokhi, “Nüsa tümüde isa bede keochihpü atukhea?” Jumonü arünü alo, “Isa Samson rampü, apinü isa ki rhimokhi nangde anihbuh ki rhimopü atukheah.”

¹¹Judüki Juda mihtsürübo 3000 Etam lungkhün ching yüki, tüsho Samson ki tha, “Isa kurungkheak Filistiarünü yakzan shuhlah de nünü mümükheah de? Nünü isa kheak rhimokhi ha tümü a?” Tüsho apinü arü ki tha, “ Arünü I ki rhimokhi nangde, inü arü ki rhimokheah.”

¹²Tüsho arünü api ki tha, “Isanü nü rambah Filistiarü khah ching jihpü akikheah.” Judüki Samsonnü arü ki tha, “Nüsanü I mülaksah de thiyuchihchimang.”

¹³Jumonü arünü api ki asuk, “Yung, tüshe isanü nü rhükbah lang arü khah ching jihbah; tüshe tsükjide isanü nü mülaksah.” Tüsho arünü api ju liu aso mahnenü rhükbah lungto chingnü bede akhiuk.

¹⁴Küyimki api Lehi ching arükheanü, Filistiarünü api azhihde ahode arü. Judüki ATUNGPUH me api kheak tode arü; tüsho abin kheak liubo ju monü atakkhi hing nangde kam, tüsho akhahbo chingnü arhükkhi atreakabah.

¹⁵Apinü donki mükhühnuk aso khülang ngükhi akhah chunga yüshihbah ju lu, tüsho junü mihtsürü 1000 laksah.

¹⁶Judüki Samsonnü tha, “Donki mükhühnuknü,amujungbo kheak mujungkihde, donki mükhühnuknü inü mihtsürü 1000 laksah.”

¹⁷Küyimki apinü athakhamkhea, apinü mükhühnuk ju akhah chingnü jipa bah; tüsho ju dangpung ki Ramath Lehi de ji.

¹⁸Judüki api khide kethüride kam; jumonü apinü ATUNGPUH ki zhi tüsho tha, “Nü yamlarü khah hode nünü ha abekhitkhi ato jihdo; tüsho kheakü kethürinü I asheba de tüsho tsütamübahrü khah ching I keamba de?”

¹⁹Jumonü Thrünpuhnü Lehi ching alokhün yahshungjih, tüsho ju chingnü ke akhiukbah apinü yung; tüsho api sühmüh arülobah düküngde kam. Jumonü apinü ju ki En Hakkore de ji, ju Lehi ching khihni khiungde lah.

²⁰Tüsho apinü Filistiarü nimungbo ching Israel kam muku mahkhap.