Read Yimchungru Naga 1 Sam 27 Bible Online

1 Sam 27 - Yimchungru Naga bible

1 Sam 27

¹Davidnü amulong chingnü tha, “ Kheakü nimung khülang ching I Saul khah hode ku kheambah; I thsungkheaknü Filistiarü lomi ching tsokhide ayüpü kheaknü tümü atsüdakbe müla; jushu Israel lomi ching Saulnü I yimkhi chingnü atuklobah, tüsho I api khah chingnü atsokhibah.”

²Jumonü Davidnü api lung mihtsürü 600 bebah Gathrü Maok tsührü Akish kilim yü.

³David lung api bonungrü, mihbüm abande yamkhünbo, David niube mahne Jezreelrü Ahinoam tüsho Nabal niube Karmelrü Abigail de Gath ching Akish lung la.

⁴Küyimki David Gath lim tsoabahdo de Saul ki thakhea, apinü küyimkishe David müyimdebah.

⁵Judüki Davidnü Akish ki tha, “I nü miki mihmuzho lade ngüsho, I lapü thsüde alomi yo kiuto khülang ching lapung jihang; tümü thsüde nü yamlarü kiulongthsürü kiuto ching nü lung lapü?”

⁶Jumonü ju nimung Akishnü api kilim Ziklag jih; jumonü khihni khiungde Ziklag ju Juda kiulongthsürübo yo ah.

⁷Filistiarü lomi ching David kam chi khülang kheak khinu phüyi lakheah.

⁸Kheakü David tüsho api mihtsürübo wutubah Geshurrü, Girzrü tüsho Amalekrü bede keochihpü thsakham; tümüde harübo ha Telam chingnü Shur tüsho Ijip lomi limro lo ching larübo ah.

⁹Davidnü athrürü tüsho aliberü sheshe maningshihde laksahkham, tüshe namfimihnu, moshipung, donki, kemel tüsho khimmihbo lubah Akish kilim alode arü.

¹⁰Judüki Akishnü keokhi, “ Khihni nü she azhihde thirithsükhea?” Davidnü alo, “ Judarü Negeb azhihde,” yungsho “ Jerameelrü Negeb azhihde,” yungsho, “ Kenrü Negeb azhihde.”

¹¹Davidnü Gath lim thiyusheak hanlode arüpü thsüde athrürü yungsho aliberü sheshe maningshih, tümüde apinü hade lüm, “ Arünü isa dünkheak thabah tüsho Davidnü ha ruk rhimodo.” Filistia lomi ching lachoki amuyung api rhimo ha ruk lakheah.

¹²Akishnü hade lümde David kheak akin la, “ Apinü azangrü nihbuh mihtsürü Israelnü thraneanabahshihdo; jumonü api kamruhroro I yamlarü thsübah.”