Read Yimchungru Naga Amikheakakhiukkhi 17 Bible Online

Amikheakakhiukkhi 17 - Yimchungru Naga bible

Amikheakakhiukkhi 17

¹Yunirü thüne bolung khülang shepü phurusük thüne lakheanü arü tüsho I ki tha, “Arang, kebo ahihdo kheak binkhi müzammüramberü ato thsümüchikhi inü nü ki huhbah.

²Alomi kiulongthsürübonü anihbe kheak müzammüram yihbeak tüsho alomi ching larübo anihbe müzammüram yukhunü müshangshih.”

³Apinü I Me chingnü sunglo ching bede yü, tüsho aliberü khülang, athruaji mungbonü mide alakhi aneakrüm shiwüh kheak binde inü ngü, tüsho ju aku thüne tüsho ajuh thürü lakheah.

⁴Alibe ju mürümmuchu tüsho aneakrümnü züt thsü, suna tüsho shotolungbo le mürelungbonü lüpdo, anihbe khah ching athraneanbe tüsho anihbe müzammüram müneannü mide alakhi suna pung shuhde alakheah;

⁵tüsho anihbe ku kheak lümsük mung thrüta lakheah: “Ato Babilon, müzammüramrü tüsho alomi athraneanbo abe.”

⁶Tüsho alibe ju amüsührü thiyih tüsho Jisu dünkheaknü alaksahrü thiyihnü müshanga inü ngü. Küyimki inü alibe ngükheanü I khide müyinsah.

⁷Tüshe yunirünü I ki tha, “Tümüde müyinsahcho? Inü alibe, tüsho anihbe binkhi aku thüne tüsho ajuh thürü kihkhi lümsük nü ki thabah.

⁸Khülangki nünü angükhi shiwüh ju, kheaküa jude müla, tüsho alokhünbit chingnü akhiukbah anihbuh dükheakpung ching yübah. Alomi ching larübo alomiküp thrünbah rhangdung hüm ching mung thrüta mülarünü shiwüh ngüchoki amüyinsahbah, tümütüsho api khülangki lakhi, kheaküa jude müla, tüshe arülobah.

⁹Ha lümlung tüsho anikhitkhi thsungkheak lah: aku thüne ju alibe binde alakhi awung thüne ah;

¹⁰arü ju kiulongthsürü thüne she ah, phüngü lungdo, khülang lah, püpü khülang arüpü lah, tüsho küyimki api arübanü api anükhühkheak lang alabah.

¹¹Shiwüh küpü labah, kheakü mülade lanü ju kiulongthsürü atizheahpü ah. Api thüne ching ju belah tüsho api dükheakpung ching yüchoh.

¹²Tüsho nünü angükhi ajuh thürü ju kiulongthsü wu müleangkhiyikhi kiulongthsürü thürü ah, tüshe arübo shiwüh bolung rukhüh kimkhü 1 thsungkheak kiulongthsürübo thsüpü thiyukhüm-sühmüh leangkhibah.

¹³Arü lümkhi khülang thsülah tüsho arü wu le thiyukhüm-sühmüh shiwüh kilim jihbah;

¹⁴arünü Namfimihnunu bede thirithsübah, tüsho Namfimihnununü arü kukbah, tümüde api ju atungrübo kurungkheak Atungrü tüsho kiulongthsürübo kurungkheak Kiulongthsürü, tüsho api lung larü ju ajikhi, amokhitkhi tüsho thiyuro lakhi ah.”

¹⁵Tüsho apinü I ki tha, “Nünü angükhi kebo, müzammürambe binkhi ju, mihtsürübo, botobo, trükshihbo tüsho thiyuthabo ah.

¹⁶Tüsho nünü angükhi ajuh thürü ju, arü le shiwühnü müzammürambe thraneanbah; arünü anihbe khukshikbah, tüsho bünkeang kamshihbah, anihbe shih tsühbah tüsho monü takabahbah,

¹⁷Tümüde Thrünpuh yubo müdünjiyi khiungde arü wu shiwüh kilim jih-a yakzan shuhshihpü mulongpü thsüde akuk ngüshihpü Thrünpuhnü arü mulongbo ching yukjih.

¹⁸Tüsho nünü angükhi aliberü ju alomi kiulongthsürübo kurungkheak yakzan shuhkhi ato kiuto ah.”