Read Yimchungru Naga Ruth 1 Bible Online

Ruth 1 - Yimchungru Naga bible

Ruth 1

¹Mahkhaprübonü yakzan shuhde alachoki lomi ching khümzung lakheah, tüsho Juda ching Bethlehem mihtsürü khülang Moab lomi ching, aniube tüsho tsührü athrürü mahne bebah tsode yünü la.

²Ju buh mung Elimelek, aniube mung Naomi, tüsho atsührüne mung Mahlon tüsho Kilion; arübo ju Juda ching lakhi Bethlehem chingnü Ephrarü lakheah. Arübo Moab lomi ching yü tüsho ju ching la.

³Tüshe Naomi yamkhünbuh Elimeleknü aniube ju atsührü athrürü mahne lung zojihbah sheabah,

⁴atsührünenü ane niuberü Moabberü lu: khülangbe mung Orpa tüsho püpü ju Ruth. Arü ju ching kam thürü bande la;

⁵tüsho Mahlon le Kilion ane chido sheabah, jumonü Naomi a niubuhrü tüsho tsührü mülade alangzü lungride la.

⁶Judüki ATUNGPUHNÜ amihtsürübo kilim latsühlayung müngühjih-a lah de Naominü so; jumonü atsühmeakbe büne bebah Moab lomi chingnü rholodarüpü thsakham.

⁷Jumonü anihbenü atsühmeakne bebah arü lapung chingnü Juda lomi lim alungpü limtsahmusu.

⁸Tüshe Naominü atsühmeakne ki tha, “ Thüyam lim alode yüang tüsho nüke berü ki laang. I lung tüsho sheabahrü lung nükenü lade arükhi thsungkheak ATUNGPUHNÜ nüke müthsümshang.

⁹Tüsho ATUNGPUHNÜ nüke chido yamkhünbuhrü atsü ngübah sühakhim ching lapü mülüshang.” Jumonü Naominü mün müthsüpde chode tha. Tüsho arünü düsheak akhiukde trip.

¹⁰Tüsho anenü anihbe ki tha, “Yung! Ike nü lung nü mihtsürü kilim yübah.”

¹¹Tüshe Naominü tha, “I tsühne, nüke alode ayübeah, tümüde nükenü I lung arünela? Nüke yihlulopü thsüde I tsührü athrürü lalobah de lümcho shi?

¹²I tsühne tsoloang, tümüde I mürhanglokhukpü thsüde khide shinabahdo. Thiyuthiyu tsührü labah de lümbah inü khihre rhangbah tsührü zübebe she,

¹³nükenü arü zo khiungde aleangba de? Ju dünkheaknü mührü ki mürhangyiba shi? Yung, I tsühne, ju amukukkhi ah de nükenü mükheahlah. Nüke kheaknüa I pü khide mulong rozhakbe ah tümüde ATUNGPUHNÜ I kheak khide khühde rhimodo.”

¹⁴Kheaküshe anenü atrippü tankih. Junangde Orpanü ani kheak mün müthsüpde chode thabah wulunglo, tüshe, Ruth a Naomi kheak kapkih.

¹⁵Jumonü Naominü tha, “Ruth, nü chi a nihbe mihtsürü tüsho thrünpuhbo kilim alode wulungdo, nü she yande wulungang.”

¹⁶Tüshe Ruthnü alo, “Nü bahbah atsopü I ki dümushu! I nü lung yüanü. Nü küching yübanü I she ayübah, nü küching labanü I she alabah; nü mihtsürü ju I mihtsürü thsübah, tüsho nü Thrünpuh ju I Thrünpuh thsübah.

¹⁷Nü küching shebanü I she ashebah, tüsho ju ching kiuyuka bahbah. Ashenü lang müchamde inü nü kheaknü bahbah tsosho ATUNGPUH thsümüchi amütsübe I kheak akihshang!”

¹⁸Küyimki Ruthnü anihbe lung arüpü mulongkhitkhi Naominü mütsankhea, tümü müthadebah.

¹⁹Jumonü Bethlehem mukhiungchokia ane judü lang yü. Küyimki ane akhiungkhea, kiuto ching larü athrünkhi asüh, tüsho aliberübonü zhide tha, “ Atsütsü ha Naomi a shi?”

²⁰“I ki Naomi de düji,” anihbenü alo, “ Mara de jiang, tümüde Wuto Thrünpuhnü I kheak khide khühde rhimodo.

²¹I ha chingnü atsochoki muzhomopungde yü, tüshe ATUNGPUHNÜ khah keangkeang belodarü. Wuto ATUNGPUHNÜ I junoabahde I kheak thsümütsü jihchoshihbah tümüde I ki Naomi de jicho le?”

²²Hanangde Naominü Moabrü atsühmeakbe Ruth bebah alodarü. Ane Bethlehem khiungchoki barli hi yimlupü tankihde alakheah.