Read Yimchungru Naga Amikheakakhiukkhi 3 Bible Online

Amikheakakhiukkhi 3 - Yimchungru Naga bible

Amikheakakhiukkhi 3

¹“Tüsho Sardis ching borü yunirü kilim thrütang: ‘Thrünpuh mebo thüne tüsho chining thüne labuh yubo. “ ‘Inü nü rhimobo mükheahlah; nü arhang larü mung lah, tüshe nü a shea lah.

²Asürang, tüsho aningkhibo tüsho ashepü thsüde alakhi düküngshang, tümüde I Thrünpuh miki inü nü rhimobo thülünde müngü.

³Jumonü nünü tümü leangkhikhea tüsho asokheanü lümkhitang; ju mihyuaniang, tüsho mulong müthriang. Nünü masürüsho, ahührü nangde I arübah, tüsho tümü kim ching I nü kilim arübanü nünü mümükheah.

⁴Tütüshe nü arü khimmihbo mümüneankhi Sardis ching khürü lah; tüsho arünü amüye yihbah I lung tsahbah, tümüde arü thülünlah.

⁵Shepünü akuk ngüchonü arü nangde amüye yihbah. Inü küyimkishe rhangdung hüm chingnü api mung nankhita mübah, tüshe I Buh tüsho api yunirübo miki inü api mung khipkhitbah.

⁶Shepü nükhün kihlanü, Menü borübo ki tümü thachonü apinü aniang.’

⁷“Tüsho Philadelphia ching borü yunirü kilim thrütang: ‘Amüsüh tüsho thiyuro, David yo amükhipbe shuhbuh yubo. Apinü tümü khimshuhchonü shenü mürihkhuk, tüsho apinü tümü rihchonü shenü mükhimshuhkhuk.

⁸“‘Inü nü rhimobo mükheahlah. Kheahang, shenü she mürihkhukpü thsüde inü nü miki ripit khimshuhkhi zolah; nü sühmüh ninilah de inü mükheahlah, tütüshe nünü I yu zodo tüsho I mung müreanglo.

⁹Arimri sinagog ching larübo, arü Jihudarü ah de akeangyu tharü nü jing ki khukningshihbah tüsho inü nü muzhokhi mükheahshihbah.

¹⁰Tümütüsho nünü arümkheamde I yu zodo, alomi kheak larü rükakheahpü alomiküp athrünkhi kheak arüpü lakhi rükakipü kim chingnü inü nü küma zobah.

¹¹I nahde arüchoh; shenü she nü kuthran mulupü thsüde nü tümü lanü düngde ramrihang.

¹²Shepünü akuk ngüchonü, inü I Thrünpuh arüngyam ching dungto kamshihbah; küyimkishe api yu chingnü muwukhiuk, tüsho inü api kheak I Thrünpuh mung, tüsho yinmi chingnü akikhi Jirusalem aso I Thrünpuh kiuto mung tüsho I mung aso thrütkihbah.

¹³Shepü nükhün kihlanü, Menü borübo ki tümü thachonü apinü aniang.’

¹⁴“Tüsho Laodikea ching borü yunirü ki thrütang: ‘Amen de athakhi, athülünkhi, thiyuro thiyumütsan, Thrünpuhnü athrünkhi atankih yubo.

¹⁵“ ‘Inü nü rhimobo mükheahlah: nü arüng yungsho atak she yung. Nü arüng yungsho atak thsüshihnelah!

¹⁶Jumonü nü arüng yungsho atak she yungde alamshahshahkhi a le inü I mün chingnü muliuhkhita bahbah.

¹⁷Tümüde nünü thachoh, I alarü ah, I lalim tsülah, tüsho I tümü yihnüpü müla; tüshe nünü nü a küpkhuk, amuzhobe, zhochihrü, müktukrü, tüsho bünkeang ah de mümükheah.

¹⁸Nü alarü kampü thsüde I kilimnü mo chingnü atsangkhitkhi suna thulopü inü nü ki athsunganahchoh; tüsho nü bünkeang lüpdopü thsüde aphuyupü amüye khimbo; tüsho nünü angükhukpü thsüde nü mükbo kheak mujupü müdangke.

¹⁹Sherü ki inü muzholanü, inü thürühchoh tüsho thsümüchichoh; jumonü künsahde laang tüsho mulong müthriang.

²⁰Kheahang, I khimdopü ki zhiplah tüsho thrungchoh; khürünü I düsheak sobah ripit khimshuhsho, I api kilim azahbah api lung yimtsühbah, tüsho apinü I lung yimtsühbah.

²¹Shepünü akuk ngüchonü, inü akuk ngübah I api kiulongthsü-binkiu kheak I Buh ki binkhi nangde, inü I kiulongthsü-binkiu kheak I lung binpü api ki mülüjihbah.

²²Shepü nükhün kihlanü, Menü borübo ki tümü thachonü apinü aniang.’ ”