Read Yimchungru Naga 1 Sam 2 Bible Online

1 Sam 2 - Yimchungru Naga bible

1 Sam 2

¹Hannanü tamkhüntamnü tüsho tha, “I mulongnü ATUNGPUH lung asühchoh; I sühmüh ATUNGPUH lung shuhkihdo. Inü I riri ki münejihchoh, tümütüsho inü akukkhi ching I asühchoh. @SP ACE =

²“ATUNGPUH nangde sheshe Amüsüh müla, nü hobah sheshe müla; isa Thrünpuh nangde sheshe Lung müla.

³Khide kükheangde thiyu dütha, akükheang yu nü mün chingnü dakhiukshih; tümüde ATUNGPUH ju mükheahmudu Thrünpuh ah, tüsho apinü rhimobo adünchoh.

⁴Wuto sanglühbo zhakabahdo, tüshe sühmüh mülarübo reangzahchoh.

⁵Sherübo bukthsüde alakheanü arü zangrü tsühyungpü thsungkheak mulomüthsüdo, tüshe sherübo khümde alakheanü abahkhi tsühyungbenü arü shih kihdo. Aniungyüh liberünü thüne zübedo, tüshe tsührü hihde alakhi liberü dütsüpabahdo.

⁶ATUNGPUHNÜ laksahchoh tüsho rhangdung lashihchoh; apinü Ashe-lomi ching beyukchoh tüsho asürüloshihchoh.

⁷ATUNGPUHNÜ zhochihrü kamshihchoh tüsho alarü kamshihchoh; apinü thokhichoh tüsho apinü shuhkihchoh.

⁸Apinü zhochihrü asungthulung chingnü bemusuchoh; apinü mülamüthsürü awah mujung kheaknü, arübo kiulongthsürü tsührü lung binshihpü tüsho müretahkhi binkiu yamrüplurüp lushihpü shuhkihchoh. Tümüde alomi dungjingbo ju ATUNGPUH yo ah, tüsho jurü kheak apinü alomiküp zo. @SP ACE =

⁹“ Apinü api kheak düküngde alarü rhangdung aheangbah, tüshe amütsürübo amiting ching dükheakbah; tümüde nihbuh sühmühnü akuk müngüchoh.

¹⁰ATUNGPUH azhihrü dükheakshihbah; Khide Achangbuhnü thüning ching tsüng mukbah. ATUNGPUHNÜ alomi alala mahkhapbah; apinü api kiulongthsüpuh kilim reangzahshihbah, tüsho apinü amüsühkhitkhi wu shuhkihbah.”

¹¹Judüki Elkananü Rama ching thüyam lim yü, tüshe azübuh a amükeambuh Eli miki ATUNGPUH tankih.

¹²Kheakü Eli tsührübo mihyuchi ching mülarü lakheah; arünü ATUNGPUH mümükheah.

¹³Tüsho amükeamrübonü mihtsürübo ki rhimopü yak ju, küyimki khürünü laksah-a kingaünbanü, shih khiungde alachoki amükeambuh yamlarünü shihkhoyang amüzhean mahsam akhah chingnü lubah arübah,

¹⁴tüsho apinü adükihkhi phüh ching düchipa yüzahshihbah; shihkhoyangnü thokhitkhi alala amükeambuhnü alubah. Ha ruk arünü Shilo ching arürü Israelrü kheak rhimo.

¹⁵Kheaküshe amüdang mütakyide, amükeambuh yamlarünü arübah laksah-a kingaünbuh ki thabah, “ Amükeambuh thsungkheaknü amüthreangpü shih jihang; tümüde apinü akhiungkhi shih nüsa kilimnü müleangkhi, tüshe arhang lang.”

¹⁶Tüsho mihtsürü khürünü api ki thabah, “ Arünü akhuhde amüdang takshang, tüsho nünü tümüpürü künlanü luang,” apinü athabah, “Yung, nünü kheakü jihbeah; jude yungsho, inü muhdü lang alubah.”

¹⁷Hanangde Eli tsührübo neak ATUNGPUH miki khide tode alakheah; tümüde arünü ATUNGPUH kilim kingaünkhi junode kheakrak.

¹⁸Azübuh Samuelnü khim zhingzhing yihbah ATUNGPUH miki tankihde alakheah.

¹⁹Abenü shulünkhim anini keakjih tüsho kam abande laksah-a kingaünpü aniubuh lung wutuchoki, ju api kilim kam abande lujihbah yü.

