Read Yimchungru Naga Ruth 2 Bible Online

Ruth 2 - Yimchungru Naga bible

Ruth 2

¹Kheakü Naomi yamkhünbuh Elimelek pürü buhtsüh chingnü alarü mihtsürü khülang amung Boaz lakheah.

²Moabberü Ruthnü Noami ki tha, “Yimlurünü abahkhi himüdre mopü thsüde I thulu ching yüanü. Mihtsürü khürünü a I ki amuzho huhpü labah de lümlah.” Noaminü alo, “I tsah-a, Yüang,”

³Jumonü Ruthnü thulu ching yü tüsho yamlarü dunglim hi-müdre mode tsah. Tüshe thulu ju Elimelek buhtsührü Boaz lu lakheah.

⁴Adükeak anükhüh dunglim Boaz ju Bethlehem chingnü arübah yimlurübo ki makshe jihde tha, “ATUNGPUH nüsa lung lashang!” Arübonü api ki alo, “ATUNGPUHNÜ nü müngühshang!”

⁵Yimlurü bolung abebuh ki Boaznü keokhi, “ Anünübe ju shepüa?”

⁶Tüsho abebuhnü alo, “ Api Naomi lung arükhi Moabberü ah.

⁷Anihbenü yimlurü dunglim hi-müdre mopü I ki keokhikheah. Yün ching anükhüh kheak lang atsungkheambah yapsunü kheakü khiungde müdüchingde rhimochoh.”

⁸Boaznü Ruth ki tha, “I tsah-a, nünü ha aniang, ha luphü ching hode püpü lim hi mode düyü, tüshe I yamlaberü yankihbah rhimoang;

⁹arü kükheak yimluchonü kheahkihang tüsho arü dunglim yanang. Nü kheak küpkhuk müjihshihpü thsüde inü athrününgtsüngbo ki thaabahdo. Küyimki nü kethüriba, yüang tüsho athrününgtsüngbonü khipyuka zokhi keluh ching yo yungang.”

¹⁰Ruthnü alo lim ami mükhümbah Boaz ki tha, “I khiungkeberü khülang ah dale nünü I mürühpü thsüde nü mük ki tümü kheahkhitkhea?”

¹¹Boaznü alo, “Nü yamkhünbuh sheshu nünü nü ni thsungkheak tümü rhimokheanü alala inü sodo. Tüsho nü be nü buh tüsho nü zübe lomi bahjihbah küruk nünü püpüki mümükheahkhi mihtsürü bolung lapü arükheanü inü mükheahlah.

¹²ATUNGPUH Israel Thrünpuh shepü ghidükeang bukkhüp nü tsoyukpü arükheanü, apinü nü rhimo tüsho nü mihkhah mode thsambah jihshang!”

¹³Ruthnü alo, “I tungpuh, nünü I kheak khide amüthsüm huhchoh, tümüde I nü yamlaberü ruk yunga lalashe mulong sühakhimde asuk.”

¹⁴Yimtsühchoki Boaznü Ruth ki tha, “ Ha kheak arübah yikhap asanke ching thsambah tsühang.” Jumonü alibenü yimlurü rheang ki binbah Boaznü ajihkhi yikhap abukthsüde tsühbah aninglo.

¹⁵Jushu alibenü hi mopü wusu, tüsho Boaznü athrününgtsüngbo ki tha, “ Hiphung ching yo she moshang, tüsho anihbe düyanlo.

¹⁶Tüsho hi aye khürü aphung chingnü thokhia zojihbah ju moa lushang tüsho anihbe düthürüh.”

¹⁷Jumonü Ruthnü arelim khiungde thuluphü ching hi mode yü, tüsho ju kingkhikhi ju khiduh khülang bande adünkhit.

¹⁸Apinü hi küdükhüh momukhungkheanü kiuto ching hande alungbah ani ki huh. Tüsho anihbenü tsahninga ahankhi she yihkhita jih.

¹⁹Naominü alibe ki keo, “ Küchingnü hadükhüh momukhungkhea? Nü she lu ching rhimokhea? Nü kheahyukbuh kheak Thrünpuhnü müngühshang!” Jumonü, I Boaz lu ching rhimokheah de Ruthnü Noami ki tha.

²⁰Noaminü atsühmeakbe ki tha, “ATUNGPUH shepünü arhang larü tüsho asherü mübahyukde muzhochonü apinü müngühshang!” Kheaküshe Noaminü anihbe ki tha, “ Ju buh isa trükrü tüsho buhtsührü ah.”

²¹Tüshe Moabberü Ruthnü tha, “ Apinü I ki ha she tha, Müyimlukhamyi khiungde I yamlarü lung hi moang.”

²²Naominü Ruth ki tha, “ Am, I tsah-a, yamlaberü lung Boaz lu ching rhimokhi lungkido, khürü lu ching yükhülaa nü küpkhuk jih-a labah.”

²³Junangde Ruthnü Boaz yamlaberübo lung barli hi tüsho wheat hi müyimlukhamyi khiungde hi mo. Tüsho judü lang anihbenü ani lung lakheah.