Read Yimchungru Naga Mah 6 Bible Online

Mah 6 - Yimchungru Naga bible

Mah 6

¹Israel mihtsürünü ATUNGPUH miki amütsü rhimo; tüsho ATUNGPUHNÜ arübo kam thüne Midiarü khah ching jih.

²Tüsho Midiarünü Israel kuk; tüsho Midiarü dünkheaknü Israel mihtsürünü arü jikpung awungbo, lungkhünbo tüsho chipibo ching thsü.

³Küyimki Israelrü mükheande alakhea, Midiarü le Amalekrü tüsho aniakhiuklim mihtsürünü atubah arü yan;

⁴arünü arü azhihde binde arü tüsho phünirü Gaza khiungde lomi chingnü akhiukkhi thsümünimjih, tüsho Israel ching rhangdung lakhi, namfimihnu, moshipung yungsho donki tümü she maningshih.

⁵Tümüde arünü arü shiwühbo tüsho khimyambo lubah tangkhobo nangde chitthulungbah atu; tüsho arü le kemelbo mükhebin; junangde arü azahchoki alo ju thsümünimjih.

⁶Tüsho Midiarü hode Israel khide akheamkhibe kamshih; tüsho Israel mihtsürünü ATUNGPUH ki arung thsungkheak zhi.

⁷Küyimki Israel mihtsürünü Midiarü dünkheaknü ATUNGPUH ki zhikhea,

⁸ATUNGPUHNÜ Israel mihtsürü kilim wukihrü khülang thiyi; tüsho apinü arü ki tha, “ATUNGPUH Israel Thrünpuhnü ha thachoh: Inü nüsa Ijip lomi azhorü kuhi chingnü bekhit;

⁹tüsho inü nüsa Ijiprü le nüsa junorü khah chingnü bekhit, tüsho nüsa müngüh arü yanabah, tüsho nüsa kilim arü lo jih;

¹⁰tüsho inü nüsa ki tha, ‘I ATUNGPUH nüsa Thrünpuh; nüsanü nüsa lakhi lo ching Amorrü thrünpuhbo ki wüntre müjihbeah.’ Tüshe nüsanü I yu mani.”

¹¹Kheakü ATUNGPUH yunirü Ophra ching arü tüsho Abiezerrü Joash yo thülamdung khüp bin. Api tsührü Gideon yukhu-nitpung ching wheat hi nitde alakheah, junangde Midiarü kheaknü jik.

¹²ATUNGPUH yunirü api ki akhiuk tüsho anihbuh ki tha, “Nü amürang tüsho athrungrü mihtsürü, ATUNGPUH nü lung lah.”

¹³Tüsho Gideonnü api ki tha, “O I tungpuh, ATUNGPUH isa lung lasho, küde thsah hadürü isa kheak dünjikhea? Tüsho api amüyinsahbebo alala küching la, küpü isa bebuhrübonü isa ki tha, ‘ATUNGPUHNÜ isa Ijip chingnü bede atukhi yung de?’ Tüshe kheakü ATUNGPUHNÜ isa bahyuk tüsho Midiarü khah ching jih.”

¹⁴Judüki ATUNGPUHNÜ api kilim rholo tüsho tha, “ Ha nü sühmüh chingnü yüang, tüsho nünü Israel ju Midiarü khah chingnü khümkhitbah. Inü nü thiyikhi yung de?”

¹⁵Jumonü anihbuhnü api ki tha, “I tungpuh, küde thsah inü Israel khümkhitpü? Manase ching I guk anükbe ah, tüsho I buh yamkhün ching I aninibe ah.”

¹⁶Tüsho ATUNGPUHNÜ api ki tha, “ Tsükjide I nü lung labah, tüsho nünü Midiarü mihtsürü khülang nangde akukbah.”

¹⁷Judüki anihbuhnü api ki tha, “Nü miki I muzhoa lasho, nünü I ki thakhi amütsan khülang huhang.

¹⁸Inü tamkhüntamnüchoh, I nü ki arübah I yo kingaün yihkhita nü miki müjihyi khiungde ha chingnü düchamachih.” Tüsho apinü tha, “Nü alodarü khiungde inü aleangbah.”

¹⁹Judüki Gideonnü yüzahbah mihnu nunu khülang thsakham tüsho ayikangkang khahngak 10 lubah phaüm muyukkhi yikhap thsakham. Apinü shih ju muluk khülang ching yuk, tüsho shihkelam ju phüh ching yuk; tüsho apinü jurü thülamdung khüp api kilim handarü tüsho jih.

²⁰ATUNGPUH yunirünü api ki tha, “Shih le phaüm muyukkhi yikhap luang tüsho ha lungto kheak yihkih-a zobah shihkelam bukkihang.” Tüsho apinü jude thsü.