²⁰Judüki Elinü Elkana tüsho aniube müngühjihde tha, “ Alibenü ATUNGPUH kilim thsambah jihkhi dünkheak ha liberü hode nü kilim tsührü jihshang”; tüsho arübo thüyam lim alode arü.

²¹Tüsho ATUNGPUHNÜ Hanna müngühjih; anihbe mübünkeangde kam tüsho athrürü 3 tüsho aliberü 3 zübejih. Tüsho azübuh Samuel ATUNGPUH miki zode asürü.

²²Kheakü Eli khide ashinbuhrü lakheah. Atsührübonü Israel kheak rhimokhi tüsho arübonü ashorupung khimyam ripit ki tankihrü liberübo kheak nungkhi alala so.

²³Apinü arü ki tha, “ Tümüde nüsanü hadürü rhimocho? Tümütüsho nüsanü amütsü rhimokhibo harü mihtsürü kilimnü inü sodo.

²⁴Yung, I tsührübo; ATUNGPUH mihtsürü bolung bekhi inü asokhi ha thiyusheak atsü yung.

²⁵Mihtsürü khürünü püpürü azhihde neak yihbeaksho, Thrünpuhnü api mahkhapbah tüshe khürünü ATUNGPUH azhihde neak yihbeaksho, shepünü neak kheangjihpü?” Tüshe arünü arü abuh düsheak mani; tümüde arü laksahpü ju ATUNGPUH lümkhi lakheah.

²⁶Kheakü azübuh Samuel ju trungdung tüsho ATUNGPUH le mihtsürübo mürühkhi ching zode kam.

²⁷Thrünpuh mihtsürü khülang Eli kilim arü tüsho api ki tha, “ Hanangde ATUNGPUHNÜ thachoh, ‘ Küyimki nü pü Ijip ching Pharao yamkhün bukkhüp azhorü lakheanü inü I amikheak akhiuka huhdo.

²⁸Api I yo amükeamrü thsüpü kingaün sadam kheak wutupü, rhümthüneabe jihpü tüsho I miki khim zhingzhing phuyupü inü api Israel trükbo alala chingnü mokhit; tüsho Israel mihtsürübonü I ki taka kingaünkhi alala inü nü pü yamkhün kilim jih.

²⁹Dale küde thsah inü thiyukhüm jihkhi laksah-a kingaünkhi tüsho jihchungkhibo kheak mükhütde kheahcho, tüsho I mihtsürü Israelrünü kingaünkhi atsüdakbe shihcham lude nüsa shih kihde I kheaknü nü tsührübo ki wüntre jihcho?’

³⁰Jumonü ATUNGPUH Israel Thrünpuhnü thachoh: ‘Nü yamkhün tüsho nüsa jipürü yamkhün lünnü I miki yüzahbah tüsho awukhiukbah de inü thiyuchihchim thsü’; tüshe kheakü ATUNGPUHNÜ thachoh: ‘I kheaknü limshuabahang; tümüde shepünü I wüntrecho inü wüntrebah, tüsho shepünü I khenochonü junode arhimobah.

³¹Kheahang, inü nü sühmüh tüsho nü jirüpürü yamkhün sühmüh lipshaka bahjihpü kim khülang arümuroh, junangde nü yamkhün ching sheshe shinde müla.

³²Judüki Israel püpürü kheak inü müngühmühi alala jihkhi nünü küpkhukkhinü lunede akheahbah; tüsho nü yamkhün ching sheshe shinde müla.

³³Tüshe nüsa bolung shepü I kingaün sadam kheaknü müdükheakshihnü, apinü nü mük tukshihbah tüsho nü mulong thsünüshihbah; nü yamkhün ching lakhi alala thsühnuknü ashebah.

³⁴Nü tsührü mahne, Hophni tüsho Phinehas kheak dünjikhinü nü ki amütsan labah — ane chido nimungkhühnü ashebah.

³⁵Inü I thsungkheak athülünkhi amükeamrü khülang mokhitbah, apinü I mulong ching tüsho I lümkhi ching lakhi yande arhimobah. Inü api kilim amütsankhi thüyam thsüjihbah, tüsho apinü lünnü inü amüsühkhitkhi miki tsahbah.

³⁶Nü yamkhün ching aninga larübonü shotoyinchi kheam yungsho yikhap kheangde api ki mushude arübah, tüsho athabah, Muzhobah amükeamrü rhimo ching I yüzahshang, junangde inü yikhapkheam tsühanü.’ ”