Read Yimchungru Naga Mah 7 Bible Online

Mah 7 - Yimchungru Naga bible

Mah 7

¹Judüki Jerubbaal (ju Gideon) tüsho api lung lakhi mihtsürü alala mükikde asürü tüsho Harod kenü ki binkheam. Midiarü binkheampung ju dukulim jindükhün ching More wung phünide alakheah.

²ATUNGPUHNÜ Gideon ki tha, “I thsungkheaknü Midiarü arü khah ching jihpü thsüde nü mihtsürü khide hihlah. Junangde anihbe sühmühnü api khümkhitkheah de Israelnü I azhihde mükükheang,

³kheakü mihtsürübo ki zhia mükheahshang, ‘ Khürü trede ajansho rholode Gilead wung bahbah tsoang.’” Jumonü mihtsürü 22,000 alode tsobah 10,000 aninglo.

⁴Tüshe ATUNGPUHNÜ Gideon ki tha, “ Kheaküshe mihtsürü khide hihlah. Arübo ke ching bede yükiang, tüsho inü nü thsungkheaknü ju ching arü rükakheahbah. ‘ Ha nü lung yübah,’ de inü thasho, api ayübah; tüshe ‘ Ha nü lung müyü,’ de inü thasho, api müyü.”

⁵Jumonü apinü mihtsürübo ke ching bede yüki. Tüsho ATUNGPUHNÜ Gideon ki tha, “ Mukhuknü khukningbah khihnu ruk mulonü ke müleaka yungrü büthsüang.”

⁶Mihtsürü 300nü arü khahnü khipa mün ching yuk. Aningkhi alalanü ayungpü khukning.

⁷ATUNGPUHNÜ Gideon ki tha, “ Khahnü khipa yungrü mihtsürü 300 hode inü nü khümkhitbah tüsho nü khah ching Midiarü jihbah. Mihtsürü püpürü alala nihbuh lapung lim tsoshang.”

⁸Jumonü Gideonnü aningkhi Israelrü nihbuh khimyambo ching thiyia yüshih, tüshe ahiuhakhiprü tüsho hulipungpung shuhrü 300 zolo; tüsho Midiarü binkheampung ju abolim jindükhün ching lakheah.

⁹Ju tsüngre ATUNGPUHNÜ api ki tha, “ Asürang, binkheampung azhihde yükiang; tümüde inü ju nü khah ching jihdo.

¹⁰Tüshe nünü ayükipü tresho, nü yamlabuh Pura bebah yükiang;

¹¹tüsho arünü tümü thabanü nünü asobah, tüsho ju dunglim binkheampung azhihde yükipü nü khahbo düküngbah.” Jumonü apinü ayamlabuh Pura ane binkheampung ching lakhi bonungrü mühümpung ching yü.

¹²Tüsho Midiarü le Amalekrü tüsho aniakhiuklim mihtsürü alala tangkhobo nangde hihdakde jindükhün ching bin; arü kemelbo ju keyean loyi nangde mükhebinbe lakheah.

¹³Küyimki Gideon arükhea, mihtsürü khülangnü amüyamrü ki milim khülang kheande alakheah, “ Kheahang, inü milim khülang mido; barli yikhap ju Midiarü binkheampung ching lungde yüzah, tüsho khimyam kheak yükihbah ju kheak kinga lungshih tüsho keama chitphülapa yap.”

¹⁴Tüsho amüyambuhnü alo, “ Ha Joash tsührü, Israel mihtsürü Gideon nukshang labah; Thrünpuhnü api khah ching Midiarü tüsho bonungrü alala jihdo.”

¹⁵Küyimki Gideonnü milim kheankhi tüsho thanakkhi sokhea, apinü kingaün; tüsho apinü Israel binkheampung ching rholode yü, tüsho tha, “ Asürang; tümüde ATUNGPUHNÜ Midia bonungrü nüsa khah ching jihdo.”

¹⁶Tüsho apinü mihtsürü 300 ju khunung mahsam thsüde chamjih tüsho arü khah ching hulipungpung le pangjiphüh akeangkeangbo ching tsünthsahbebo zahde yukjih.

¹⁷Tüsho apinü arü ki tha, “I kilim kheahang, tüsho junangde thsü; küyimki I binkheampung ki arübanü inü athsükhi ruk thsang.

¹⁸Küyimki I tüsho I lung lakhi alalanü hulipungpung mütbanü, binkheampung thrip aban chingnü mütang, tüsho ahoang, ‘ATUNGPUH thsungkheak tüsho Gideon thsungkheak.’ ”

¹⁹Jumonü Gideon tüsho api lung mihtsürü 100 ju arü aheangrü müthriachih yanalünde, tsüngphulung müngüh binkheampung khiungde arü. Arünü hulipungpungbo müt tüsho arü khah ching shuhkhi pangjiphühbo yihrüp.

²⁰Judüki khunung mahsamnü hulipungpung müt tüsho pangjiphüh ju yihrüp. Arü khah huzulimnü tsünthsahbe shuh tüsho tsülimnü hulipungpung shuhbah arünü aho, “ATUNGPUH tüsho Gideon thsungkheak nukshang!”

²¹Mihtsürü abannü binkheampung alala mükamde nihbuh dangpung ching zhipchoki, Midiarü alala khungde alihde tso.

²²Küyimki 300nü hulipungpung mütkhea, ATUNGPUHNÜ mihtsürübo nukshang ju nihbuh müyamrü kheak dünkihachihshih. Arünü Tabbath phüni Abel kiuto Mehola khiungde, Beth-shitta khiungde Zarethan lim alihde tso.

²³Tüsho Israel mihtsürü Naphtali, Asher, tüsho Manase alala chingnü trüngmukhung tüsho Midiarü yande müsham.

²⁴Judüki Gideonnü Ephraim awung lomi alala ching yunithsürü thiyia yüshih, “ Midiarü azhihde akiang tüsho Beth-bara le Jordan kebo khiungde kapdoang.” Jumonü Ephraim mihtsürü alala jikhit, tüsho Beth-bara le Jordan khiungde kebo kapdo.

²⁵Tüsho arünü Midia limberü mahne Oreb tüsho Zeeb lu; arünü Midiarü yanchoki, Oreb lungto kheaknü Oreb laksah, tüsho Zeeb yukhu-nitpung kheaknü Zeeb laksah; tüsho arünü Oreb le Zeeb kubo Jordan hode Gideon kilim lubah arü.