Read Yimchungru Naga 1 Sam 14 Bible Online

1 Sam 14 - Yimchungru Naga bible

1 Sam 14

¹Nimung khülang Saul tsührü Jonathannü api thsühnuk hanrü athrününgtsüngbuh ki tha, “ Arang, ike püpü thrip Filistia thirithsürü boto kilim yüanü.” Tüshe apinü abuh ki mütha.

²Saul a Migron ching tsarümkiu sang bukkhüp Gibea ki lakheah; api lung bonungrü 600 ngüm lakheah,

³arü bolung amükeambuh Ahijanü (Ikabod akhiung Ahitub tsührü; Ahitub ju Shilo ching ATUNGPUH amükeambuh Eli tsührü Phinehas tsührü ah) amükeamrü khim han. Kheakü mihtsürübonü Jonathan yüabahdo de mümükheah.

⁴Ahungnim dükeak Jonathannü Filistia thirithsürü boto lim wutupü mürangkhi lim ju thripkhüh lungku khülang tüsho püpü thrip lungku khülang de alakheah; khülang mung Bozez, tüsho püpü mung Sene.

⁵Lungku khülang Mikmash miki dukulim tüsho püpü Geba miki düjinglim abina lakheah.

⁶Jonathannü api thsühnuk hanbuh athrününgtsüngbuh ki tha, “ Arang, ike harü tsütamübahkhi thiriri boto kilim wutuanü; khükia ATUNGPUHNÜ ike thsung thsüde arhimobah; tümüde hihang yungsho nükang ATUNGPUHNÜ akhümkhitpü ching tümünü she müzhipdokhuk.”

⁷Api thsühnuk hanbuhnü tha, “Nü mulong ching lakhi alala rhimoang. Jumonü yüang; nünü amulongkhi nangde, I ha ching nü lung lah.”

⁸Judüki Jonathannü tha, “ Kheakü ike jurü mihtsürü hode ayübah tüsho arü ki ike huhbah.

⁹Arünü ike ki, ‘Isa nüke ki marüyi khiungde aleangang,’ de thasho judü lang ike zhippung ching zhipbah, tüsho arü kilim muwutu.

¹⁰Tüshe arünü, ‘Isa kilim atung,’ de thasho ikenü awutubah; tümüde ATUNGPUHNÜ arübo ike khah ching jihdo. Hoju ike thsungkheaknü amütsan labah.”

¹¹Jumonü ane chidonü Filistiarü thiriri boto ki ane huh; tüsho Filistiarünü tha, “ Kheahang, Ibrirübo arü jikpung alokhün chingnü akhiukchoh.”

¹²Thiriribonü Jonathan tüsho api thsühnuk hanbuh ane ki tha, “Isa kilim atung, tüsho isanü nüke ki tümükhüh huhbah.” Jonathannü thsühnuk hanbuh ki tha, “I dunglim arang; tümüde ATUNGPUHNÜ arübo Israel khah ching jihdo.”

¹³Judüki Jonathannü api thsühnuk hanbuh adunglim tsahshihbah akhah le ajingnü künde yükih. Filistiarü ju Jonathan müngüh ayokhi, tüsho thsühnuk hanbuh api dunglim arübuhnü arübo laksah.

¹⁴Akhuhbe laksahkhi ching Jonathan le thsühnuk hanbuh anenü thulu khinkhüh bankhi dükeak chingnü mihtsürü 20 bande laksah.

¹⁵Binkheampung, thulu, tüsho mihtsürü alala bolung trede alakheah; bonungrü tüsho thirithsürübonü she ajan; alo ajan; tüsho ju khide trede kam.

¹⁶Benjamin lomi ching lakhi Gibea chingnü Saul mihtsürübonü Filistiarübo nanachihde atsokhi ngü.

¹⁷Judüki Saulnü api lung lakhi bonungrübo ki tha, “ Mung jiang tüsho isa bolungnü shepü tsoa lanü kheahang.” Küyimki arünü mung jikhea, Jonathan le api thsühnuk hanbuh ane mülade alakheah.

¹⁸Saulnü Ahija ki tha, “ATUNGPUH sangdan ha ching lubah arang.” Tümüde judüki ATUNGPUH sangdan Israelrü lung lakheah.

