Read Yimchungru Naga Mah 17 Bible Online

Mah 17 - Yimchungru Naga bible

Mah 17

¹Kheakü mihtsürü khülang Ephraim müzüngbo ching, amung Mika lakheah.

²Tüsho apinü abe ki tha, “Inü sode nünü alubuh muthrumüneankhi shotoyinchi 1100 I kilim lah; ju inü alukheah.” Tüsho abenü api ki tha, “I tsah-a, ATUNGPUHNÜ nü müngühshang!”

³Jumonü küyimki apinü shotoyinchi 1100 ju abe kilim jihlokhea, abenü tha, “Inü I tsührü thsungkheak sangthsü thsüjihpü I khah ching shotoyinchi ATUNGPUH kilim abümnü müsühkhitdo; jumonü nü kilim jihlobah.”

⁴Hanangde apinü shotoyinchi abe kilim jihlo. Jushu abenü shotoyinchi 200 yinchizünrü kilim jih, tüsho apinü junü sangthsü khülang thsübah shotoyinchinü lüpdo; tüsho jurübo Mika yam ching lakheah.

⁵Mika a arüngakopung khülang lakheah, tüsho arüngako kukruk tüsho yambuk sangthsübo thsüa lakheah; tüsho apinü atsührü khülang amükeamrü thsüshih.

⁶Judüki nimungbo ching Israel ching kiulongthsürü mülakheah; mihbüm abannü nihbuh mük ki tümü alungkianü ju rhimo.

⁷Kheakü Juda ching lakhi Bethlehem chingnü Juda yamkhün yo athrününgtsüng mihtsürü khülang lakheah; api ju Levirü lakheah tüsho ju ching yünü alakheah.

⁸Mihtsürü junü anihbuhnü angükhi dangpung ching lapü Juda ching lakhi Bethlehem chingnü chamachih. Jushu apinü hantsahde Ephraim awungbo ching Mika yam lim arü.

⁹Tüsho Mikanü api ki tha, “Nü küchingnü arücho?” Apinü anihbuh ki alo, “I Juda ching lakhi Bethlehem chingnü Levirü khülang ah, tüsho I alapü lapung yimchoh.”

¹⁰Mikanü api ki tha, “I lung laang, tüsho I athsunganahrü tüsho I yo amükeamrü thsang, tüsho inü nü kilim kam chingnü shotoyinchi 10 jihbah tüsho khimmih le tsühyungbe jihbah.” Jumonü Levibuhnü yüzah.

¹¹Judüki Levibuhnü ju mihtsürü lung lapü reangkeamde alakheah; tüsho athrününgtsüng ju api tsührü nangde kamabah.

¹²Jumonü Mikanü Levibuh tsangkhit, tüsho api ju anihbuh yo amükeamrü kamshih, tüsho Mika yam ching la.

¹³Mikanü tha, “ Kheakü ATUNGPUHNÜ I ki tsüde alabah de mükheahlah, tümütüsho I a Levirü amükeamrü khülang lah!”