Read Yimchungru Naga 1 Sam 17 Bible Online

1 Sam 17 - Yimchungru Naga bible

1 Sam 17

¹Kheakü Filistia bonungrü thirithsüpü shomukhung; arübo Juda ching lakhi Soko ching mukhung, tüsho Ephes-dammim ching lakhi Azeka le Soko dükeak binkheam.

²Saul tüsho Israelrü mukhungbah Ela jindükhün ching binkheam, tüsho Filistiarü bede keochihpü duklang.

³Filistiarü awung thripkhüh lim zhip, tüsho arü dükeak jindükhün zahbah Israelrü awung püpü thrip zhip.

⁴Judüki Filistiarü binkheampung chingnü Gathrü Goliath de thsübah athrungrü khülang akhiuk, api leang ju kipying 9 kheak kip 1 lakheah.

⁵Api ku kheak suna lungnü athsükhi kuthran thran, tüsho thirithsü pangkhümpü khüm; pangkhümpü ju khahngak 17 lakheah.

⁶Api jing ching müwayinchi khümyuk tüsho müwayinchi thsüh adubuh kheak han.

⁷Thsühphi ju khim-keakrü khümku ruk lakheah, tüsho thsühbeak ju khahngak 7 lakheah; tüsho tsung hanrü api müngüh yü.

⁸Apinü zhipbah Israel bonungrü kilim zhi, “ Tümü thsüpü nüsa keochihpü duklanga arükhea? I Filistiarü yung de, tüsho nüsa Saul yamlarübo yung de? Nüsa thsungkheaknü mihtsürü khülang mokhitang, tüsho api I kilim akishang.

⁹Apinü I bebah keochihkhuksho tüsho I laksahsho, isa ju nüsa yamlarü thsübah; tüshe inü api kuksho tüsho api laksahsho, nüsa ju isa yamlarü thsübah tüsho isa tankihbah.”

¹⁰Tüsho Filistiabuhnü tha, “ Khihni inü Israel duklangkhi münitchoh! I kilim mihtsürü khülang jihang, tüsho ike keochihbah.”

¹¹Küyimki Saul tüsho Israelrü alalanü Filistiabuhnü athakhi yubo sokhea, arübo mulong nini tüsho khide treabah.

¹²Kheakü David ha Juda ching lakhi Bethlehem chingnü Ephrarü Jesse tsührü ah, api tsührü 8 lakheah. Saul kiulongthsüchoki ha buh mihtsürü ha khide shina lakheah.

¹³Jesse tsührü azorü mahsamnü Saul lung keochih ching yande yü; api tsührübo keochih ching yürübo mung ju adüjibuh Eliab, ju khinbuh Abinadab, asampü ju Shamma.

¹⁴David ju akheambuh lakheah, azorü mahsamnü Saul yan,

¹⁵tüshe David a abuh yo namfimihnu yimkippü Bethlehem lim yüde alakheah.

¹⁶Filistiabuhnü Israelrü ki yapsu are aban nimung yirü müneahde zhip.

¹⁷Jessenü atsührü David ki tha, “Nü khiung pürü thsungkheaknü angukhi hi khahngak 10 tüsho yikhap 10 lubah nahde binkheampung ching yüang;

¹⁸tüsho niuhke kingkung 10 ha lubah chithürü kurung limthobuh kilim jihang. Nü khiung pürü küruk lanü kheahang tüsho tsüde alakhi amütsan tümükhüh arü kilimnü lubah arang.”

¹⁹Kheakü Saul le arübo, tüsho Israelrü alala Ela jindükhün ching Filistiarü bebah keochihde alakheah.

²⁰Davidnü yapsu mükikde asürübah namfimihnu ju aneakrü ki zojih, tüsho tsühyungbe lubah Jessenü thiyukhüm jihkhi nangde yü. Bonungrübo keochihpung ching ahode ayüchoki api ju binkheampung ching arü.

²¹Israel tüsho Filistia bonungrübo kheahkihachihbah keochihpü thsakham.

²²Davidnü kukruk-hah neakbuh kilim zojihbah thirithsürü kilim shande yü, tüsho akhiung pürü ki salüm jih.