¹⁹Küyimki Saulnü amükeambuh ki asukachihde alakhea, Filistiarü binkheampung ching alanajikhi alübe kam. Jumonü Saulnü amükeambuh ki tha, “Nü khah tukloa lung.”

²⁰Judüki Saul tüsho api lung lakhi mihtsürü alala shomukhung tüsho keochih ching yü; tüsho nukshangbo ju khülangnü khülang kheak dünkihbah alakheah, junangde khide tode ayingyingkhi lakheah.

²¹Kheakü akhuhlim Ibrirü Filistiarü lung arü binkheampung ching wuturü alodarü tüsho Saul le Jonathan ane lung lakhi Israelrü bolung be.

²²Junangde, küyimki Ephraim lomi wung ching jikrü Israelrünü Filistiarü tsochoh de asokhea, arü she arü dunglim keochihpung ching yü.

²³Jumonü ju nimung ATUNGPUHNÜ Israelrü kilim akuk ngüshih tüsho keochihkhi ju Beth-aven ching akhinde yü.

²⁴Kheakü ju nimung Israelrü lümthsünü ching lakheah, tümüde Saulnü bonungrü kheak thiyuchihchimde tha, “ Arelim mükamchoki tüsho inü I riri kheak romüyimlochoki shepünü yimtsühbanü api kheak muthrumünean yükihang.” Jumonü bonungrü shenü she jim mütsühake.

²⁵Thirithsürü alala murung ching arü; tüsho alo ching mukhuke lakheah.

²⁶Küyimki thirithsürübo murung ching arükhea, mukhuke ju jungkhit; tüshe arünü arü khah nihbuh mün ching muyuk, tümüde arünü thiyuchihchimkhi tre.

²⁷Tüshe Jonathannü abuhnü thirithsürü kheak thiyuchihchimde athakhi muso; jumonü apinü akhah ching zhimkhi tso mulo mukhukerüp ching athso, tüsho mukhuke ju tsüh; tüsho amükjibo rhüngrhüngde kam.

²⁸Judüki bonungrü khülangnü tha, “Nü buhnü thirithsürü kheak müküpde thiyuchihchimde tha, ‘Shepünü khihni yimtsühbanü muthrumünean thsang.’ Jumonü thirithsürübo yiuhyiuhlah.”

²⁹Judüki Jonathannü tha, “I buhnü lomi küpkhukshihdo; kheahang I mükjibo küdükhüh rhüngrhüng la tümütüsho inü ha mukhuke anikhüh tsühakeakheah.

³⁰Khihni thirithsürübonü thiriri kheaknü ayankhikhibo tsühkhülaa küdükhüh atsüpü lakhea; tümüde kheakü Filistiarü bolung hihde mülaksah.”

³¹Arünü ju nimung Mikmash chingnü Aijalon khiungde Filistiarü laksahshu, thirithsürübo khide yiuhyiuhde alakheah;

³²jumonü thirithsürübonü arünü ayankhikhi lim nanachihde yü, tüsho namfimihnu, moshipung tüsho moshi nunubo lubah alo kheaknü laksah; tüsho thirithsürübonü jurübo athiyih bede tsüh.

³³Judüki ha Saul kilim thiyusheak jih-a lakheah, “ Kheahang, thirithsürübonü athiyih bede atsühkhi hode ATUNGPUH azhihde neak yihbeakdo.” Tüsho apinü tha, “Nüsanü mihyumanide rhimodo; I ki ha kheak lung ato phülahde arang.”

³⁴Saulnü tha, “Nüsabo thirithsürü bolung yüang tüsho arü ki thaang, ‘ Alalanü nihbuh moshipung yungsho namfimihnu lubah arang, tüsho ha kheaknü laksahbah tsühang; tüsho athiyih bede atsühkhi hode A TUN GPU H dazhih.’” Jumonü thirithsürü alalanü ju re nihbuh moshipung handarü tüsho ju ching laksah.

³⁵Tüsho Saulnü ATUNGPUH kilim kingaün sadam khülang thsü; ha apinü ATUNGPUH kilim kingaün sadam thsükhi akhuhbe lakheah.

