Read Yimchungru Naga 1 Sam 19 Bible Online

1 Sam 19 - Yimchungru Naga bible

1 Sam 19

¹Saulnü atsührü Jonathan tüsho ayamlarü alala ki David laksahpü dünkheak tha. Tüshe Saul tsührü Jonathannü David kheak khide asühde alakheah.

²Jonathannü David ki tha, “I buh Saulnü nü laksahpü yimchoh; jumonü shido yapsu rhüngrhüngang; asük ching jikabahang.

³Inü awukhiukbah tüsho nü jikpung thulu ching I buh rheang ki zhipbah, tüsho inü I buh ki nü dünkheak thabah; inü tümükhüh mükheahsho nü ki thabah.”

⁴Jonathannü David dünkheak abuh Saul ki tsüde asuk, “ Kiulongthsüpuhnü nihbuh yamlarü David azhihde neak müyihbeakbeah, tümütüsho apinü nü azhihde neak müyihbeak, tüsho api rhimo nü ki khide atsü lado;

⁵tümüde apinü Filistiarü yanchoki arhangdung shuhmülanga jihdo, tüsho ATUNGPUHNÜ Israel alala thsungkheak akuk ngükhi ato handarüdo. Nünü ju ngü tüsho asühachihdo; dale tümü thsükhi amülim mülarü David laksahkhinü neak yihbeakba le?”

⁶Saulnü Jonathan yu ani; Saulnü thiyuchihchim thsü, “ATUNGPUH mung chingnü, api müsheshih.”

⁷Jumonü Jonathannü David jibah harübo alala api ki thaa huh. Judüki Jonathannü David ju Saul ki bedarü, tüsho akhuhlim ruk api miki la.

⁸Kheaküshe judüki thirithsü lakheah, tüsho Filistiarü bede keochihpü David wukhiuk. Apinü khide müzhakde arü yan, junangde arübo api müngüh tso.

⁹Judüki Davidnü khün khungde tüsho Saul khah ching thsüh shuhbah ayam ching binchoki, ATUNGPUH kilimnü amünean me Saul kheak arü.

¹⁰Saulnü David ju rhü kheak athsühnü akheankihpü mürang; tüshe apinü Saul kheaknü jukphülap, jumonü athsüh ju rhü ching kheankih. Davidnü ju re shande tsokhi.

¹¹Saulnü api yapsu laksahpü lümkhi thsüde David yam ching api kheahde yunithsürübo yüshih. David niube Mikalnü api ki tha, “Nünü khihre nü rhangdung mütsokhisho, nü shido laksahbah.”

¹²Jumonü Mikalnü David ju ayinripit chingnü yükishihbah api shande tsokhi.

¹³Mikalnü sangthsü khülang lubah yapkiu kheak yapshih; anihbenü mihnu nam aku kheak yihkihbah khimnü phudoa zojih.

¹⁴Küyimki Saulnü David rampü yunithsürübo yüshihkhea, anihbenü tha, “ Api tukthsülah.”

¹⁵Judüki Saulnü David kheahpü yunithsürübo yüshih. Apinü tha, “ Api I kilim yapkiu ching bebah atuang, junangde inü api laksahbah.”

¹⁶Küyimki yunithsürübo azahkhea, sangthsü ju mihnu namnü aku muhiubah yapkiu kheak lakheah.

¹⁷Saulnü Mikal ki tha, “ Tümü thsükhi ha ruk nünü I rükakibah I riri tsokhishihkhea?” Mikalnü Saul ki alo, “ Apinü I ki tha, I tsoshang; tümü thsüpü inü nü laksahpü?”

¹⁸Kheakü David shande tsokhi; apinü Samuel kilim Rama ching arü, tüsho anihbuh kheak Saulnü arhimokhi alala api ki thaa huh. Api tüsho Samuel ane yübah Naioth ching la.

¹⁹Saul ki tha, “David a Rama lomi, Naioth ching lah.”

²⁰Judüki David rampü Saulnü yunithsürübo yüshih. Küyimki Samuelnü limberü thsübah wukihrübo müchitde arünü angükhea, Thrünpuh Me Saul yunithsürübo kheak arü, tüsho arü she müchitmudude kam.

²¹Küyimki Saulnü asokhea, apinü yunithsürü püpü yüshih, tüsho arü she müchitmudude kam. Saulnü mahsam kipü yunithsürü yüshih, tüsho arü she müchitmudude kam.

²²Jushu anihbuh Rama ching yü. Apinü Seku ching lakhi kekhip ato ching arü; apinü keokhi, “Samuel tüsho David küching la?” Tüsho khürünü tha, “ Ane a Rama ching lakhi Naioth ching lah.”

²³Apinü Rama ching lakhi Naioth limpeang yü; tüsho Thrünpuh Me api kheak arü. Api yüde alachoki, Rama ching lakhi Naioth mukhiungyi khiungde api müchitmudude kam.

²⁴Api she khimmih yihkhita bahbah Samuel miki müchitmudude kam. Api ju nimung tüsho tsüngre amuyung bünkeang yap. Jumonü arünü tha, “Saul she wukihrü bolung bela de?”