Read Yimchungru Naga 1 Sam 29 Bible Online

1 Sam 29 - Yimchungru Naga bible

1 Sam 29

¹Kheakü Israelrü Jezreel ching lakhi kenü ki binkheamchoki, Filistiarü a arü thirithsürübo Aphek ching mukhung.

²Filistia kiulongthsürübo chi tüsho chithürübo bebah tsahhochoki, David tüsho api mihtsürübo a nükde Akish lung tsah.

³Filistia limthorübonü tha, “ Harü Ibrirü ha ching tümü thsücho?” Akishnü ulo, “ Ha Israel kiulongthsüpuh Saul yamlarü I lung kheakü nimung tüsho kam ahihdo lakhi David yung de? Apinü I kilim arüyamnü khihni khiungde api kheak amülim tümü inü müngü.”

⁴Tüshe tha, “ Mihtsürü thiyiloa yüshang, junangde nünü api jihkhi dangpung ching api alode ayübah; api isa lung keochihpung makishih, jude yungsho keochihpung ching api isa azhihrü kampü labah. Keochihpung ching isa kheak azhihshihpü dün a api putungrü kheak chingkihpü limro atsü khürü la shi?

⁵Ha David yung de, shepü ki arü khülangnü khülang ki tsünde khün thsükhea, ‘Saulnü chithürübo laksah, tüsho Davidnü chithürü thürübo laksah?’”

⁶Judüki Akishnü David ji tüsho api ki tha, “Nünü I kheak thiyuro lado de ATUNGPUH mung tamde thiyuchihchimchoh, tüsho inü alungki lümkhia, nü I lung thirithsü ching labeah; tümüde nü I kilim arükhi nimungnü khihni khiungde inü nü kheak tümü amülim müngü. Judüalalashe püpü kiulongthsürübonü a nü ju mükheyuk.

⁷Jumonü kheakü rholoang; tüsho mungtsü chingnü yüang; Filistia kiulongthsürübo masühbe tümü düthsü.”

⁸Davidnü Akish ki tha, “Inü tümü thsüa la? Tüsho inü I tungpuh kiulongthsüpuh riri bede keochihpü müyüpü thsüde, I nü tankihpü azahkhi nü yamlarü kheak tümü kheahkhita la?”

⁹Akishnü alo, “Nü Thrünpuh yunirü nangde I mük ki amülim müla de inü mükheahlah; judüalalashe, Filistia limthorübonü tha, ‘ Api isa lung keochihpung ching muwutu.’

¹⁰Dale kheakü nü tüsho nü lung arükhi nü tungpuh yamlarübo yapsu mükihde asürang, tüsho inü nü ki akhukhi dangpung ching yüang. Amütsü yusheakbo mulong ching dühan, tümüde nünü I miki tsüde rhimodo. Yapsu mükikde ayinkhi akede tsoang.”

¹¹Jumonü Davidnü Filistia lomi lim alode arüpü thsüde api mihtsürü bebah yapsu mükikde tsahmusu. Tüshe Filistiarü a Jezreel lim wutu.