Read Yimchungru Naga Mah 9 Bible Online

Mah 9 - Yimchungru Naga bible

Mah 9

¹Kheakü Jerubbaal tsührü Abimelek ju abe keoniorü kilim yü tüsho abe guk yamkhün alala ki tha,

²“Shekem mihtsürü alala ki keoang, ‘ Jerubbaal tsührü 70 alalanü nüsa kurungkheak yakzan shuhshihnela shi, dashi khülangnü lang nüsa kurungkheak yakzan shuhshihnela?’ Kheaküshe I nüsa shih tüsho thiyih de lümkhitang.”

³Tüsho abe keoniorübonü harü yubo alala Shekem mihtsürübonü sode api dünkheaknü tha; tüsho Abimelek yanpü arü mulong pungkhi, tümüde arünü tha, “ Api isa keoniorü ah.”

⁴Arünü api kilim Baal-berith arüngyam chingnü shotoyinchi 70 jih, junü Abimeleknü api jingyanrü thsüshihpü mudukmükerübo muloa lu.

⁵Tüsho apinü Ophra ching abuh yam ching yü, tüsho Jerubbaal tsührü 70 api keoniorübo ju lung khülang kheaknü laksah; tüshe Jerubbaal tsührü akheambuh Jotham aning, tümüde apinü jikabah.

⁶Shekem mihtsürübo tüsho Beth-millo alala mukhungde arü, tüsho arünü Shekem ching thülamdung kinü Abimelek ju kiulongthsüpuh kamshih.

⁷Küyimki ha Jotham ki thakhea, apinü yübah Gerizim wung kheak zhip, tüsho achangnü zhide arü ki tha, “I ki aniang, nüsa Shekem mihtsürübo, junangde Thrünpuhnü nüsa ki anibah.

⁸Kim khülang ching sangdungbonü arü kurungkheak kiulongthsürü mujude-mokhitpü yü; tüsho arünü oliv sangdung ki tha, ‘Isa kurungkheak kiulongthsüang.’

⁹Tüshe oliv sangdungnü arü ki tha, ‘Inü thrünpuhbo tüsho mihtsürübo wüntreshihkhi amüdang bahbah sangdungbo kurungkheak yakzan shuhpü yüba shi?’

¹⁰Tüsho sangdungbonü khubasodung ki tha, ‘Nü arang, tüsho isa kurungkheak kiulongthsüang.’

¹¹Tüshe khubasodungnü arü ki tha, ‘Inü aniung tüsho sangaso atsü bahbah sangdungbo kurungkheak yakzan shuhpü yüba shi?’

¹²Tüsho sangdungbonü kurungasoliu ki tha, ‘Nü arang, tüsho isa kurungkheak kiulongthsüang.’

¹³Tüshe kurungasoliunü arü ki tha, ‘ Thrünpuhbo tüsho mihtsürübo asühshihkhi I yukhu bahbah inü sangdungbo kurungkheak yakzan shuhpü yüba shi?’

¹⁴Judüki sangdungbo alalanü ayangrung ki tha, ‘Nü arang, tüsho isa kurungkheak kiulongthsüang.’

¹⁵Tüsho ayangrungnü sangdungbo ki tha, ‘Nüsanü atsütsünü I nüsa kurungkheak kiulongthsürü thsüshihbasho, arübah I khüp alamang; jude yungsho, I yang khahbo chingnü mo akhiukbah tüsho Lebanon cedarbo aniubah.’

¹⁶“Kheakü jumonü, nüsanü thiyuronü tüsho kurhangde Abimelek kiulongthsürü kamshihdüsho, tüsho api thülünkhinü Jerubbaal tüsho ayamkhün kheak tsüde rhimodüsho —

¹⁷tümüde I buhnü nüsa thsungkheak keochihdo, tüsho api rhangdung jih, tüsho Midiarü khah chingnü nüsa bekhit;

¹⁸tüshe nüsanü khihni I buh yamkhün azhihde wusudo, tüsho atsührü 70 lung khülang kheaknü laksah, tüsho api yamlaberü tsührü Abimelek, api nüsa akeoniorü thsümonü Shekem mihtsürübo kurungkheak kiulongthsürü kamshih —

¹⁹jumonü nüsanü khihni Jerubbaal tüsho api yamkhün kheak thiyuro tüsho wüntre lade rhimoa lasho, Abimelek lung asühang shi, tüsho Abimeleknü she nüsa asühachihshang shi;

²⁰tüshe jude yungsho, Abimelek kheaknü mo akhiukshang tüsho Shekem le Bethmillo mihtsürübo aniuabahshang; tüsho Shekem le Beth-millo mihtsürü kheaknü mo akhiukshang tüsho Abimelek aniuabahshang.”

