Read Yimchungru Naga 1 Sam 24 Bible Online

1 Sam 24 - Yimchungru Naga bible

1 Sam 24

¹Küyimki Filistiarü müshamkhi chingnü Saul alode alungkhea, api ki tha, “David Engedi sunglo ching lah.”

²Judüki Saulnü Israelrü alala bolungnü amokhitkhi mihtsürü 3000 bea lu, tüsho David le amihtsürü yimpü Mütüm Mihnu Lungtobo limpeang yü.

³Apinü lungkhün lapung namfimihnu yam lakhi limro yean arü; tüsho Saul ju sühakhima lupü yü. Kheakü David le amihtsürübo lungkhün alunglim peang binde alakheah.

⁴Mihtsürübonü api ki tha, “ Ha ATUNGPUHNÜ nü ki asukkhi nimung lah, ‘Inü nü riri nü khah ching jihbah, tüsho nü tsükhi api kheak rhimobah.’ ” Judüki Davidnü chinde yükibah Saul shulünkhim münkheam nipkhia lu.

⁵Ju dunglim David mulong ching qiu tümütüsho apinü Saul shulünkhim münkheam nipkhia lu.

⁶Apinü amihtsürübo ki tha, “ATUNGPUHNÜ mujude-mokhitkhi I tungpuh kheak I khah dünkihpü ATUNGPUHNÜ I kilim danlah; tümüde api ATUNGPUHNÜ mujude-mokhitkhi lah.”

⁷Jumonü Davidnü amihtsürübo khitode müdan tüsho Saul laksahpü arü ki mümülü. Judüki Saul asürübah lungkhün chingnü tso, tüsho api limro ching yü.

⁸Ju dunglim David she asürübah lungkhün chingnü wukhiuk tüsho Saul ki ji, “I tungpuh kiulongthsüpuh!” Küyimki Saulnü adunglim rholoa kheahkhea, Davidnü amiro alo lim mükhümbah khukning tüsho akin jihde huh,

⁹Davidnü Saul ki tha, “ Tümü thsükhi Davidnü nü thsümünimpü yimchoh de atharü yu anicho?

¹⁰Künangde ATUNGPUHNÜ lungkhün ching nü I khah ching jihkheanü ha nimungnü nü müknü ngüdo; tüsho khürünü nü laksahpü I ki athsung, tüshe inü nü khümkhit. Inü tha, ‘I tungpuh azhihde I khah mushuhkih; tümüde api ATUNGPUHNÜ mujude-mokhitkhi lah.’

¹¹Abuh, nü yo shulünkhim münkheam I khah ching ha kheahang; tümüde atsütsü inü nü yo shulünkhim münkheam nipkhia lu, tüsho nü mülaksah, ha hode I kilim amülim yungsho azhihkhi müla de nünü amükheahbah. Nünü I rhangdung lupü jima lalashe, inü nü azhihde neak müyihbeak.

¹²ATUNGPUHNÜ I le nü dükeak mahkhapshang! ATUNGPUHNÜ nü kheak I royimshang; tüshe I khahnü a nü kheak mazhih.

¹³Awün müchitmudukhinü thachoh, ‘ Mihbukmuyuk rhimorü chingnü mihbukmuyuk rhimo akhiukchoh’; tüshe I khahnü a nü mazhih.

¹⁴Shepü azhihde Israel kiulongthsüpuh akhiukkhea? Nü shepü müshamcho? Ashekhi yihnu khülang a shi? Thüle khülang a shi?

¹⁵Jumonü ATUNGPUHNÜ mahkhapshang, tüsho ike dükeak alim jihshang. Apinü ju kheahshang tüsho I kheak muzhode I nü khah chingnü khümkhitshang.”

¹⁶Küyimki Davidnü harü yubo Saul ki thakhamkhea, Saulnü tha, “I tsührü David, ju nü düsheak a de?” Saulnü adüsheak achangnü trip.

¹⁷Apinü David ki tha, “Nü a I kheaknü khide thiyuro ah; tümüde inü nü ki amütsü rhimo she nünü a I ki atsü rhimodo.

¹⁸ATUNGPUHNÜ I nü khah ching yukjihbah nünü I mülaksahde I ki atsü rhimokhi khihni nünü huhdo.

¹⁹Tümüde shepünü nihbuh riri ngübah khümkhita tsoshihdü le? Jumonü khihni nünü I ki atsü rhimokhi dünkheak ATUNGPUHNÜ nü kilim thsambah jihshang.

²⁰Kheakü tsükjide nü kiulongthsürü thsübah de inü mükheahlah, tüsho Israel kiulongthsü nü khah ching labah.

²¹Jumonü I dunglim nünü I tsühsoniuso müdükheakshih yungsho I buh yamkhün chingnü I mung nandoa mübah de ATUNGPUH mung chingnü I ki thiyuchihchimang.”

²²Jumonü Davidnü ha Saul ki thiyuchihchim. Jushu Saul thüyam lim yü; tüshe David le amihtsürübo a arü jikpung lim wutu.