Read Yimchungru Naga 3 Johan 1 Bible Online

3 Johan 1 - Yimchungru Naga bible

3 Johan 1

¹Azothsürü kilimnü, Thiyuro ching inü amuzhokhi müyambuh Gaius kilim.

²Amuzho müyambuh, nü alala tsüde alapü tüsho nü shihphü atsü thsungkheak inü tamkhüntamnüchoh; nü me tsüde lah de inü mükheahlah.

³Nü thiyuro ching düküngde alakhi tüsho thiyuro ching mutukzhakde atsahkhi dünkheak keoniorübo khürünü arübah athakhi I khide asühdo.

⁴I tsührübonü thiyuro ching tsahkhi sokhi kheak hode asühpü atobe müla.

⁵Amuzho müyambuh, nünü keoniorü Khristanrübo, adungto thsüde hanrübo ki rhimokhi khide thiyuro lah.

⁶Arünü nü muzho dünkheak borü ki thado. Thrünpuh tankihkhi ching ayekhi thsüde nünü arü hantsah ching tsüde thiyia yüshang.

⁷Tümüde arünü Khrista tankihpü ching tsahmusu tüsho amükinrü kheaknü tümü she müleangkhi.

⁸Jumonü isabo thiyuro ching rukhüh rhimorü thsüpü thsüde isanü hadürü mihtsürü rungbeah.

⁹Inü borü ki tümüanü thrütdo; tüsho akhuhpü mulongbuh Diotrephesnü inü athakhi manide alabah.

¹⁰Jumonü küyimki I arübanü, apinü isa azhihde amütsü yubo thakhi lahkhitbah. Ju kheaknü reangmükeamde apinü keoniorübo beyukpü reanglochoh. Apinü arü beyukpü mulongrü she tukloshihchoh tüsho borü chingnü yankhita bahchoh.

¹¹Amuzho müyambuh, amütsü dükheahkhi tüshe atsü kheahkhiang. Shepünü atsü rhimochonü Thrünpuh kilimnü ah; shepünü amütsü rhimochonü Thrünpuh müngü.

¹²Demetria a mihbüm abannü, tüsho thiyuronü thiyumütsan lah; inü she api thiyumütsan jihchoh, tüsho I yumütsan thiyuro ah de nünü mükheahlah.

¹³Inü nü kilim thrütpü hihde lah tüshe inü dosang tüsho dokenü müthrütnü;

¹⁴inü nahde nü shorupü mulonglam lah, tüsho ike mironü miro asukachihbah.

¹⁵Nü kilim mungtsü lashang. Müyamrübonü nü kilim salüm jihchoh. Müyamrübo alala aban kilim salüm jihang.