Read Yimchungru Naga 1 Sam 20 Bible Online

1 Sam 20 - Yimchungru Naga bible

1 Sam 20

¹David a Rama ching lakhi Naioth chingnü shande tso. Apinü Jonathan miki arübah tha, “Inü tümü rhimoa la? I amülim tümü a? Tüsho nü buhnü I rhangdung lupü mürangpü thsüde inü api azhihkhi neak tümü a?”

²Apinü anihbuh ki tha, “ Ju kheaknü limshuang! Nü müshe. I buhnü I ki müthadüa ato yungsho anini tümü she müthsüchoh; tüsho tümü thsükhi I buhnü ha I kheaknü arampü? Küyimkishe yung!”

³Tüshe Davidnü she thiyuchihchimde tha, “Nünü I muzholah de nü buhnü tsüde mükheahlah; tüsho ha Jonathannü dümükheahshih jude yungsho api mulong rozhakbah de apinü lümchoh. Tüshe tsükjide ATUNGPUH tüsho nü lale, I tüsho ashepü dükeak jingdükü zahlah.”

⁴Judüki Jonathannü David ki tha, “Nünü tümüpürü thachonü, inü nü thsungkheak rhimobah.”

⁵Davidnü Jonathan ki tha, “Shido a khinu aso ah, tüsho yimtsühchoki I kiulongthsüpuh ki binpü mülakphahbeah; tüshe I tsoabahanü, junangde mahsam re khiungde I thulu ching jikbah.

⁶Apinü I khide mürheangsho, thaang, ‘David a api kiuto Bethlehem lim niokheamde ayüpü I ki mushude kheangdo; tümüde ju ching yamkhün alala thsungkheaknü kam abande laksah-a kingaünpü lah.’

⁷Apinü tsülah de thasho, nü yamlarü tsüde alabah; tüshe apinü bukakhiuksho, apinü amütsü rhimopü lümkihdo de mükheahang.

⁸Jumonü nü yamlarü ki muzhode rhimoang, tümüde nünü nü yamlarü amüsüh tangzüngkhi ching nü lung bedarüdo. Tüshe I kheak amülim lasho, nünü I laksahang; tümü thsüpü nünü I nü buh ki bede ayüpü?”

⁹Jonathannü tha, “ Ju nü kheaknü limshuabahang! Nü kheak amütsü rhimopü I buhnü alümkihkhi inü mükheahbah inü nü ki müthapü?”

¹⁰Judüki Davidnü Jonathan ki tha, “Nü buhnü nü ki müküpde alokhi shenü I ki thaba?”

¹¹Jonathannü David ki alo, “ Arang, ike thulu ching yüanü.” Jumonü ane chido thulu ching yü.

¹²Jonathannü David ki tha, “Israel Thrünpuh, ATUNGPUH thiyumütsan lah! Küyimki inü shido yungsho zhihdo I buh ki mün akhiukbanü, tüsho apinü David kilim lümkhi tsüsho, inü thiyia arü nü ki müthashihba de?

¹³Tüshe I buhnü thsümünimpü lümsho, tüsho inü nü ki thaa muhuhde nü thiyia tsoshihbah tsüde tsokhisho, ATUNGPUHNÜ Jonathan kheak alübe she rhimoshang. I buh lung lakhi nangde, ATUNGPUH nü lung lashang.

¹⁴I kheaküshe rhangdung lasho, ATUNGPUH thiyuro amuzho I ki huhang; tüshe I shesho,

¹⁵ATUNGPUHNÜ David riribo alomi kheaknü shahde dükheakshih-a lalashe nü thiyuro amuzho I yamkhün kheaknü düluakhin.”

¹⁶Hanangde Jonathannü David yamkhün ki tangzüngde tha, “ATUNGPUHNÜ David riribo yimkhitshang.”

¹⁷Kheaküshe Jonathannü David ki anihbuh ki muzhopü thsungkheak thiyuchihchimshih; tümüde nihbuh rhangdung muzhokhi nangde apinü anihbuh muzho.

¹⁸Jonathannü api ki tha, “Shido a khinu aso ah; nü mülakhi mütsanbah, tümütüsho nü binpung akeangkeang labah.

¹⁹Zhihdo, nü limro ashang ching yükibah; nü jikpü lakhi dangpung ching nahde yüang, tüsho ju ching lung-mutrung mubuhbah binang.

²⁰Alungki ching kipkhi nangde inü ju mungyean hühzo mahsam kipbah.

²¹Judüki inü azübuh ki thiyu thaa arüshihbah, ‘Yüang, tüsho yimang.’ Inü azübuh ki, ‘ Kheahang, hühzobo nü rheang ki lah, jurübo momukhungang,’ de thasho judüki nü arübah, tümüde, ATUNGPUH lale ha nü thsungkheaknü akhümkhit lah tüsho tümü müthsü.

