Read Yimchungru Naga Amikheakakhiukkhi 5 Bible Online

Amikheakakhiukkhi 5 - Yimchungru Naga bible

Amikheakakhiukkhi 5

¹Tüsho kiulongthsü-binkiu kheak binbuh khah tsülim ching, thripkhüh thripkhüh thrütkhi küpqiu, mütsanyüm thünenü yümbah inü ngü;

²tüsho düsheak achangnü zhiyukde sühmüh lakhi yunirü khülang inü ngü, “Ayümdokhi yihshakbah küpqiu khimshuhpü shepü thülünde la?”

³Tüsho küpqiu khimshuhpü yungsho ju ching kheahpü kukde yinmi ching yungsho alomi kheak, yungsho alo alunglim sheshe mülade alakheah,

⁴tüsho küpqiu khimshuhpü yungsho ju ching kheahpü thülünde sheshe müngükhinü inü khide trip.

⁵Judüki azothsürü khülangnü I ki tha, “Dütrip; kheahang, Juda trük kekhüzü, David Sangyingnü kukdo, junangde apinü ayümdokhi thüne küpqiu khimshuhpü kuklah.”

⁶Tüsho kiulongthsü-binkiu le arhang shiwüh phüyi dükeak tüsho azothsürü bolung, Namfimihnunu khülang alaksahkhi nangde, tüsho Thrünpuh mebo thüne alomi alala ching thiyikhi, ajuh thüne tüsho amükji thüne kihbah zhipde inü ngü;

⁷tüsho apinü yübah kiulongthsübinkiu kheak binbuh khah tsülimnü küpqiu ju lu.

⁸Tüsho küyimki apinü küpqiu lukheanü, arhang shiwüh phüyi tüsho azothsürü mukukheak phüyi, arü abannü akinrübo tamkhüntamnü bingkhung tüsho rhümthüneanü mide suna phurusükbo shuhbah Namfimihnunu miki khukning;

⁹tüsho arünü khün aso thsüde tha, “Küpqiu lupü tüsho ju yümdokhibo khimshuhpü nü athülün ah, tümüde nü laksahdo tüsho nü thiyih hode trük, thiyutha, mihtsürü tüsho trükshih aban chingnü Thrünpuh thsungkheak nünü mihtsürübo rhokhit,

¹⁰tüsho isa Thrünpuh kilim arübo kiulongthsü tüsho amükeamrübo kamshih, tüsho arünü alomi kheak kiulongthsübah.”

¹¹Judüki inü kheah, tüsho kiulongthsü-binkiu, shiwühbo, tüsho azothsürübo mükamde yunirü ahihkhüh chithürübo tüsho chithürü thürübo düsheak inü so.

¹²Arünü düsheak achangnü khün thsü, “Wu, lakhit, lümlung, sühmüh, wüntre, müretah tüsho müngühmühi leangkhipü alaksahkhi Namfimihnunu athülün lah!”

¹³Tüsho yinmi ching, alomi kheak, keto ching tüsho alala ching shiwühbo abannü athakhi inü so, “Kiulongthsü-binkiu kheak binbuh tüsho Namfimihnunu kilim müngühmühi, wüntre, müretah tüsho sühmüh lünnü lün laang!”

¹⁴Tüsho arhang shiwühbo phüyinü tha, “Amen!” Tüsho azothsürübonü khukningbah kingaün.