Read Yimchungru Naga Amikheakakhiukkhi 16 Bible Online

Amikheakakhiukkhi 16 - Yimchungru Naga bible

Amikheakakhiukkhi 16

¹Judüki arüngyam chingnü yunirü thüne ki düsheak achangnü athakhi inü so, “Yüang tüsho Thrünpuh bukakhiukkhi phurusük thüne ju alomi kheak bahang.”

²Jumonü akhuhbuh yunirünü yü tüsho api phurusük ju alomi kheak dunga bah, tüsho shiwüh areak hanrü tüsho ju mejak kingaünrü mihtsürü kheak amünean tüsho amütsü mübo akhiuk.

³Mahnepü yunirünü api phurusük keto ching dunga bah, ju mihtsürü shekhi thiyih nangde kam, tüsho keto ching rhangdung lakhi lüpdükhi sheabah.

⁴Mahsampü yunirünü api phurusük ayungbo le kenübo ching dunga bah, tüsho jurü thiyih kamabah.

⁵Tüsho ke yunirünü thade inü so, nü a harü mahkhapkhibo ching thiyuro lah, nü shepü la tüsho shepü alakhea, Amüsühbuh Khülang;

⁶tümüde mihtsürübonü amüsührü tüsho wukihrübo thiyih bukshihdo, tüsho nünü arü ki thiyih yungshih. Ha arünü athülünkhi ah!

⁷Tüsho kingaün sadam chingnü azhikhi inü so, “Am, Wuto Atungpuh Thrünpuh thiyuro tüsho nü mahkhapkhibo alungki lah!”

⁸Aphüyipü yunirünü api phurusük ani kheak dunga bah, tüsho monü mihtsürü takpü ju ki mülüa lakheah;

⁹mihtsürübo ju khide alamlamnü tak, tüsho arünü harü arümbo kurungkheak wu labuh Thrünpuh mung athru, arünü mulong mümüthri tüsho api kilim müremütah.

¹⁰Aphüngüpü yunirünü api phurusük shiwüh kiulongthsü-binkiu kheak dunga bah, tüsho ju kiulongthsü amiting ching lakheah; mihtsürübonü thsünükhi hode arü mulo mükap

¹¹tüsho arü thsünükhi tüsho mübo dünkheaknü yinmi Thrünpuh athru, tüsho arü rhimobo chingnü mümüthrilo.

¹²Athurukpü yunirünü api phurusük Euphra ayung kheak dunga bah, tüsho aniakhiuklim kiulongthsürübo limro thsakhampü ke ju ngahabah.

¹³Tüsho dragon mün chingnü, shiwüh mün chingnü tüsho arükchih wukihrü mün chingnü kheangbo nangde amünean mebo mahsam akhiukshihde inü ngü;

¹⁴tümüde arübo ju amünean mebo, khinthiyinbebo rhimode, khiungke lim alomiküp kiulongthsürübo kilim Wuto Thrünpuh nimung ato ching thirithsüpü arü bemukhungpü yüchoh.

¹⁵(“Kheahang, I ahührü nangde arüchoh! Shepü kurhangde la tüsho achih ngüde bünkeang mutsopü nihbuh khimmih zolanü müngühmühi!”)

¹⁶Tüsho arünü Ibri yu ching Armageddon de ajikhi dangpung ching arübo bemukhung.

¹⁷Athünepü yunirünü api phurusük apung ching dunga bah, tüsho arüngyam ching, kiulongthsübinkiu chingnü düsheak achangnü akhiukde tha, “Ha rhimodo!”

¹⁸Tüsho ju ching chinchobe phürapkhi, düsheakbo, tsüngmukbo, tüsho alomi kheak mihtsürü labah müdünjiakheahkhi muliuyuk khide ato lakheah.

¹⁹Ato kiuto ju mahsam thsüde chamnak, trükshih kiutobo lungabah, tüsho Thrünpuhnü api bukakhiukkhi pung mütrüna yungshihpü ato Babilon lümkhit.

²⁰Kekung-lo alala tsoabah, tüsho awungbo alala dükheakbah;

²¹tüsho arulung atobo, khahngak 50 bande thüning chingnü mihtsürü kheak keam. Tüsho arulung arüm dünkheaknü arünü Thrünpuh athru, tümütüsho aru ju khide atrebe lakheah.