Read Yimchungru Naga Amikheakakhiukkhi 1 Bible Online

Amikheakakhiukkhi 1 - Yimchungru Naga bible

Amikheakakhiukkhi 1

¹Nahde adünjipü lakhi Thrünpuhnü api tankihrübo ki huhpü api kilim jihkhi Jisu Khrista amikheak akhiukkhi ah; tüsho apinü anihbuh yunirü api tankihrü Johan kilim yüshihde ju mükheahshih,

²apinü anihbuhnü angükhi alala ki Thrünpuh yu tüsho Jisu Khrista thiyumütsan thsü.

³Shepünü müchitkhi yubo achangnü khechonü asühpü, tüsho sherünü anicho, tüsho sherünü ju ching thrütkhi mihyuanichonü asühpü; tümüde kim thüninde lah.

⁴Johan kilimnü, Asia ching lakhi borü thüne kilim: Shepü la tüsho shepü lakhea tüsho shepü arüpü la, tüsho api kiulongthsü-binkiu miki lakhi me thüne kilimnü nüsa kilim amüthsüm tüsho mungtsü laang,

⁵tüsho thiyuro thiyumütsan thsübuh Jisu Khrista ashe chingnü arhang kamlokhi akhuhbuh, tüsho alomi ching kiulongthsürübo kurung yakzanshuhbuh kilimnü. Isa muzhobuh tüsho api thiyih hode isa neakbo chingnü isa zuzu kamshihkhi

⁶tüsho isa kiulongthsü tüsho amükeamrübo kamshihde, api Thrünpuh tüsho Abuh tankihpü lünnü lün müretah tüsho wu laang. Amen.

⁷Kheahang, api amobo chingnü arüchoh, tüsho mihbüm aban, api chinkhitshihkhi müknü api ngübah; tüsho alomi trükbo alalanü api dünkheak tüzhobah. Junangde alabah. Amen.

⁸Shepü la tüsho shepü lakhea tüsho shepü arüpü la, Atungpuh Thrünpuh, Wutonü thachoh, “I atankih tüsho akheam.”

⁹I Johan, nüsa keoniorü, shepünü Khrista ching nüsa lung thsümütsü, kiulongthsü tüsho arümkheamkhi chamachihchonü, Thrünpuh yu tüsho Jisu thiyumütsan dünkheak I Patmos kekung-lo kheak lakheah.

¹⁰I Atungpuh nimung Me ching lakheah, tüsho hulipungpung nangde düsheak achangnü I dunglim so,

¹¹hade tha, “Nünü tümü ngülanü hüm kheak thrütang tüsho borü thüne, Efisia, Symrna, Pergamum, Thyatira, Sardis, Philadelphia, tüsho Ladokia lim mühahang.”

¹²Judüki I ki asukkhi düsheak kheahpü inü rholo, tüsho suna tsünpung dubopung thüne ngü,

¹³tüsho tsünpung dubopung bolung mihtsürü tsührü nangde, shulünkhim müphü khiungde yih tüsho suna pangrümbenü atreang mükamde rüma lakheah;

¹⁴api ku tüsho api kuyü ju alamlam hing müye, phürüm müyekhi nangde alakheah; amükbo ju motru nangde,

¹⁵api jing ju aphezhingzhingkhi, mo chingnü atsangkhitkhi müwayinchi nangde, tüsho api düsheak ju kezho ahukkhi nangde alakheah;

¹⁶api khah tsülim apinü chining thüne shuh, amün chingnü nukshang khülang khülim khülim ahüyuk akhiuk, tüsho api miro ju ani müzhakde athsahkhi nangde alakheah.

¹⁷Küyimki inü api ngükhea, I ashekhi nangde api jing ki lunga yap. Tüshe api khah tsülimnü I kheak qiude tha, “Dütre, I atankih tüsho akheam,

¹⁸tüsho arhang labuh ah; I ashekheah, tüsho kheahang, lün thsungkheak lah, tüsho Ashe tüsho athsümüchi mükhipbebo inü zhimlah.

¹⁹Kheakü nünü tümü ngücho, tümü la tüsho ha dunglim tümü dünjipü lanü thrütang.

²⁰I khah tsülim nünü angükhi chining thüne tüsho suna tsünpung dubopung thüne lümsük: chining thüne ju borü thüne yo yunirübo tüsho tsünpung dubopung thüne ju borü thüne ah.