³⁶Tüsho Saulnü tha, “Isanü Filistiarü kilim azhing ching yükianü tüsho yapsu müyinkhi khiungde yananü; isanü arü khülang she maningshihnü.” Arünü tha, “Nü ki tümü atsüanü rhimoang.” Tüshe amükeambuhnü tha, “Isanü akhuhde Thrünpuh ki keokhianü.”

³⁷Jumonü Saulnü Thrünpuh ki keokhi, “I Filistiarü dunglim yükiba shi? Nünü arübo Israel khah ching jihba shi?” Tüshe apinü ju nimung anihbuh ki malojih.

³⁸Saulnü tha, “Nüsa mihtsürü limberübo, ha kheak arang; tüsho ha neak küde thsah khihni akhiukchonü isanü yimkhitanü.

³⁹Tümüde ATUNGPUH lale, shepünü Israel khümkhitcho, I tsührü Jonathan thsüthsü she, api tsükjide ashebah!” Tüshe mihtsürü alala bolungnü api yu alorü sheshe mülade alakheah.

⁴⁰Apinü Israel alala ki tha, “Nüsa thripkhüh thsübah tüsho I le I tsührü Jonathan püpü thrip thsübah.” Mihtsürübonü Saul ki tha, “Nü ki tümü atsüanü rhimoang.”

⁴¹Tüsho Saulnü tha, “O ATUNGPUH Israel Thrünpuh, tümüde nünü nü yamlarü ki khihni malojih le? Ha amülim I yungsho I tsührü Jonathan kheak lasho, O ATUNGPUH Israel Thrünpuh, Urimnü alojang; tüshe ha amülim Israel mihtsürü kheak lasho, Thummimnü alojang.” Tüsho Jonathan le Saul kheak azan thsükhit tüshe mihtsürübo a dükde la.

⁴²Tüsho Saulnü tha, “I tüsho I tsührü Jonathan dükeak azan thsüang.” Tüsho Jonathan kheak akhiuk.

⁴³Tüsho Saulnü Jonathan ki tha, “Nünü tümü rhimokheanü I ki thaang.” Jonathannü api ki tha, “I khah ching zhimkhi tso münkheam kheaknü inü mukhuke tsühakeakheahdo; I ha ching lah, I ashebah.”

⁴⁴Saulnü tha, “ Thrünpuhnü I kheak alübe she rhimoshang; nü tsükjide ashebah, Jonathan!”

⁴⁵Judüki mihtsürübonü Saul ki tha, “ Jonathan asheba de, shepünü Israel ching ha ato akuk ngükhea? Ju kheaknü limshuabahang! ATUNGPUH lale, api kuyü bümkhüh she alo ching mayokhi; tümüde apinü khihni ATUNGPUH lung rhimodo.” Jumonü mihtsürübonü Jonathan rhokhit, tüsho api müshe.

⁴⁶Judüki Saulnü Filistiarü yankhi chingnü tuklo; tüsho Filistiarü arü lapung ching yü.

⁴⁷Küyimki Saulnü Israel kurungkheak kiulongthsü ngükhea, apinü mühirü api riribo alala, Moab, Amon, Edom, Zoba kiulongthsübo, tüsho Filistiarü kheak keochih; kürü ching api yükheanü apinü arübo küpkhuk jih.

⁴⁸Apinü mulong tode rhimo, tüsho Amalekrü laksah, tüsho Israelrü arü yanrü khah chingnü khümkhit.

⁴⁹Kheakü Saul tsührübo ju Jonathan, Ishvi, tüsho Malkishua; tüsho atsührü aliberü mahne mung: adüjibe mung Merab, tüsho akheambe mung Mikal.

⁵⁰Saul niube ju Ahimaaz tsührü Ahinoam lakheah. Tüsho api bonungrü limthobuh ju Saul akü Ner tsührü Abner lakheah;

⁵¹Saul abuh ju Kish, tüsho Abner abuh Ner ju Abiel tsührü lakheah.

⁵²Saul nimung alala ching Filistiarü bede müküpde keochihkhi lakheah; tüsho küyimki Saulnü khürü sühmüh lade yungsho thirithsürü athrungrü ngübanü, api tankihpü ching lu.