²¹Judüki ATUNGPUH yunirünü akhah ching shuhkhi tso mulonü shih le phaüm muyukkhi yikhap qiu; tüsho lungto chingnü mo akhiukbah shih le phaüm muyukkhi yikhap aniuabah. Tüsho ATUNGPUH yunirü api mikinü müladebah.

²²Kheakü api ju ATUNGPUH yunirü thsüa lah de Gideonnü anikhit. Jumonü Gideonnü tha, “ Aha, O I Tungpuh T HRÜNPU H ! Tümüde inü ATUNGPUH yunirü mironü miro ngüdo.”

²³Judüki ATUNGPUHNÜ api ki tha, “Nü lung mungtsü laang; dütre, nü müshe.”

²⁴Jumonü Gideonnü ju ching ATUNGPUH kilim kingaün sadam khülang thsü, tüsho ju ki, “ATUNGPUH ju mungtsü” de ji. Khihni khiungde ha Abiezerrü yo Ophra ching lah.

²⁵Ju tsüngre ATUNGPUHNÜ api ki tha, “Nü buh moshipung tüsho mahnepü moshipung kam thüne thsükhi luang, tüsho nü buh yo Baal kingaün sadam lukkheamang, tüsho ju ki sangthsü kiukheamang;

²⁶tüsho ha lungto mi kheak tsüde tsanglungbah ATUNGPUH nü Thrünpuh kilim kingaün sadam khülang thsüang, tüsho mahnepü moshipung lubah nünü sangthsü kiukheamkhi sangnü ATUNGPUH kilim laksah-a taka kingaünkhi jihang.”

²⁷Jumonü Gideonnü api yamlarü bolungnü mihtsürü 10 bebah ATUNGPUHNÜ api ki thakhi nangde thsü. Tütüshe apinü animung rhimopü abuh yamkhün tüsho kiuto mihtsürü khide atremonü azhing ching rhimo.

²⁸Tüsho küyimki kiuto mihtsürübo yapsu mükikde asürükhea, Baal kingaün sadam lukkheama lakheah; tüsho ju ki sangthsü she kiukheama lakheah, tüsho thsüa lakhi kingaün sadam kheak mahnepü moshipung kingaüna lakheah.

²⁹Jumonü arü khülangnü khülang ki tha, “Shenü ha rhimokhea?” Arünü keokhikeora tüsho tha, “ Joash tsührü Gideonnü ha rhimoa lah.”

³⁰Judüki kiuto mihtsürübonü Joash ki tha, “Nü tsührü bede akhiukang, api ashebah, tümütüsho apinü Baal kingaün sadam lukkheam tüsho ju ki lakhi sangthsü kiumülün.”

³¹Tüsho Joashnü api azhihde azhiprü alala ki tha, “Nüsanü Baal thsungkheak mürangba de? Nüsanü api khümkhitpü? Shepünü api thsungkheak mürangbanü yapsu sheshang! Api thrünpuh khülang a sho, anihbuh küdah thsüde tsungloshang, tümütüsho api kingaün sadam lukkheamdo!”

³²Jumonü ju nimungnü Gideon ju Jerubbaal de ji, tümütüsho Joashnü tha, “Baalnü aküdah thsüde tsungloshang; api kingaün sadam lukkheamdo.”

³³Judüki Midiarü tüsho Amalekrü, aniakhiuklim mihtsürü alala trüngmukhung; tüsho arünü Jordan hode yübah Jezreel jindükhün ching binkheam.

³⁴Tüshe ATUNGPUH me Gideon kheak arü; apinü hulipungpung müt, tüsho Abiezerrü api ki mukhungde arü.

³⁵Tüsho apinü yunithsürübo Manase alala ching yüshih. Apinü yunithsürübo Asher, Zebulun tüsho Naphtali ching she yüshih; junangde arünü arü shorupü wutu.

³⁶Judüki Gideonnü Thrünpuh ki tha, “Nünü athakhi nangde I khah hode nünü Israel khümkhitbasho —

³⁷kheahang, inü rhimopung kheak shihnam khim khima zobah; ayinke ju shihnam khim kheak lang labah alo alala akung thsüsho, nünü athakhi nangde I khah hode nünü Israel khümkhitbah de inü mükheahbah.”

³⁸Tüsho junangde alakheah. Küyimki api ashido yapsu mükikde asürükhea tüsho shihnam khim rukhühnü thsüna kheahkhea, apinü shihnam khim chingnü phurusük 1 mide ke thsünkhit.

³⁹Judüki Gideonnü Thrünpuh ki tha, “I kheak bukdakhiuk, tüsho inü khülang ki thaanü: Inü tamkhüntamnüchoh, khülang ki shihnam khim kheak inü rükakheahanü; kheakü shihnam khim kheak lang kungshang, tüshe alo kheak ayinke lashang.”

⁴⁰Tüsho junangde Thrünpuhnü ju tsüngre rhimo. Shihnam khim kheak lang akung lakheah, tüshe alo alala kheak ayinke lakheah.