Read Yimchungru Naga Ruth 3 Bible Online

Ruth 3 - Yimchungru Naga bible

Ruth 3

¹Ju dunglim Naominü Ruth ki tha, “I tsah-a, nü tsüde alashihpü thsüde inü nü yamkhünrü müyimjihbea de?

²Kheakü Boaz, shepü yamlaberü lung nü rhimokhea, api isa buhtsührü khung yung de? Kheahang, api khihre rhimopung ching barli hi yünbah.

³Jumonü müsühmürabah rhümthüneabe mujumüraang, tüsho khimmih atsübe yihbah api hi nitpung ching yüang, tüshe api mütsühyungkhamki nü ju ching lah de dümükheahshih.

⁴Api yappung mütsanmükhiang, tüsho api yapshe shu, yübah khim lokhia bahjihbah ajing kheak yapang. Tümü thsübanü apinü nü ki thabah.”

⁵Ruthnü alo, “Nünü athakhi alala inü arhimobah.”

⁶Junangde Ruthnü pung ching yübah aninü athakhi nangde rhimo.

⁷Küyimki Boaz tsühyungkhamkhea, api asühkhi ching lakheah. Tüsho hi wumujungkhi yean yünü yap. Judüki Ruthnü mükhihde tsahde arübah khim lokhia bahbahle ajing kheak yap.

⁸Tsüngphulung ching Boaz lümrhangbah zuhphülap, tüsho ajing kheak alibe yapkhi ngübah müyinsah,

⁹“Nü shea?” de apinü keokhi. Alibenü alo, “I nü yamlarü Ruth ah, tümüde nü ju betsührü khung ah, jumonü muzhobahle I luang.”

¹⁰“I tsah-a, ATUNGPUHNÜ nü mügühjang,” apinü tha. “Nünü atan nü ni muzhokhi kheaknü kheakü I kheak atobe amuzho huhdo. Junangde nünü alarü yungsho zhochihrü thrürü mümüsham.

¹¹Ruth, mulong düsansan, nünü amulongkhi nangde inü alala rhimobah, tümüde kiuto ching larü alalanü nü athülünkhi liberü ah de mükheahlah.

¹²Ha thiyuro, I betsührü khung ah, tüshe mihtsürü khülang I kheaknü alü betsührü khung lah.

¹³Khihre ha ching yapang tüsho shido apinü nü rhokhitsho tsülah, tüshe apinü mürhokhitnesho inü arhokhitbah de arhang labuh ATUNGPUH mung chingnü alokhichoh. Jumonü yapsu khiungde ha ching yapang.”

¹⁴Jumonü alibenü yapsu khiungde ajing kheak yap, tüsho hanrü-akiu mümütsanchokinü asürü. Tüsho apinü tha, “ Alibe rhimopung ching arükheah de dümükheahshih.”

¹⁵Boaznü alibe ki tha, “Nü khim yihkhitbahle trüna zoang,” alibenü anide rhimo, tüsho apinü barli hi thuruk ki adüna yukjihbah angam kheak shuhkihjih. Jushu alibenü hanbah kiuto lim alode yü.

¹⁶Küyimki thüyam khiungkhea, aninü keokhi, “I tsah-a, küde thsah ayükhea?” Anihbe thsungkheak Boaznü arhimokhi kimkethürü Ruthnü ani ki thaa huh.

¹⁷Anihbenü tha, “I khah keangkeang nü kilim malodarübeah de apinü I ki tha, jumonü apinü ha barli hi thuruk ki adüna jihkheah.”

¹⁸Naominü anihbe ki tha, “I tsah-a, harü alala müzanzhakchokia keamde binang. Tümüde khihni ha müzanzhakchokia api keamramde müla.”