Read Yimchungru Naga Mah 3 Bible Online

Mah 3 - Yimchungru Naga bible

Mah 3

¹Jumonü ATUNGPUHNÜ trükshih harü Israelrü rükakipü Kanan ching thirithsü ching müyüakheahrübo zojih.

²( Ha hodü lang Israel tsührübo püpüki thiri müthsüakheahrü ki thsangyupü lakheah):

³Filistiarü yakzanshuhrü phüngü, Kananrü alala, Sidonrü tüsho Baal-hermon chingnü Lebo-hamath khiungde Lebanon Müzüng kheak larü Hivrübo.

⁴Arübo ju ATUNGPUHNÜ Mosa hode arü bebuhrü kilim jihkhi ATUNGPUH yukhüm aninahki de Israelrü rükakipü lakheah.

⁵Junangde Israelrü ju Kananrü, Hivrü, Amorrü, Perizrü, Hitrü tüsho Jebusrü lung lakheah.

⁶Arünü arü tsührü aliberübo yamkhün thsüpü lu tüsho arü tsührübebo arü tsührü kilim jih, tüsho arünü arü thrünpuhbo tankih.

⁷Jumonü Israelrünü ATUNGPUH arü Thrünpuh mihabahbah, A TUN GPU H miki amütsü rhimo, tüsho Baal le Ashera sangthsü kingaün.

⁸Jumonü ATUNGPUHNÜ Israelrü kheak bukakhiuk tüsho apinü arübo Mesopotamia kiulongthsüpuh Kushan-rishathaim khah ching yinabah; tüsho Israel tsührübonü kam tizheah Kushan-rishathaim tankih.

⁹Küyimki Israelrünü ATUNGPUH ki zhikhea, Israelrü tsührübo bekhitpü thsungkheaknü Kenaz tsührü Kaleb niurü Othniel yüshih.

¹⁰ATUNGPUH me api kheak arü, tüsho apinü Israel mahkhap; api thirithsü ching yü, tüsho ATUNGPUHNÜ Mesopotamia kiulongthsüpuh Kushan-rishathaim api khah ching jihde akuk ngüshih.

¹¹Junangde lomi ju kam yirü sühakhim. Jushu Kenaz tsührü Othniel sheabah.

¹²Kheaküshe Israelrünü A TUN GPU H miki amütsü rhimo; jumonü ATUNGPUHNÜ Moab kiulongthsüpuh ju Israel azhihde reangzahshih.

¹³Judüki apinü Amonrü le Amalekrü bebah Israelrü kuk, tüsho arünü ashisang lakhi kiuto luabah.

¹⁴Jumonü Israelrünü Moab kiulongthsüpuh Eglon kam thürükheak tizheah tankih.

¹⁵Tüsho küyimki Israelrü tsührübonü ATUNGPUH ki zhikhea, ATUNGPUHNÜ bekhitshihpü Benjamin trük chingnü Gera tsührü Ehud, huzulimnü arhimobuh asürüshih. Israelrünü Moab kiulongthsüpuh Eglon kilim api kheaknü ruk mühah-a yüshih.

¹⁶Ehudnü nuk khülang thripkhüh thripkhüh ahüyuk, ashanglim khahnap 1nü thsü; tüsho apinü akhim alunglimnü achim tsülimpeang rüma lu.

¹⁷Junangde apinü Moab kiulongthsüpuh Eglon kilim thsambah jih. Eglon kiulongthsüpuh ju khide shihkihrü mihtsürü lakheah.

¹⁸Küyimki Ehudnü ruk ju jihabahkheanü ruk hanrü mihtsürübo thiyia tsoshih.

¹⁹Tüshe apinü Gilgal thüninde lung-mejak mikinü alode yübah kiulongthsüpuh ki tha, “O kiulongthsüpuh, nü thsungkheak inü aramyu khülang lah.” Jumonü kiulongthsüpuhnü tha, “Dalan!” Tüsho api lung larübonü api mikinü wukhiukabah.

²⁰Api arüngmükhing yam achangbe khiungshak ching alangzü binde alachoki Ehudnü api ki arübah tha, “ Thrünpuh kilimnü nü thsungkheak thiyusheak khülang lah.” Jumonü apinü abinpung chingnü asürü.

²¹Judüki Ehudnü akhah huzulim chungkhitbah achim tsülimnü nuk lu tüsho abuk ching düchipyukjih;

²²tüsho nukphi she alala yüzahabah, tüsho amüdangnü nuk ju müleamdo, tümüde apinü abuk chingnü nuk mudukkhit; tüsho bukningbo müleamkhit.

²³Judüki Ehudnü mükü hode wukhiuk tüsho achangbe khiungshak ripit mükhipdojih.

²⁴Küyimki api wukhiukkhea, yamlarübo arü, tüsho küyimki arünü achangbe khiungshakbo ju mükhipdoa ngükhea, api akhiungshak ching sühakhimchoh de lüm.

²⁵Jumonü arünü zhoyuk arüde aleang tüsho kheaküshe akhiungshak khimdopü ju mükhimshuh. Jumonü arünü amükhipbe lubah khimshuh; tüshe arü tungpuh ju adampü kheak shea yapa lakheah.

²⁶Tüshe arü ashua lachoki Ehud a tsokhit, tüsho lung-mejak hode yübah Seira lim tsokhit.

²⁷Küyimki api akhiungkhea, apinü Ephraim awung lomi chingnü hulipungpung khung, tüsho Israel tsührübo awung chingnü api lung yüki; tüsho apinü arü be.

²⁸Judüki apinü arü ki tha, “I dunglim yanang, tümüde ATUNGPUHNÜ nüsa riri Moabrü nüsa khah ching jihdo.” Jumonü arünü Moab lim yüpü Jordan dükihhopung zhipdo, tüsho sheshe muhoshih.

²⁹Ju kim ching arünü Moabrü 10,000 bande, athrungrü khülang she mutsokhitshihde laksah.

³⁰Ju ni Moabrü ju Israelrü bukkhüp yüzahabah, tüsho lomi ching kam zheahrü mungtsü lakheah.

³¹Api dunglim limberü Anath tsührü Shamgar lakheah. Apinü moshi kitbe-tsonü Filistiarü 600 laksah; tüsho apinü she Israel bekhit.