²³Apinü arü ki asukachihchoki, athrungrü Gathrü Filistiabuh, Goliath ju Filistiarü bolungnü akhiuk, tüsho püpüki yu nangde tha. Tüsho Davidnü jurü so.

²⁴Küyimki Israelrünü mihtsürü ju angükheanü, alala müyinnimde shande tso.

²⁵Israelrübonü tha, “Nüsanü ha buh mihtsürü atua la ha ngünah? Tsükjide api Israel müneahpü atua lah. Shepünü ju buh laksahbanü kiulongthsüpuhnü thsambah ato jihbah, tüsho api kilim atsührü aliberü jihbah tüsho Israel ching api yamkhün zuzu lashihbah.”

²⁶Davidnü api ki zhiprü mihtsürübo ki tha, “ Mihtsürü khürünü ha Filistiabuh laksahkhi hode Israel chingnü mulong masühkhi hanbah tsosho api tümü ngüba? Tümüde ha tsütamübahkhi Filistiabuhnü arhang Thrünpuh bonungrü azhihpü api she a?”

²⁷Mihtsürübonü ha ruk lang alo, “ Mihtsürü shepünü api laksahbanü anihbuh thsungkheak junangde rhimoshang.”

²⁸Akhiung azopü Eliabnü mihtsürübo ki apinü athakhi so; tüsho Eliabnü David kheak alü bukakhiuk. Apinü tha, “ Tümü thsüpü nü akikhea? Sunglo ching nünü namfimihnu anükhüh thsü she ki zojihla? Nü rük thsükhi tüsho nü mulong ching amütsü lümkhi inü mükheahlah; tümüde nü a le keochihkhi kheahpü lang akia lah.”

²⁹Davidnü tha, “Inü tümü thsüa la? I akeokhi she mükeokhishihbea de?”

³⁰Apinü akhinde püpü ki yübah ju yu lang tha; tüsho akhuhlim ruk lang mihtsürübonü api ki alo.

³¹Küyimki Davidnü athakhi yubo arünü asokhea, arünü Saul ki thaa huh; tüsho Saulnü api thsungkheak thiyi.

³²Davidnü Saul ki tha, “ Api dünkheak sheshe mulong düthsümünimshih; nü yamlarünü yübah ha Filistiabuh kheak keochihbah.”

³³Saulnü David ki tha, “Nünü ha Filistiabuh bede keochihpü müyükhuk; tümüde nü azürü ah, tüsho api a athunu kim chingnü thirithsüde arükheah.”

³⁴Tüshe Davidnü Saul ki tha, “Nü yamlarü a abuh yo namfimihnu neakde lachoh; tüsho küyimki kekhüzü yungsho kuto arübah namfimihnunu lubanü,

³⁵inü adunglim yübah laksahde amün chingnü namfimihnunu khümkhit; tüsho I kilim rholobah arüsho, inü amükhüh kheak tholobah rhakmülün, tüsho laksah.

³⁶Nü yamlarünü kekhüzü tüsho kuto ane chido laksahdo; tüsho ha tsütamübahkhi Filistiabuh she arü ruk labah, tümütüsho apinü arhang Thrünpuh ki wüntre müjih.”

³⁷Davidnü tha, “ATUNGPUH , shepünü kekhüzü tüsho kuto münjak chingnü I khümkhitkheanü apinü ha Filistiabuh khah chingnü I khümkhitbah.” Jumonü Saulnü David ki tha, “Yüang, tüsho ATUNGPUH nü lung lashang!”

³⁸Saulnü David kheak thirithsü zülu khümyukjih; apinü müwayinchi kuthran aku kheak thranjih tüsho shihküp pangkhümpü khümjih.

³⁹Davidnü thirithsü zülu kheak Saul yo nukshang nokih, tüsho tsahakheah, tümüde apinü judürü müyihakheah. Tüsho Davidnü Saul ki tha, “Inü harü yihbah mütsahkhuk; tümüde harübo müyihakheah.” Jumonü Davidnü yihkhita bah.

