Read Yimchungru Naga Mah 5 Bible Online

Mah 5 - Yimchungru Naga bible

Mah 5

¹Ju nimung Debora tüsho Abinoam tsührü Barak anenü ha khün thsü: @SP ACE =

²Israel ching limberübonü abekhinü, mihtsürübonü mulongsahde nihbuh jih, ATUNGPUH shiang!

³Soang, O kiulongthsürübo; aniang, O yakzanshuhrübo; inü ATUNGPUH ki khün thsübah, inü ATUNGPUH , Israel Thrünpuh kilim khün düsheak thsübah.

⁴O ATUNGPUH , nü küyimki Seir chingnü wukhiukkhea, nü küyimki Edom lo chingnü atsahkhitkhea, alomi ajan, thüningbonü bukkhi, amobonü ke bukkhi. @SP ACE =

⁵ATUNGPUH miki müzüngbo ajan, ju Sinai, ATUNGPUH Israel Thrünpuh miki.

⁶Anath tsührü, Shamgar nimungbo ching limtobo ching mütsahdebah tüsho hantsahrübonü limkeanganubo chingnü tsah.

⁷Israel kiutobo bahyuka lado, I Debora; I Israel berü nangde marüyi khiungde arü akeangkeang lakheah,

⁸küyimki thrünpuhbo aso mokhitkhea, ripitbo ki thirithsü arü, tüsho Israel ching chithürü yirü bolung tsung yungsho thsüh khülang she müngü.

⁹I mulong ju mihtsürü bolung shuhmülanga jihrü Israel yakzanshuhrü lung lah. ATUNGPUH shiang!

¹⁰Ha thaang, nüsa sherü donki amüyebo kheak binla, nüsa sherü alarü pheak kheak binla tüsho nüsa sherü limro ching tsahcho.

¹¹Aniang! kekhipbo mühide alanaji botonü, Israel mihtsürü akuk ngükhi, ATUNGPUH akuk ngükhibo thachoh! @SP ACE = Judüki ATUNGPUH mihtsürübonü kiuto chipi lim yüki.

¹²Wusuang, wusuang, Debora! Wusuang, wusuang, khün thsang! Asürang Barak, nü yo aramrübo bede tsoang, O Abinoam tsührü.

¹³Judüki aninga larü arü limberübo azhihde aki; wuto azhihde ATUNGPUH I thsungkheaknü aki.

¹⁴Amalek ching aying lakhi Ephraim chingnü khürü arü; nü ruyanrü bolung Benjamin lakheah. Makir chingnü wühkenorübo, Zebulun chingnü limthorü tso hanrü aki.

¹⁵Issakar yakzanshuhrübo Debora lung lakheah; am, Barak lung Issakar lakheah, api dunglim jindükhün ching nanachihde yüzah. Reuben chamnakkhi bolung tode mulong ajamachihkhi lakheah.

¹⁶Nü tümü thsükhi mihnu jikhi anide mihnu bolung binkhea? Reuben chamnakkhi bolung tode mulong ajamachihkhi lakheah.

¹⁷Gilead a Jordan hobah la; tüsho tümüde Dannü sangkungbo lung lakhea? Ashernü ke mungyean api keampung judü lang bin.

¹⁸Zebulun mihtsürübonü arü rhangdung ashepü ching jihdo; Naphtali she mükeak wung ching jude thsüdo. @SP ACE =

¹⁹Kiulongthsürübo arübah keochih; Kanan kiulongthsürübonü Megiddo keyean Taanak ching keochih tüshe arünü ayankhikhi kukruk, shotoyinchi tümü mulu.

²⁰Thüningbo ching chiningbonü keochih, arünü arü limrobo chingnü Sisera azhihde keochih.

²¹Kishon düchinü arü zünde tsodo, jipü Kishon yung. Tsahang, I me; sühmüh lade! @SP ACE =

²²Judüki khorabo arü biuobonü akhün khungde jukde yü.

²³Meroz athruang, ATUNGPUH yunirünü tha, ju ching larü khühde athruang, tümütüsho arünü ATUNGPUH rungde wuto azhihde keochihpü marü.

²⁴Khide kuhi atsü liberü ju Jael ah, Kenrü Heber niube — khimyambo ching lakhi khide kuhi atsü liberü ah.

²⁵Siseranü ke kheang, tüshe anihbenü api kilim niuhke jih; alibenü phurusük atsü chingnü api kilim niuhke kingkung handarü jih.

²⁶Alibenü khimyam müzam akhah khülang ching, rhimorü yümlung thripkhüh ching zhim; alibenü Sisera lak tüsho akuro züthünak; alibenü api ku chingnü chinkhitshih.

²⁷Ajing kheak api keam,api lungabah; ju ching api yap. Ajing kheak api keam, api lungabah; api küching keamkhea, ju ching api sheabah. @SP ACE =

²⁸Sisera abenü ayinripit chingnü abinkhita kheah; alibenü yakdokhi rhü dunglimnü zhi, “ Tümüde api khora-lolungbe arüpü khide ashucho? Tümüde api khorabo nahnah alode marü le?”

²⁹Alibe yo lümlung larü anünürübonü anihbe ki alo, am, aküdah thsüde alolo,

³⁰“ Arübo ayankhikhi kukruk ngüa chamchoh yung de? Athrürü aban anünürü khülang yungsho mahne; Sisera thsungkheak ayankhikhi atsüdak khimmihbo, kiulongthsübe hung ching yukpü züt-thsükhi kukrukbo.” @SP ACE =

³¹Jumonü nü riri alala dükheakshang, O ATUNGPUH ! Tüshe nü muzhorü a ani müzhakde akhiukchoki nangde lashang. Judüki lomi ju kam yirü thsungkheak mungtsü la.