Read Yimchungru Naga 1 Sam 28 Bible Online

1 Sam 28 - Yimchungru Naga bible

1 Sam 28

¹Judüki nimungbo ching Israel bede keochihpü Filistiarü bonungrü mukhungde alakheah. Akishnü David ki tha, “Nü tüsho nü mihtsürübo I yo bonungrü lung bebah de nünü mükheahlah.”

²Davidnü Akish ki tha, “ Khide tsülah, nü yamlarünü tümü thsükhukbanü nünü amükheahbah.” Akishnü David ki tha, “ Khide tsülah, rhangdung amuyung thsungkheak nü I aheangrü kamshihbah.”

³Kheakü Samuel sheabah, tüsho Israel alalanü api thsungkheak tüzho tüsho anihbuh kiuto Rama ching kiuyukabah. Saulnü mesherü tüsho kuhi-kheahrübo lomi chingnü yankhitabah.

⁴Filistiarübo mukhungde arübah Shunem ching binkheam. Saulnü Israel alala bemukhungbah Gilboa ching binkheam.

⁵Küyimki Saulnü Filistia bonungrü ngükhea, api treabah, tüsho api mulong khide ajan.

⁶Küyimki Saulnü ATUNGPUH ki keokhea, ATUNGPUHNÜ api ki milim yungsho Urim yungsho wukihrübo hode malojih.

⁷Judüki Saulnü api yamlarübo ki tha, “I thsungkheaknü aliberü mesherü khülang yimkhitjang, junangde inü alibe ki yübah keokhianü.” Api yamlarübonü tha, “Endor ching mesherü khülang lah.”

⁸Jumonü Saulnü aphü müthriabahbah khimmih püpü yuk tüsho api lung mihtsürü mahne bebah ju ching yü. Arünü azhing ching alibe kilim arü. Tüsho apinü tha, “I thsungkheaknü me ki keoang, tüsho inü nü ki thakhi mung I thsungkheaknü bebah atung.”

⁹Alibenü api ki tha, “Saulnü künangde mesherübo tüsho kuhi-kheahrü lomi chingnü yankhita bahde arhimokheanü nünü mükheahlah. Dale tümü thsükhi nünü I ashepü thsüde I rhangdung thsungkheaknü qimürip thsücho?”

¹⁰Tüshe Saulnü alibe ki ATUNGPUH mung chingnü thiyuchihchim, “ Ha dünkheaknü nü kheak thsümütsü tümü marü de ATUNGPUH mung tamde thiyuchihchimchoh.”

¹¹Jushu alibenü tha, “Inü shepü nü ki bede atuba?” Apinü alo, “I thsungkheaknü Samuel bede atung.”

¹²Küyimki alibenü Samuel ngükhea, anihbenü düsheak achangnü zhikhit; tüsho alibenü Saul ki tha, “ Tümü thsükhi nünü I rükakikhea; nü Saul ah!”

¹³Kiulongthsüpuhnü alibe ki tha, “Dütre; nünü tümü ngücho?” Alibenü Saul ki tha, “ Alo chingnü atukhi me inü ngüchoh.”

¹⁴Apinü alibe ki tha, “ Api phü tümü a?” Alibenü tha, “ Ashinbuhrü mihtsürü khülang atuchoh; api shulünkhimnü hingdoa lah.” Jumonü Saulnü ju Samuel ah de mükheah, tüsho amiro alo lim kheahbah khukning, tüsho akin jih.

¹⁵Judüki Samuelnü Saul ki tha, “ Tümü thsükhi nünü I küpkhuk jihde bede atukhea?” Saulnü alo, “I lümthsünü ato ching lah, tümüde Filistiarünü I bede keochihchoh, tüsho Thrünpuhnü I kheaknü tsoabahbah wukihrü yungsho milim müchitrü hodü she I ki malojih; jumonü inü tümü rhimobeanü ju thashihpü nü jikheah.”

¹⁶Samuelnü tha, “Dale tümü thsükhi nünü I ki keokhicho, tümüde ATUNGPUH nü kheaknü tsoabahdo tüsho nü riri kamdo?

¹⁷ATUNGPUHNÜ I ki thakhi yande apinü nü ki rhimodo; tümüde ATUNGPUHNÜ kiulongthsü nü khah chingnü rukthünaka bahdo, tüsho nü yamhingrü David kilim jihdo.

¹⁸Tümütüsho nünü ATUNGPUH yu mani, tüsho api bukakhiukkhi Amalek azhihde mürhimo, jumonü ATUNGPUHNÜ khihni ha nü ki rhimokheah.

¹⁹Kheaküshe ATUNGPUHNÜ Israel nü lung Filistiarü khah ching jihbah; tüsho shido nü le nü tsührübo I lung labah; kheaküshe ATUNGPUHNÜ Israel bonungrü Filistiarü khah ching jihbah.”

²⁰Zukleangnü Saul ju Samuel yubo sobah trede alo ching lunga chungthülangdo yap; tüsho api kheak sühmüh mülade alakheah, tümüde apinü nimung amuyung tüsho tsüngre amuyung tümü mütsüh.

²¹Alibenü Saul ki arü, tüsho küyimki alibenü api trekhi ngükhea, alibenü api ki tha, “ Kheahang, nü yamlaberünü nü ki anido; I rhangdung I khah ching shuhbah nünü tümü thakheanü anido.

²²Jumonü kheakü, nünü she nü yamlaberü ki aniang; inü nü miki yikhap khürü zojihanü. Tsühang, junangde nü limro ching yüchoki sühmüh labah.”

²³Apinü thsunglo tüsho tha, “Inü mütsüh.” Tüshe alibe lung api yamlarübo thsürubah api ki reangkih; tüsho apinü arü yu ani. Jumonü apinü alo kheaknü asürü tüsho yapkiu kheak bin.

²⁴Kheakü alibe yam ching ashih kihkhi moshi nunu khülang lakheah. Alibenü ju nahde laksah, tüsho ayikangkang lubah neam tüsho phaüm muyukkhi yikhap nung.

²⁵Alibenü jurü Saul le api yamlarü miki zojih, tüsho arünü tsüh. Jushu arünü asürü tüsho ju re tsoabah.