²²Tüshe inü azübuh ki thabah, ‘ Kheahang, hühzobo nü hobah lah,’ judüki yüang; tümüde ATUNGPUHNÜ nü thiyia tsoshihkheah.

²³Nü tüsho inü athakhi dünkheak, lünnü nü tüsho ike dükeak ATUNGPUH thiyumütsan lah.”

²⁴Jumonü Davidnü thulu ching jikabah. Küyimki khinu aso thünio arükhea, yimtsühpü thsüde kiulongthsüpuhnü bin.

²⁵Püpüki nangde kiulongthsüpuhnü rhü yean lakhi api binkiu kheak bin. Abner ju Saul rheang ki binchoki Jonathan a wusu; tüshe David binpung akeangkeang lakheah.

²⁶Saulnü ju nimung tümü she mütha; tümüde apinü lüm, “ Api kheak tümükhüh dünjia lah; api mümüsüh, tsükjide api mümüsüh.”

²⁷Khinu aso mahne nipü, David binpung akeangkeang lakheah. Tüsho Saulnü atsührü Jonathan ki tha, “ Tümü thsükhi Jesse tsührü yini le khihni thünio ching marü le?”

²⁸Jonathannü Saul ki alo, “Davidnü api Bethlehem lim yüpü I ki mushude kheangdo;

²⁹apinü tha, ‘I yüshang; tümüde isa yamkhünnü kiuto ching laksah-a kingaünpü lah, tüsho ju ching beshihpü I khiungnü I ki thiyukhüm jihkheah. Jumonü kheakü, nü miki I muzhoa lasho, I yüanü, tüsho I khiungmungrübo shoruanü.’ Hamonü api kiulongthsüpuh dükhüm kheak marü.”

³⁰Judüki Saulnü Jonathan kheak bukakhiukkhi alü kam. Apinü anihbuh ki tha, “Nü akin mülakhi, azhihde awusurü aliberü tsührü! Nü tüsho nü be achih ngüpü thsüde nünü Jesse tsührü mokhitdo de inü mümükheah de?

³¹Tümüde alomi kheak Jesse tsührü rhangdung lakhi khiungde nü yungsho nü kiulongthsü mülakhuk. Kheakü yüshang tüsho api I ki bede arang, tümüde api tsükjide ashebah.”

³²Judüki Jonathannü abuh Saul ki alo, “ Tümü thsükhi api asheshihpü? Apinü tümü rhimoa la?”

³³Tüshe Saulnü Jonathan kheanpü thsüh jipa yüshih; jumonü abuhnü David laksahpü mulongkhitdo de Jonathannü mükheah.

³⁴Jonathannü abukakhiukde dükhüm kheaknü asürü tüsho ju khinu, mahne nipü apinü müyimtsüh, tümütüsho api ju David dünkheak tüzhode alakheah, tüsho abuhnü api achih kipde rhimodo.

³⁵Yapsu Jonathannü David shorupü thulu ching yü tüsho api lung azürü anini bekheah.

³⁶Apinü azübuh ki tha, “ Alihde yüang tüsho inü akipkhi hühzobo yimang.” Anihbuh alihde ayüchoki apinü api hode hühzo kipa yüshih.

³⁷Küyimki Jonathannü hühzo kipa ayokhishihpung azübuh yükhea, Jonathannü azübuh jibahle tha, “ Hühzo nü hode yüdo yung de?”

³⁸Jonathannü azübuh ki ji, “Nahdang, niokheamang, dütuklo.” Jumonü azübuhnü hühzobo momukhung tüsho nihbuh atungrü ki arü.

³⁹Tüshe azübuhnü tümü mümükheah; Jonathan tüsho David anenü lang ju mükheahlah.

⁴⁰Jonathannü api thsühnukbo azübuh ki jihbah tha, “ Jurübo kiuto ching hanbah yüang.”

⁴¹Azübuh tsoabahshu, Davidnü lung-mutrung khüpnü asürü tüsho amiro alo lim mükhümbah Jonathan ki mahsam ki khukning. Anenü müthsüpachih, tüsho tripachih; Davidnü alübe trip.

⁴²Judüki Jonathannü David ki tha, “ Mungtsü chingnü yüang, tümüde ike chidonü ATUNGPUH mung chingnü thiyuchihchimde tha, ‘Ike dükeak, tüsho I tsühsoniuso le nü tsühsoniuso dükeak lünnü ATUNGPUH labah.’” Apinü asürü tüsho tsoabah; tüsho Jonathan a kiuto ching yü.