Read Yimchungru Naga Mah 8 Bible Online

Mah 8 - Yimchungru Naga bible

Mah 8

¹Tüsho Ephraim mihtsürübonü api ki tha, “ Tümü thsükhi nü Midiarü bede keochihpü yüchoki isa müjide isa kheak hade arhimokhea?” Tüsho arünü thsokihde api müneah.

²Jumonü apinü arü ki tha, “Inü nüsa kheak akede tümü rhimoa la? Ephraimnü kurungaso müdre mokhi ju Abiezernü kurungaso yimlukhi kheaknü atsübe yung de?

³Thrünpuhnü Midia limberübo, Oreb tüsho Zeeb nüsa khah ching jihdo; inü nüsa kheak akede tümü rhimokhuka la?” Apinü ha thachoki anihbuh azhihde arü bukakhiukkhi keamlo.

⁴Tüsho Gideon le api lung mihtsürü 300 keaka lalashe müshamde Jordan ching arü tüsho hode yü.

⁵Jumonü apinü Sukkoth mihtsürübo ki tha, “ Muzhobah I lung arürü kilim yikhap jihang, tümüde arü keaka lah, tüsho I Midia kiulongthsürü Zeba tüsho Zalmunna müshamchoh.”

⁶Tüsho Sukkoth limberübonü tha, “Zeba le Zalmunna lah de isanü nü yo bonungrü kilim yikhap jihpü?”

⁷Jumonü Gideonnü tha, “ Ha dünkheaknü, küyimki ATUNGPUHNÜ Zeba tüsho Zalmunna I khah ching jihbanü, sunglo yangbo tüsho khingphubonü nüsa shihtsü wuhkhitbah!”

⁸Tüsho ju chingnü api Penuel ching wutu tüsho ju ruk lang arü ki tha; tüsho Sukkoth mihtsürübonü alokhi nangde Penuel mihtsürübonü api ki alo.

⁹Tüsho apinü Penuel mihtsürübo ki tha, “ Küyimki I akuk ngübah arübanü, inü ha aheangsadam lukkheambah.”

¹⁰Kheakü Zeba tüsho Zalmunna, aniakhiuklim bonungrü aningkhi alala, mihtsürü 15,000 bande bebah Karkor ching lakheah; tümüde bonungrü 120,000 laksahdo.

¹¹Gideonnü Noba tüsho Jogbeha aniakhiuklim loshelo limronü wutu, tüsho bonungrü zündo; tümüde aheangrü mülade alakheah.

¹²Tüsho Zeba le Zalmunna büne shande tso; apinü Midia kiulongthsürü mahne Zeba tüsho Zalmunna yande müshambah lu, tüsho apinü bonungrü alala tsomüzütshih.

¹³Judüki Joash tsührü Gideonnü thirithsü chingnü rholobah Heres limronü arü.

¹⁴Tüsho apinü Sukkoth athrününgtsüng khülang tholobah api ki keokhi; tüsho apinü anihbuh kilim Sukkoth atorübo le azothsürübo mihtsürü 77 thrüta jih.

¹⁵Apinü Sukkoth mihtsürübo kilim arü tüsho tha, “ Kheahang Zeba tüsho Zalmunna, sherü dünkheak nüsanü I münejihde tha, ‘Zeba tüsho Zalmunna nü khah ching lah de isanü nü mihtsürü keaka larü kilim yikhap jihpü?’”

¹⁶Apinü kiuto azothsürübo bea lu tüsho sunglo ayang tüsho khingphubonü Sukkoth mihtsürü ki amütsan thsangyu.

¹⁷Tüsho apinü Penuel aheangsadam lukkheam tüsho kiuto mihtsürübo laksah.

¹⁸Judüki apinü Zeba tüsho Zalmunna ki tha, “Nüsanü Tabor ching laksahkhi mihtsürübo küruk a?” Anenü alo, “ Arübo nü ruk lakheah; arübo kiulongthsürü tsührübo kiphahde alakheah.”

¹⁹Tüsho apinü tha, “ Arübo I be tsührü I keoniorü ah; ATUNGPUH lale, nünü arü rhangdung khümkhita lashihkhülaa, inü nüke mülaksah.”

²⁰Apinü atsührü adüjibuh Jether ki tha, “Wusuang, tüsho ane laksahang.” Tüshe Jethernü anukshang mudukkhit, tümütüsho api azürü thsükhinü trede alakheah.

²¹Judüki Zeba tüsho Zalmunnanü tha, “ Arang, nünü ike laksahang; tümüde athrürü khülangnü nihbuh rhimo rhimochoh.” Jumonü Gideonnü wusu tüsho Zeba le Zalmunna büne laksah; tüsho apinü ane yo kemel hung kheaknü zülubo lu.

²²Israel mihtsürübonü Gideon ki tha, “Nü le nü tsührü tüsho nü tsührü-tsührünü she isa kurungkheak yakzan shuhang; tümüde nünü isa Midiarü khah chingnü bekhitdo.”

²³Gideonnü arü ki tha, “I tüsho I tsührünü nüsa kurungkheak yakzan mushuh; ATUNGPUHNÜ nüsa kurungkheak yakzan shuhbah.”

²⁴Tüsho Gideonnü arü ki tha, “Inü nüsa ki khülang mushuanü; nüsanü ayankhikhi shihcham chingnü I kilim mihbüm abannü suna nüpü jihang.” ( Arübo suna nüpübo lakheah, tümütüsho arübo Ishmaelrü lakheah.)

²⁵Tüsho arünü alo, “Isanü künsahde jurübo jihbah.” Arünü khim khima zo, tüsho mihtsürü abannü arünü ayankhikhi nüpübo ju ching yuk.

²⁶Gideonnü aleangkhikhi suna nüpübo ju khahngak 20 bande alakheah, tüsho ha ching zülubo, lakbo, Midia kiulongthsürübonü ayihkhi mürümmuchu khimbo, tüsho arü kemelbo hung kheak mükamkhi lakbo mübe.

²⁷Gideonnü sunanü sangthsü khülang thsüa api lapung kiuto, Ophra ching zo. Israel alalanü Thrünpuh bahyuk tüsho yübah sangthsü kingaün. Gideon tüsho api yamkhün thsungkheaknü ju qimürip kamabah.

²⁸Hanangde Midiarü ju Israelrü miki junoa lakheah, tüsho arü ku mudukolokhuk. Gideon nimungbo ching kam yirü lomi ching mungtsü lakheah.

²⁹Judüki Joash tsührü Jerubbaal yübah nihbuh yam ching la.

³⁰Gideon tsührü athrürü 70 lakheah, tümüde api niuberü ahihdo lakheah.

³¹Tüsho api hanniube Shekem ching labenü she api kilim tsührü 1 zübejih, amung Abimelek lakheah.

³²Kheakü Joash tsührü Gideon zobanbah she, tüsho Abiezerrü kiuto Ophra ching, abuh Joash kiuyuk ching bah.

³³Tüsho Gideon she yanalünde Israelrünü Baalbo kingaün, tüsho Baal-berith ju arü thrünpuh kamshih.

³⁴Junangde Israelrünü amühi aban arü riri khah chingnü arü bekhitbuh arü Thrünpuh, ATUNGPUH mülümkhit;

³⁵tüsho apinü Israel thsungkheak atsü rhimokhi yande arünü Jerubbaal (ju Gideon) yamkhün kheak amuzho muhuh.