²¹Tüsho Jothamnü akeoniorü Abimelek tremonü tsode yünü Beer ching la.

²²Abimeleknü Israel kurungkheak kam mahsam kiulongthsü.

²³Tüsho Thrünpuhnü Abimelek le Shekem mihtsürübo dükeak amütsü me khülang yüshih; tüsho Shekem mihtsürübonü Abimelek kheak mülapyukde rhimo;

²⁴hanangde Abimelek tüsho api tuthsuka Gideon tsührü 70 laksahshihkhi Shekem mihtsürübo kheak royimpü lakheah.

²⁵Tüsho Shekem mihtsürübonü api azhihde awung mujuk kheak mihtsürübo jimde binshihbah limro ching hantsahrü alala kheak jangkhijangra; tüsho ju Abimelek ki tha.

²⁶Ebed tsührü Gaalnü akeoniorübo bebah Shekem ching yü; tüsho Shekem mihtsürübonü api kheak mulonglam la.

²⁷Tüsho arünü thulu ching yübah kurungasolubo chingnü kurungasobo rho tüsho yukhu thsübah thünio la, tüsho arü thrünpuh yam ching yüzahbah tsühyungde Abimelek athruaji.

²⁸Ebed tsührü Gaalnü tha, “ Abimelek ju she a tüsho isanü api tankihpü thsüde isa Shekemrü she a? Jerubbaal tsührü tüsho api yo atorü Zebulnü Shekem abuh Hamor mihtsürü tankihkhi yung de? Dale küde thsah isanü api tankihpü?

²⁹Ha mihtsürübo I khah ching lakhülaa inü Abimelek yankhita bahbah. Inü api ki thabah, ‘Nü yo bonungrü hihde kambah akhiukang.’ ”

³⁰Küyimki kiuto yakzanshuhrü Zebulnü Ebed tsührü Gaal yubo sokhea, api bukakhiuk.

³¹Tüsho apinü Aruma ching Abimelek kilim yunithsürü thiyia yüshih, “ Kheahang, Ebed tsührü Gaal tüsho api keoniorübo Shekem ching arüa lah, tüsho nü azhihde arünü kiuto neamneamjihchoh.

³²Kheakü jumonü, nü lung nü mihtsürübo azhing ching yüang tüsho thulu ching jika aleangde binang.

³³Jushu yapsu, ani akhiuk akede, nahde asürang tüsho kiuto lim nanachihang; tüsho küyimki api le api lung bekhi mihtsürübo nü azhihde akhiukbanü, nüsanü akukkhi thülün arü kheak rhimoang.”

³⁴Tüsho Abimelek le api lung mihtsürübo alala azhing chingnü asürü tüsho khunung phüyi thsübah Shekem azhihde aleangde bin.

³⁵Küyimki Ebed tsührü Gaal wukhiukbah kiuto chipiripit limro zhipkhea, Abimelek tüsho mihtsürübo aleangde abinkhi chingnü jukmusu.

³⁶Tüsho küyimki Gaalnü mihtsürübo ngükhea, apinü Zebul ki tha, “ Kheahang mihtsürübo awung mujukbo chingnü akichoh!” Tüshe Zebulnü api ki tha, “Nünü awung mebo ju mihtsürübo ah müdam ngüchoh.”

³⁷Jumonü Gaalnü alode tha, “ Kheahang, mihtsürübo lomi phulungnü akichoh, tüsho püpü khunung Müchitrü thülamdung limnü arüchoh.”

³⁸Judüki Zebulnü api ki tha, “ Atsütsü nü yu tode athakhi küching la, ‘Isanü api tankihpü thsüde Abimelek ju shepü a?’ Harü mihtsürü ha nünü ajunokhi yung de? Nünü lümsho wukhiukang, tüsho kheakü arü bede keochihang.”

