Read Yimchungru Naga Amikheakakhiukkhi 19 Bible Online

Amikheakakhiukkhi 19 - Yimchungru Naga bible

Amikheakakhiukkhi 19

¹Ha dunglim yinmi ching yimto ato düsheak zhikhi nangde inü so, “Halleluya! Akhümkhit, müretah tüsho wu isa Thrünpuh yo,

²tümüde api mahkhapkhibo thiyuro tüsho alungki; anihbe müzammüram hode alomi müneanshihkhi müzammüramberü ato apinü mahkhap, tüsho apinü anihbe kheak api tankihrübo thiyih royimjih.”

³Kheaküshe arünü zhi, “Halleluya! Anihbe kheaknü mokhüh lünnü lün yükihchoh.”

⁴Tüsho azothsürü mukukheak phüyi tüsho arhang shiwüh phüyinü kiulongthsü-binkiu kheak binkhi Thrünpuh ki khukningde kingaünde tha, “Amen, Halleluya!”

⁵Tüsho kiulongthsü-binkiu chingnü düsheak zhide arü, “Nüsa api tankihrübo, api trerü, anini tüsho ato alalanü isa Thrünpuh shiang.”

⁶Judüki yimto ato düsheak nangde, ke ahihdo arungkhi nangde, tüsho tsüngmukbo ato düsheak nangde zhide inü so, “Halleluya! Tümüde Atungpuh isa Thrünpuhnü kiulongthsüchoh.

⁷Isanü asühachihanü tüsho asühanü; isanü api müretah jihanü, tümüde Namfimihnunu yamkhün kampü kim arüdo, tüsho api yamkhünbenü anihbe küdah thsüde thsakhama lah;

⁸alibe ju khimthünak atsü, ayinatrüm tüsho amüthsün phuyupü mülüjih” — tümüde khimthünak atsü ju amüsührü thiyuro-lungki rhimobo lah.

⁹Yunirünü I ki tha, “Ha thrütang: Namfimihnunu yamkhün kamkhi thünio ching jiyukrü müngühmühi.” Tüsho apinü I ki tha, “Harü ha Thrünpuh thiyuro yubo ah.”

¹⁰Judüki inü api kingaünpü ajing ki mükhüm, tüshe apinü I ki tha, “Nünü jude düthsü! I nü lung rukhüh tankihrü tüsho Jisu thiyumütsan thsürü nü keoniorü ah. Thrünpuh kingaünang.” Tümüde Jisu thiyumütsan ju müchitkhi me lah.

¹¹Judüki inü yinmi khimshuh-a ngü, tüsho khora amüye khülang lakheah! Shepü ju kheak binkheanü Akin-larü tüsho Thiyuro de ji, tüsho thiyuro-lungki ching apinü mahkhapchoh tüsho thirithsüchoh.

¹²Api mükjibo motru nangde, tüsho aku kheak kuthran ahihdo thran; api kheak hode shenü mümükheahkhi mung thrütkih-a lakheah.

¹³Apinü aphuyukhi shulünkhim ju thiyih ching thsama lakheah, tüsho api mung ju, “Thrünpuh Yu” de ji.

¹⁴Tüsho yinmi bonungrübo khimthünak atsü, amüye tüsho amüthsün yihbahle khorabo kheak binbah api dunglim yan.

¹⁵Amün chingnü trükshihbo kiumülünpü nukshang ayuk khülang akhiukshihchoh, tüsho yinchi tsonü apinü arü yakzan shuhbah; apinü Wuto Thrünpuh bukakhiukkhi kurungaso nitpung ching nitchoh.

¹⁶Api shulünkhim tüsho api pho kheak anihbuh mung, kiulongthsürübo kurungkheak Kiulongthsürü tüsho atungrübo kurungkheak Atungrü de thrütkih-a lah.

¹⁷Judüki yunirü khülang ani ching zhipde inü ngü, tüsho thüning phulung phinde alakhi wuhnubo alala ki düsheak achangnü ji, “Arang, Thrünpuh thünio ato thsungkheak mukhungang,

¹⁸kiulongthsürübo shih, wühkenorübo shih, mungkhung mihtsürübo shih, khorabo le aberübo shih, tüsho mihtsürü alala shih tsühpü zuzu tüsho azhorü, anini tüsho ato.”

¹⁹Tüsho khora kheak binbuh le api bonungrü bede thirithsüpü shiwüh tüsho alomi kiulongthsürübo arü bonungrü bede amukhungkhi inü ngü.

²⁰Tüshe shiwüh tüsho api lung anihbuh thsung thsüde khinthiyinbebo rhimokhi arükchih wukihrü bede ram. Harü amütsanbo hode apinü shiwüh amütsan leangkhirü tüsho api mejak kingaünrü rükyukkheah. Ane ju arhangnü modüjim ching jipyuk.

²¹Tüsho aningkhibo ju khora kheak binbuh mün chingnü akhiukkhi nukshangnü laksah, tüsho arü shihnü wuhnubo alala bukthsü.