Read Yimchungru Naga Amikheakakhiukkhi 20 Bible Online

Amikheakakhiukkhi 20 - Yimchungru Naga bible

Amikheakakhiukkhi 20

¹Judüki yinmi chingnü yunirü khülang alokhünbit mükhipbe tüsho wuhrünliu ato khülang akhah ching shuhbah akide inü ngü.

²Apinü dragon, jipü phuruto, Amünean tüsho Arimri ju rambah kam chithürü thsungkheak api rhük,

³tüsho trükshihbo mümülapyukshihpü thsüde api ju alokhünbit ching jipyukbah rih tüsho yümdo. Ju dunglim api ju anükhüh thsungkheak dükhepü lah.

⁴Judüki inü kiulongthsü-binkiubo ngü, tüsho jurü kheak binrü ju mahkhappü wu jih-a lakheah. Kheaküshe arünü Jisu tüsho Thrünpuh yu kinmo, tüsho shiwüh yungsho mejak mükingaünrü tüsho arü kingkangbo le arü khahbo kheak amütsan yümkihkhi mülarü laksahkhi mebo inü ngü. Arü arhang kamlo, tüsho Khrista lung kam chithürü kiulongthsü.

⁵Aningkhi asherübo kam chithürü arün müthsüyi khiungde arhang mükamlode alakheah. Ha arhang kamlokhi akhuhbe lah.

⁶Shepü akhuhbe arhang kamlokhi ching shihcham luchonü müngühmühi tüsho amüsüh! Arü kurungkheak mahnekipü shepü wu müla, tüshe arübo Thrünpuh tüsho Khrista amükeamrübo labah, tüsho arünü api lung kam chithürü kiulongthsübah.

⁷Tüsho küyimki kam chithürü arün thsübanü, Arimri ju rihyam chingnü adükhebah

⁸tüsho alomi thrip phüyi ching lakhi trükshihbo mülapyukpü, Gog tüsho Magog thirithsü bemukhungpü akhiukbah; arü khekhi ju keto loyi nangde lah.

⁹Arünü alomi amükah hode tsahde yü tüsho amüsührü le amuzhokhi kiuto zündo; tüshe yinmi chingnü mo aki tüsho arü aniuabah,

¹⁰tüsho arü mülapyukbuh amünean ju shiwüh le arükchih wukihrübo lapung modüjim ching jipyuk, tüsho arübo azhing ayin lünnü lün thsümüchibah.

¹¹Judüki inü kiulongthsü-binkiu amüye tüsho ju kheak binbuh ngü; api mikinü alomi tüsho thüning tsoabah, tüsho jurü müngülode kam.

¹²Tüsho inü asherü, ato tüsho anini, kiulongthsü-binkiu miki zhipde ngü, tüsho hümbo khimshuh-a lakheah. Hüm püpü, rhangdung hüm she khimshuh-a lakheah. Tüsho arünü arhimokhi yande hüm ching thrüta lakhinü asherübo mahkhap.

¹³Tüsho ketonü ju ching lakhi asherübo jihabah, Ashe tüsho Thsümüchinü asherübo jihabah, tüsho arünü arhimokhi yande alala mahkhap.

¹⁴Judüki Ashe tüsho Thsümüchi ju modüjim ching jipyuk. Ha modüjim, mahnekipü shekhi lah;

¹⁵khürü mung rhangdung hüm ching thrüta müngüsho, api ju modüjim ching jipyuk.