Read Yimchungru Naga Mah 2 Bible Online

Mah 2 - Yimchungru Naga bible

Mah 2

¹Judüki ATUNGPUH yunirü Gilgal chingnü Bokim ching atu tüsho tha, “Inü nüsa Ijip chingnü bekhit tüsho inü nüsa jipürü ki alokhikhi lomi ching bedarü; tüsho inü tha, ‘Inü küyimkishe nüsa ki tangzüngkhi müthsümünim.

²Tüsho nüsanü ha lomi ching larü ki tangzüng müthsü; nüsanü arü kingaün sadam thsümünima keamshihbah.’ Tüshe nüsanü I yu mani. Tümüde nüsanü ha rhimokhea?

³Jumonü inü she tha, inü nüsa mikinü arü yankhita mübah; tüshe arü ju nüsa rheang ki ayangbo kamshihbah, tüsho arü thrünpuhbo ju nüsa ki qimürip kamshihbah.”

⁴Junangde küyimki ATUNGPUH yunirünü Israelrü alala ki thiyu harü ha asukkhea, mihtsürübonü arü düsheak achangnü trip.

⁵Tüsho arünü ju dangpung mung ju Bokim de ji; tüsho ju ching arünü ATUNGPUH kilim laksah-a kingaün jih.

⁶Küyimki Jihusuanü mihtsürübo ju müzütshihkhea, Israel tsührübo abannü alo müküh-a lupü nihbuh yamrüplurüp lim yü.

⁷Jumonü Jihusua nimungbo alala ching tüsho Jihusua sheshu rhangdung larü, ATUNGPUHNÜ Israel ching rhimokhi ato ngürü nimungbo alala ching mihtsürübonü ATUNGPUH tankih.

⁸Kheakü Nun tsührü Jihusua ATUNGPUH yamlarü kam 110 pü ching sheabah.

⁹Tüsho arünü api ju Gaash Müzüng dukulim, Ephraim müzüngbo ching, Timna Heres ching ayamrüplurüp aredung yean phulung ching kiuyukabah.

¹⁰Küyimki ju lün alala arü bebuhrü ki mukhungkhea, ATUNGPUH mümükheahkhi yungsho Israel thsungkheaknü rhimokhi mümükheahkhi, arü dunglim lün püpü asürü.

¹¹Judüki Israelrübonü ATUNGPUH miki amütsü ju rhimo tüsho Baalbo tankih;

¹²tüsho arünü arü bebuhrü ATUNGPUH , Thrünpuh arü Ijip lomi chingnü bekhitbuh bahyuk; tüsho arünü arü mühi lakhi thrünpuhbo ki mükhümde kingaün; tüsho arünü ATUNGPUH bukakhiukshih.

¹³Arünü ATUNGPUH bahyuk tüsho Baal le Astar tankih.

¹⁴Tüsho Israel azhihde ATUNGPUH bukakhiuk. Jumonü apinü arübo ju arü yankhia lurü khah ching jih; tüsho apinü arübo arü mühide lakhi thiriribo khah ching yinabah. Junangde arü riribo miki arübonü müzhipkhukde kam.

¹⁵Küyimki arü wukhiukbanü ATUNGPUHNÜ athakhi tüsho thiyuchihchimkhi nangde thsümütsüpü ATUNGPUH khah arü azhihde lakheah. Tüsho arü tode lümthsünü.

¹⁶Judüki ATUNGPUHNÜ arü yankhia lurü khah chingnü bekhitrü mahkhaprübo asürüshih.

¹⁷Tütüshe arünü mahkhaprübo yu mani tüsho arünü püpürü thrünpuhbo kheak müzammüram thsü tüsho arü ki khukning. Arünü nahde arü bebuhrünü atsahkhi limro chingnü, ATUNGPUH yukhüm anikhi chingnü rholode tso; ju ruk arünü mürhimo.

¹⁸Küyimki ATUNGPUHNÜ arü thsungkheaknü mahkhaprü arüshihkhea, ATUNGPUH ju mahkhaprü lung la, tüsho apinü arübo mahkhaprü nimungbo alala ching arü riri khah chingnü khümkhit; tümütüsho arü junode thsümüchirü dünkheaknü tüzhochoki ATUNGPUHNÜ mihmuzho huh.

¹⁹Tüsho küyimki mahkhaprübo sheabahkhea, arünü rholobah püpürü thrünpuhbo yande, tankihde tüsho khukningde arü bebuhrü kheaknü amütsübe thsüde rhimo. Arünü arü nihbuh rhimokhi chingnü yungsho arü nihnihkhi limro chingnü arün müthsü.

²⁰Jumonü ATUNGPUHNÜ Israelrü kheak khide bukakhiukde tha, “ Tümütüsho ha trükshihnü inü arü jipürü ki tangzüngkhi thsümünimdo tüsho I yu mani.

²¹Inü she Jihusua shechoki aninga lakhi trükshihbo arü müngühnü yankhita mübah,

²²junangde jurü hode inü Israelrü ju arü bebuhrünü ATUNGPUH limro ching tsahkhi nangde rhimonahnü rükakiakheahbah.”

²³Jumonü ATUNGPUHNÜ jurü trükshihbo nahde yankhita mübahde zojih; yungsho Jihusua khah ching she apinü müjih.