Read Yimchungru Naga Mah 4 Bible Online

Mah 4 - Yimchungru Naga bible

Mah 4

¹Ehud she dunglim Israel mihtsürübonü ATUNGPUH miki amütsü rhimolo.

²Jumonü ATUNGPUHNÜ arübo Hazor ching yakzanshuhbuh Kanan kiulongthsüpuh Jabin khah ching jih. Tüsho api bonungrü abebuh ju Harosheth Hagoyim ching lakhi Sisera lakheah.

³Tüsho Israelrünü ATUNGPUH ki zhi; tümüde Jabin a yinchi khoralolungbe 900 lakheah, tüsho apinü Israelrü kam muku juno.

⁴Ju kim ching Lapidoth niube wukihrü Debora ju Israel mahkhapde alakheah.

⁵Anihbenü Ephraim müzüng lomi ching Rama tüsho Bethel dükeak Debora ashidung bukkhüp binde alakheah, tüsho Israelrünü mahkhappü thsungkheak anihbe kilim arü.

⁶Alibenü Naphtali ching lakhi Kadesh ching Abinoam tsührü Barak kilim yüshihde tha, “ATUNGPUH Israel Thrünpuhnü nü ki thiyukhüm jihchoh: Yüang tüsho Naphtali le Zebulun mihtsürü 10,000 bebah Tabor wung lim yüang.

⁷Inü Jabin bonungrü abebuh Sisera api khora-lolungbebo tüsho bonungrübo Kishon yung ching münitde azahbah; tüsho inü api nü khah ching jihbah.”

⁸Tüsho Baraknü alibe ki tha, “Nünü I lung yüsho I ayübah, tüshe nü I lung müyüsho I müyü.”

⁹Jumonü anihbenü tha, “ Tsükjide I nü lung yübah; tüshe nü yüpü lakhi ching nü müretah müla, tümüde ATUNGPUHNÜ Sisera ju alibe kilim jihbah. Jumonü Deboranü Barak lung Kadesh ching yü.”

¹⁰Tüsho Baraknü Zebulun tüsho Naphtali ju Kadesh ching ji; tüsho mihtsürü 10,000 api lung yü; tüsho Debora api lung yü.

¹¹Kheakü Mosa akü Hobab tsühsoniuso Kenrü Hebernü anihbuh Kenrü kheaknü chamkhi tüsho Kadesh yean Zaanaim ching thülamsang phünide api khimyam thsü.

¹²Tüsho Abinoam tsührü Barak ju Tabor wung ching wutudo de arünü Sisera ki thiyusheak jih.

¹³Jumonü Siseranü api yo yinchi khoralolungbe 900 tüsho api lung Harosheth Hagoyim khiungde alarübo jimukhung.

¹⁴Judüki Deboranü Barak ki tha, “ Asürang, tümüde khihni ATUNGPUHNÜ Sisera nü khah ching jihdo. ATUNGPUH nü müngüh müyü de?” Jumonü Baraknü mihtsürü 10,000 api lung yande Tabor müzüng kheaknü aki.

¹⁵ATUNGPUHNÜ Sisera le api khora-lolungbe tüsho bonungrübo alala nukshangnü Barak müngüh laksahkham, tüsho Sisera ju api khora-lolungbe kheaknü akibah ajingnü alihde tso.

¹⁶Tüshe Baraknü khora-lolungbebo le bonungrü Harosheth Hagoyim khiungde müshamde yü, tüsho Sisera bonungrübo alala nukshangnü keamshih; mihtsürü khülang she maning.

¹⁷Tüshe Sisera ju ajingnü tsokhitde Kenrü Heber yamkhünbe Jael yam ching yü; tümüde Hazor kiulongthsüpuh Jabin tüsho Kenrü Heber dükeak mungtsü lakheah.

¹⁸Jaelnü Sisera shorupü wukhiuk tüsho api ki tha, “I tungpuh arang, azahang; tümü dütre.” Jumonü apinü anihbe yam ching yüzah, tüsho alibenü phuyap-khimnü api muhiudojih.

¹⁹Apinü alibe ki tha, “I kethürilah jumonü muzhobah I ke duhang.” Anihbenü niuhke keluh khimshuhbah ayungbe duh tüsho muhiudoa zo.

²⁰Apinü alibe ki tha, “ Thüyam khimdopü ki zhipang tüsho khürünü arübah ha ching khürükhüh la shi de keosho müla de thaang.”

²¹Judüki Heber niube Jaelnü müzam khülang lu tüsho yümlung khülang akhah ching shuh, tüsho mükhihde yübah müzam ju amüchip chingnü kheana alo khiungde yüzahshih; tümütüsho api akeakkhinü nahde yapshea lakheah. Jumonü api sheabah.

²²Baraknü Sisera müshamde arü, tüsho Jaelnü api shorupü wukhiuk, tüsho api ki tha, “ Arang, nünü shepü mihtsürü yimchonü inü ahuhbah.” Jumonü apinü alibe yam ching yüzah tüsho Sisera amüchip ching müzam müjipbah shea yapde lakheah.

²³Jumonü ju nimung Thrünpuhnü Kanan kiulongthsüpuh Jabin ju Israelrü miki khenoabahjih.

²⁴Tüsho arünü Kanan kiulongthsüpuh ju müdükheakshihyi khiungde Israel mihtsürübo khah Jabin kiulongthsüpuh azhihde amüküpbe amüküpbe kam.