³⁹Jumonü Gaalnü Shekem mihtsürübo bebah wukhiuk tüsho Abimelek bede keochih.

⁴⁰Tüsho Abimeleknü api yande müsham, tüsho anihbuh kheaknü api alihde tso; mihtsürü ahihdo kiuto ching yüzah limro khiungde yuria yap.

⁴¹Judüki Abimelek ju Aruma ching la tüsho Zebulnü Gaal le api keoniorübo Shekem ching mülapü thsüde yankhitabah.

⁴²Ashidopü Shekem mihtsürübo thulubo ching wukhiuk, tüsho ju Abimelek ki thiyusheak jih.

⁴³Jumonü apinü api mihtsürübo bea lubah khunung mahsam thsüde cham tüsho thulubo ching jimde binshih. Küyimki mihtsürübo kiuto chingnü akhiukkhi ngükhea, apinü arü yanpü jukmusu.

⁴⁴Judüki Abimelek tüsho api lung khunung khülang nanachihde khuhto ching yü tüsho kiuto chipiripit yüzah limro kheak zhip; tüsho khunung mahnenü thulubo ching larü alala kilim nanachihde yü tüsho arübo laksah.

⁴⁵Jumonü Abimeleknü ju nimung amuyung kiuto bede keochih; apinü kiuto ju lu tüsho ju ching lakhi mihtsürübo laksah; tüsho apinü kiuto thsümünim tüsho thimi suka zojih.

⁴⁶Kheakü küyimki Shekem aheangsadam mihtsürübonü ju sokhea, Berith thrünpuh arüngyam chipi ching yüzahabah.

⁴⁷Tüsho Shekem aheangsadam mihtsürübo alala rukhüh mukhunga lah de Abimelek ki tha.

⁴⁸Judüki Abimelek tüsho api lung mihtsürübo alala Zalmon Müzüng lim wutu. Tüsho Abimeleknü awü khülang akhah ching thrüa lubah sangdungbo chingnü akhah khülang ngamkhi, tüsho ju lua adubuh kheak yihkih; judüki apinü api lung larü ki tha, “Inü tümü thsüde nüsanü ngüdünü, niokheamang tüsho I ruk rhimoang.”

⁴⁹Jumonü mihtsürü abannü sangkhah ngamkhia lu tüsho Abimelek yande yübah chipi kheak rhungkih, tüsho arü kumung mo thsahkih junangde Shekem aheangsadam mihtsürü athrürü tüsho aliberü 1000 bande sheabah.

⁵⁰Judüki Abimeleknü Thebez lim yü tüsho ju zündobah yankhia lu.

⁵¹Tüshe kiuto ching aheangsadam amüküp khülang lakheah tüsho kiuto mihtsürü athrürü tüsho aliberü alala alihde yübah rihdoloabah; jushu arünü aheangsadam mujuk kheak yükih.

⁵²Jumonü Abimeleknü aheangsadam khiungde yübah keochih; tüsho apinü monü atakpü aheangsadam ripit ki yü.

⁵³Tüshe azoberü khürünü thsam khülang Abimelek ku kheak lah-a akishih tüsho akuro kingrüp.

⁵⁴Judüki apinü nahde api thsühnuk hanrü athrününgtsüng mihtsürü ki tha, “Nü nukshang dukkhitang tüsho I laksahang, jude yungsho mihtsürübonü athabah, ‘ Azoberü khülangnü api laksah-a lah.’” Jumonü api yo athrününgtsüngbuhnü api chinkhitde düchip tüsho sheabah.

⁵⁵Tüsho küyimki Israel mihtsürübonü Abimelek shea ngükhea, mihtsürü abannü müzütde nihbuh lapung ching yü.

⁵⁶Hanangde Abimeleknü mihbukmuyuk rhimokhi, api keoniorü 70 laksahde abuh azhihde arhimokhi Thrünpuhnü jihlo.

⁵⁷Tüsho Thrünpuhnü Shekem mihtsürü amütsü-rhimo alala arü ku kheak jihlo, tüsho Jerubbaal tsührü Jotham muthrumünean arü kheak arü.