Read Yimchungru Naga 1 Sam 30 Bible Online

1 Sam 30 - Yimchungru Naga bible

1 Sam 30

¹Kheakü küyimki David tüsho amihtsürübo nimung asampü ching Ziklag ching arükhea, Amalekrünü Negeb tüsho Ziklag bede keochihpü thsakhama lakheah. Arünü Ziklag yande takabah,

²tüsho aliberü le ju ching lakhi alala, anini tüsho ato rama lubah tso; arünü sheshe mülaksah tüshe bea lubah arü limro ching yü.

³Küyimki David tüsho amihtsürübo kiuto ching arükhea, arünü ju takabahkhi, tüsho arü niuberü le tsührübo rama lubah atsokhi ngü.

⁴Judüki David tüsho api lung lakhi mihtsürübonü arü sühmüh mükheamabahyi khiungde düsheak zhide trip.

⁵David niube mahne, Jezreelrü Ahinoam tüsho Karmelrü Nabal niube Abigail she rama lubah tso.

⁶David a khide atrebe ching lakheah; tümüde mihtsürübonü api lungnü arupü tha, tümütüsho arü tsührübo thsungkheaknü mihtsürübo mulong thsümünimde alakheah. Tüshe Davidnü ATUNGPUH api Thrünpuh kheak azangrü reangzahlo.

⁷Davidnü Ahimelek tsührü amükeambuh Abiathar ki tha, “I kilim amükeamrü khim lubah arang.” Jumonü Abiatharnü amükeamrü khim David kilim lubah arü.

⁸Davidnü ATUNGPUH ki keokhi, “Inü thiriribo ha müshamanü de? Inü arü tholoba shi?” Apinü anihbuh ki tha, “Yande müshamang; tümüde tsükjide nünü atholobah tüsho aramrübo khümkhitbah.”

⁹Jumonü Davidnü api lung mihtsürü 600 bebah tsahmusu. Arünü Besor ayung ching arü tüsho ashurübo ju ching bin.

¹⁰Tüshe Davidnü api lung mihtsürü 400 bebah müshamde yü; khide keakabahkhinü Besor ayung muhokhukde 200 dunglim tukloabah.

¹¹Arünü thulu ching Ijiprü ngü, tüsho api David kilim bede arü. Arünü api kilim yikhap jih tüsho apinü tsüh, arünü api kilim ayungpü ke jih;

¹²kheaküshe arünü api kilim khubaso yikhap khülang tüsho amukuhkhi kurungaso düchi mahne jih. Küyimki apinü atsühkhea, api sühmüh düküngde kam; tümüde api nimung mahsam tüsho tsüngre mahsam yikhap mütsüh yungsho ke muyungde alakheah.

¹³Judüki Davidnü api ki tha, “Nü putungrü she a? Nü küchingnü a le?” Apinü tha, “I Amalek azhorü, Ijip athrününgtsüng khülang ah. I putungrünü I binloshih tümütüsho ha nimung mahsam müngüh I tukthsüde alakheah.

¹⁴Isanü Kereth ching Negeb tüsho Judarü lo le Kaleb guk lomi kheak keochihdo; tüsho isanü Ziklag takkheamabahdo.”

¹⁵Davidnü api ki tha, “Nünü ha thiriribo lung bede yükinahnü?” Apinü tha, “Nünü I mülaksah, yungsho I putungrü khah ching muyukjih de Thrünpuh tamde thiyuchihchimang, tüsho inü arü kilim nü bede ayükibah.”

¹⁶Küyimki apinü anihbuh bede yükikhea, tsühyungde tüsho tsünde, alo ching hiumüzüta lakheah, tümütüsho arünü Filistiarü tüsho Juda lomibo chingnü hihde yankhia lu.

¹⁷Davidnü arübo shuhyini chingnü ashidopü arelim khiungde yande keochih, athrününgtsüng 400 kemelbo kheak yükihbah atsorü kheak hode arü sheshe mutsokhi.

¹⁸Amalekrünü alukhi alala Davidnü lulokham; tüsho Davidnü aniube mahne she yankhia lu.

¹⁹Anini yungsho ato, tsührü athrürü, aliberü, yankhia lukhi yungsho tümükhüh lukhi tümü she müdükheakshih; Davidnü lüpdükhi hanlode arü.

²⁰Davidnü api mihnu le moshi botobo she yankhiloa lu; amihtsürübonü akam-shiwühbo alala arü müngüh kitde tsah tüsho tha, “ Ha Davidnü ayankhikhi ah!”

²¹Judüki Davidnü api müyankhukde Besor ayung ching bahbah atsokhi arü mihtsürü 200 kilim arü. Arünü David tüsho api lung tsahkhi mihtsürübo shorupü wukhiuk. Küyimki Davidnü mihtsürübo phünide ayükheanü apinü arü ki salüm jih.

²²Judüki athsümünim tüsho amüthülünkhi mihtsürü David lung yürübonü tha, “ Tümütüsho arübo isa lung marü, isanü arü kilim isanü ayankhikhi tümü she müjih, tahle mihtsürü abannü nihbuh niuberü tüsho tsührübo lang lubah ayüpü kuklah.”

²³Tüshe Davidnü tha, “I keoniorübo, ATUNGPUHNÜ isa kilim jihkhi ching nüsanü jude müthsü; thiriribonü isa kheak yankhia lukhi apinü küma zojih tüsho isa kilim jihkheah.

²⁴Hadürü ching shenü nüsa ki anipü? Tümüde qimürip ju keochih ching yükirü le hah ki binrü thsungkheak rukhüh lang ah; arü ki rukhühnü achambah.”

²⁵Ju nimungnü apinü Israel thsungkheak yakzan tüsho thiyuzüng thsü; ha khihni khiungde lah.

²⁶Küyimki David Ziklag ching arükhea, apinü ayankhikhi shihcham amüyamrübo, Juda azothsürübo kilim mühahde tha, “ Ha A TUN GPU H riribo kheaknü ayankhikhi nüsa thsungkheak thsambah khülang ah”;

²⁷ju Bethel ching, Negeb ching lakhi Ramoth ching, Jattir ching larü,

²⁸Aroer ching, Siphmoth ching, Eshtemoa ching,

²⁹Rakal ching, Jerameel kiutobo ching, Kenrü kiutobo ching,

³⁰Horma ching, Borashan ching, Attak ching,

³¹Hebron ching, David tüsho api mihtsürübo rümkhi dangpungbo alala ching lakheah.