Read Yimchungru Naga 1 Sam 31 Bible Online

1 Sam 31 - Yimchungru Naga bible

1 Sam 31

¹Kheakü Filistiarünü Israel bede keochih; tüsho Israelrübo Filistiarü müngüh tso, tüsho ahihdo Gilboa wung ching keamabah.

²Filistiarünü Saul tüsho atsührübo tholo; tüsho Filistiarünü Saul tsührübo, Jonathan, Abinadab tüsho Malkishua laksah.

³Saul kheak müküpde thirithsü akih, tüsho api ju arünü khitode yurijih.

⁴Judüki Saulnü api thsühnuk hanrü ki tha, “Nü nukshang dukkhitang tüsho I düchipang, junangde harü tsütamübahrünü arübah ninnin thsüde müdüchip.” Tüshe api thsühnuk hanbuhnü mümulongde alakheah; tümüde api treabah. Jumonü Saulnü anihbuh nukshang dukkhitbah ju kheak keam.

⁵Küyimki api thsühnuk hanbuhnü Saul shea ngükhea, api she anihbuh nukshang kheak keambah api lung sheabah.

⁶Jumonü Saul tüsho atsührü mahsam le api thsühnuk hanbuh tüsho amihtsürübo alala nimung rukhüh ching sheabah.

⁷Küyimki Jordan hobah ke thripkhüh larü Israelrünü Saul tüsho atsührübo shekhi ngükhea, arübonü nihbuh kiuto bahbah tso; tüsho Filistiarünü arübah ju müküh-a lu.

⁸Ashidopü, küyimki Filistiarünü ashemi lupü arükhea, arünü Saul tüsho atsührü mahsam Gilboa wung kheak yapa ngü.

⁹Arünü aku lipkhi, api thsühnuk yihkhia lu, tüsho Filistiarü lomi ching thiyusheak atsü hanbah arü sangthsübo tüsho mihtsürübo kilim yüshihpü yunithsürübo thiyi.

¹⁰Arünü api thsühnuk Astar arüngyam ching yuka zo; tüsho arünü apang ju Beth-shan rhü kheak rhükkih-a zo.

¹¹Tüshe küyimki Filistiarünü Saul kheak rhimokhi Jabesh-gilead ching larünü asokhea,

¹²athrungrü alala tsahmusubah tsüngreroro tsah, tüsho Saul pang le atsührübo pang Beth-shan rhü kheaknü lu. Arünü Jabesh ching arübah ju ching takabah.

¹³Jushu arünü arü robo lu tüsho Jabesh ching lakhi tamarisk sang khüp kiuyukabah, tüsho nimung thüne khümkeak thsü.