⁴⁰Tüsho apinü tso akhah ching lu tüsho ayung chingnü lung athulung phüngü moa lu, tüsho api yo mihnu neakrü qiuqiu ching yuk; lunghitliu akhah ching lakheah, tüsho apinü Filistiabuh thüninde yü.

⁴¹Goliathnü api müngüh tsungshuhrü bebah David thüninde arü.

⁴²Küyimki Goliathnü David ngükhea, apinü münejih, tümüde api athunu, mürümmürido tüsho trungdung atsü lakheah.

⁴³Judüki Goliathnü David ki tha, “I khihnu ah de lümbah tso shuhbah arücho de?” Tüsho Goliathnü api thrünpuhbo jide David muthrumünean.

⁴⁴Goliathnü David ki tha, “I kilim arang, tüsho inü nü shihtsü thüning wuhnubo tüsho thulu ching lakhi mütüm shiwühbo kipanü.”

⁴⁵Tüshe Davidnü Goliath ki tha, “Nünü nukshang, thsüh tüsho thsühshang shuhbah I kilim arang; tüshe I a nünü mükhemükimkhi Israel bonungrü Thrünpuh Wuto ATUNGPUH mung chingnü arübah.

⁴⁶Khihni ha nimung ching ATUNGPUHNÜ nü I khah ching yukjihbah, tüsho inü nü kinga yapshihbah tüsho nü ku lipshakbah; tüsho inü Filistia bonungrü ashemibo ha nimung ching thüning ching lakhi wuhnubo tüsho alo kheak lakhi mütüm shiwühbo kilim jihbah, junangde Israel ching Thrünpuh khülang lah de alomi alalanü amükheahbah,

⁴⁷tüsho junangde ATUNGPUHNÜ nukshang tüsho thsühnü mükhümkhit de ha amukhungrübonü amükheahbah; tümüde thirithsü ju ATUNGPUH yo tüsho apinü nüsa ju isa khah ching jihbah.”

⁴⁸Küyimki Goliath ju David shorupü phünide arükhea, Davidnü Goliath shorupü keochihpung alihde yü.

⁴⁹Davidnü aqiuqiu chingnü lung khülang thrükhita hita yüshihbah Goliath kingang kheak kingshih; lung ju akingkang ching lakyuk, tüsho amiro koyubah alo ching lunga yap.

⁵⁰Jumonü Davidnü nukshang mushuhde lunghitliu khülang tüsho lung khülangnü Goliath kinga lungshih tüsho api laksah.

⁵¹Judüki Davidnü shande yübah Goliath kheak zhip; api nukshang kheak tholobah nuktrüp chingnü dukkhit, tüsho api laksah; tüsho apinü aku lipshak. Küyimki Filistiarübonü arü wühkenobuh shekhi ngükhea, arünü shande tso.

⁵²Israel tüsho Juda bonungrübo ahode asürü tüsho Gath le Ekron ripit khiungde Filistiarü yande yü, junangde Filistiarü yurirübo Shaaraim chingnü Gath tüsho Ekron khiungde limro ching angaka yap.

⁵³Israelrübonü Filistiarü müshamkhi chingnü alode arü, tüsho arü khimyam luka lujih.

⁵⁴Davidnü Goliath ku lu tüsho Jirusalem lim hande arü; tüshe apinü Goliath thsühnukbo anihbuh khimyam ching zo.

⁵⁵Küyimki Davidnü Goliath azhihde ayükhi Saulnü angükhea, apinü bonungrü limthobuh Abner ki tha, “ Abner, ha shepü tsührü a?” Abnernü tha, “O kiulongthsüpuh, nü rhangdung la khiungde, inü mümükheah.”

⁵⁶Kiulongthsüpuhnü tha, “Shepü tsührüanü yimkhitang.”

⁵⁷Filistiarü laksahbah David alunglochoki, api khah ching Goliath ku zhimbah Abnernü api Saul ki bedarü.

⁵⁸Saulnü api ki tha, “ Athrününgtsüng, nü shepü tsührü a?” Tüsho Davidnü alo, “I Bethlehemrü nü yamlarü Jesse tsührü ah.”