Read Yimchungru Naga Ruth 4 Bible Online

Ruth 4 - Yimchungru Naga bible

Ruth 4

¹Boaznü kiuto chipimurung ki yübahle bin. Tüsho buhtsührü shepü Boaznü athakheanü api arü, tüsho Boaznü tha, “ Müyambuh, ha kheak arübah binang.” Junangde apinü ju kheak rholodarübah bin.

²Tüsho Boaznü kiuto ching azothsürü thürü bede arübah, “ Ha kheak binang” de tha, jumonü arünü bin.

³Tüsho apinü abuhtsühbuh ki tha, “ Kheakü Noami shepü Moab chingnü alode arüa lanü, apinü isa buhtsührü Elimelek lo yinchoh,

⁴jumonü inü nü ki hanangde thaanü de lümlah: Ha ching bina larübo tüsho I mihtsürü azothsürübo mikinü thuloang. Nünü hoju rhokhitnesho rhokhitang. Tüsho nünü hoju mürhokhitnesho inü amükheahpü thsüde I ki thaang. Tümütüsho nü hobah hoju rhokhitpü she müla tüsho nü dunglim lang I ah.” Tüsho apinü tha, “Inü ju rhokhitbah.”

⁵Boaznü tha, “Nünü künimung Naomi khah chingnü alo ju athulobanü ju lung asherü yamrüplurüp zolopü thsüde Ruth she nünü athulobeah.”

⁶Apinü tha, “I yamrüplurüp dükheakbah mütsüle inü ha mürhokhit; inü arhokhitbe yak ah tütüshe nünü luang, tümüde inü mürhokhitkhuk.”

⁷Judüki yinzüyindo zanzhakpü yungsho kukruk müthriachih ki, jingkhümpü yihkhitbahle athulorü ki jihpü yakzan lakheah. Hanangde Israelrünü zanzhakde rhimode alakheah.

⁸Jumonü küyimki ju buhnü Boaz ki, “Nünü rhokhitang” de athakhea, ajingkhümpü yihkhitbahle Boaz kilim jih.

⁹Boaznü azothsürü tüsho mihtsürübo ki tha, “Elimelek tüsho atsührü Kilion le Mahlon yamrüplurüp Naomi kilimnü inü rhokhitchoh de khihni nüsa thiyumütsan ah.

¹⁰Ju lang yungde ashebuh mung tüsho api yamrüplurüp arü betsüh ching müdükheakde alashihpü thsüde tüsho api lapung kiuto chingnü makhinpü thsüde Mahlon yamkhünbe Moabberü Ruth she I yamkhünbe thsüpü inü thulodo. Khihni nüsa thiyumütsan ah.”

¹¹Azothsürü tüsho chipimurung ki larübonü tha, “ Am, isa thiyumütsan thsürü ah. Rachel le Lea bünenü Jakob kilim tsührü hihde zübejihkhi nangde ATUNGPUHNÜ nü yamkhünbe müngühshang. Ephra trük ching nü alarü kamshang tüsho Bethlehem ching nü thushang.

¹²Ha liberü hode ATUNGPUHNÜ müngühjihpü lakhi zürü ju Juda le Tamar ane tsührü Perez yamkhün nangde kamshang.”

¹³Jumonü Boaznü Ruth ju ayamkhünbe thsüpü thüyam lim bede yü. ATUNGPUHNÜ alibe müngühjih, tüsho mübünkeangde kambah tsührü athrürü zübe.

¹⁴Aliberübonü Naomi ki tha, “ATUNGPUH shiang! Nü kümshihpü thsüde khihni tsührü nü kilim jihdo. Azübuh ju Israel ching thushang!

¹⁵Apinü nü rhangdung reangzahloshihbah tüsho ashinshu nü mütrübah. Tümüde nü tsühmeakbe shepü nünü muzhocho tüsho shepü tsührü athrürü thüne kheaknü atsübeanü, anihbenü api zübejih.”

¹⁶Naominü khungarü ju akhüh kheak shuhkih-a lu tüsho anihbenü khungarü ju mütrü.

¹⁷Yamhingrü liberübonü khungarü mung Obed de ji. Arünü alala ki tha, “ Tsührü athrürü khülang Naomi kilim zübejih-a lah!” Api ju David abuh, Jesse abuh kam.

¹⁸Ha Perez kheaknü David khiungde tsühsoniusobo akhinashu: Perez tsührü Hezron,

¹⁹Herzon tsührü Ram, Ram tsührü Amminadab,

²⁰Amminadab tsührü Nashon, Nashon tsührü Salmon,

²¹Salmon tsührü Boaz, Boaz tsührü Obed,

²²Obed tsührü Jesse tüsho Jesse tsührü David.