Read Yimchungru Naga 1 Sam 18 Bible Online

1 Sam 18 - Yimchungru Naga bible

1 Sam 18

¹Küyimki Davidnü Saul ki asukachihkhamkhea, Jonathan menü David me kheak lümshede kam, tüsho Jonathannü nihbuh me nangde api muzho.

²Ju nimung Saulnü api bea lu tüsho abuh yam lim alode müyüshih.

³Judüki Jonathannü David kheak tangzüng khülang thsü, tümütüsho anihbuh me nangde api muzho.

⁴Jonathannü ayihkhi shulünkhim trünkhia api thirithsü zülu tüsho nukshang, sanglüh tüsho chimrümbe David kilim jih.

⁵Davidnü yü tüsho kürü ching Saulnü api yüshihkheanü akuk ngü; ju ayannü Saulnü api bonungrü kurungkheak aberü kamshih. Tüsho mihtsürü alala, Saul yamlarübonü she leangkhijih.

⁶Davidnü Goliath laksahbah alodarüshu arübo thüyam lim arüchoki, Israel kiutobo chingnü aliberübo khün thsüde tüsho tsünde kiulongthsüpuh Saul shorupü züpzüppü shuhbah, asühkhi khünbo thsüde tüsho khün khungbebo shuhbah arü.

⁷Tüsho aliberübonü asühachihchoki khülangnü khülang ki khün thsü, “Saulnü chithürübo laksah, tüsho Davidnü chithürü thürübo laksah.”

⁸Saulnü khide bukakhiuk, tümüde ha thakhinü api masühde kam. Apinü tha, “ Arünü David ki chithürü thürübo tha, tüsho I ki chithürübo tha; arünü api ju kiulongthsürü kamshihpü thsüchoh!”

⁹Jumonü Saulnü David kheak ju nimungnü mükthsüde kam.

¹⁰Ashidopü amünean me Thrünpuh kilimnü Saul kheak arü tüsho api yam ching abünrü nangde thazüthado, judüki David a nimung aban khungkhi nangde bingkhung ju khung. Saul a akhah ching thsüh zhima lakheah;

¹¹tüsho Saulnü thsüh ju jipa yüshih, tümüde apinü lüm, “Inü David ju rhü kheak kheankihbah.” Tüshe Davidnü mahne ki jukphülapabah.

¹²Saulnü David tre tümüde api lung ATUNGPUH lakheah tüshe Saul kheaknü a chamkhiabah.

¹³Jumonü Saulnü anihbuh mikinü api tsoshih, tüsho chithürü kurungkheak limthorü kamshih; tüsho Davidnü bonungrü thirithsü ching limbe.

¹⁴Davidnü arhimokhi alala ching akuk ngü; tümüde ATUNGPUH api lung lakheah.

¹⁵Küyimki apinü akuk ato ngükhi Saulnü angükhea, api trede anihbuhnü zhip.

¹⁶Tüshe Israel tüsho Juda alalanü David muzho, tümüde api ju arübo kukzam limberü lakheah.

¹⁷Judüki Saulnü David ki tha, “ Ha ching I tsührü adüjibe Merab lah; inü api nü kilim yamkhünbe thsüpü jihbah; I thsungkheaknü mulong ato thsang tüsho ATUNGPUH thirithsü ching keochihang.” Tümüde Saulnü lüm, “Inü api azhihde khah muchung; Filistiarünü ju rhimoshang.”

¹⁸Davidnü Saul ki tha, “I kiulongthsüpuh tsühmeak thsüpü thsüde Israel ching I le I keoniorübo tüsho I buhtsührübo ju she a?”

¹⁹Tüshe Saul tsührü Merab ju David kilim jihpü lakhi kim ching, anihbe Meholarü Adriel kilim aniube thsüpü jih.

²⁰Kheakü Saul tsührü Mikalnü David muzho. Saulnü ju sobah asühde lüm.

²¹Saulnü lüm, “Inü anihbe api kilim jihbah alibe ju anihbuh thsungkheak qimürip thsüshihanü tüsho Filistiarünü api laksahbah.” Jumonü mahne kipü Saulnü David ki tha, “ Kheakü nü I tsühmeak thsübah.”

²²Saulnü ayamlarübo ki thiyukhüm jih, “Bemuwuhbah David ki thaang, ‘ Kheahang, kiulongthsüpuhnü nü kheak asühlah, tüsho ayamlarü alalanü nü muzholah; jumonü kheakü kiulongthsüpuh tsühmeakrü kamang.’”

²³Jumonü Saul yamlarübonü harü yubo ramde David ki thaa huh. Tüsho Davidnü tha, “I zhochihrü mihtsürü tüsho tümü mükamrü khülangnü kiulongthsüpuh tsühmeakrü thsüpü anikhüh nangde nüsanü kheahcho de?”

²⁴Saul yamlarübonü Davidnü athakhi api ki thaa huh.

²⁵Judüki Saulnü tha, “Nüsanü David ki ha thaang, ‘ Kiulongthsüpuhnü yihlukhi dünkheak tümü mulune tüshe Filistiarü küp 100 lang lunelah, junangde apinü kiulongthsüpuh riri kheak royimbah.’ ” Kheakü Saulnü David ju Filistiarü khah hode akeamshihpü lümkhi thsü.

²⁶Küyimki api yamlarübonü harü yubo David ki thakhea, Davidnü kiulongthsüpuh tsühmeak thsüpü asühde kam. Kim muhoyide,

²⁷Davidnü amihtsürübo lungnü yü tüsho Filistiarü 200 laksah; tüsho Davidnü api kiulongthsüpuh tsühmeak thsüpü thsüde arü yoküpbo khemütsana kiulongthsüpuh kilim handarü jih. Saulnü api kilim yamkhünbe thsüpü atsührü Mikal jih.

²⁸Tüshe küyimki David lung ATUNGPUH lah de Saulnü alümlokhea, tüsho Saul tsührü Mikalnü api muzhokhea,

²⁹Saulnü kheaküshe David khide tre. Jumonü ju kim chingnü Saul ju David riri lakheah.

³⁰Judüki Filistiarü bonungrü keochihpü akhiuk; tüsho arü akhiukkhi aban Saul yamlarübo kheaknü Davidnü alü thsüde akuk ngü, junangde api mungshikhi khide ato kam.