Read Yimchungru Naga 1 Sam 7 Bible Online

1 Sam 7 - Yimchungru Naga bible

1 Sam 7

¹Kiriath-jearim mihtsürübo arübah ATUNGPUH sangdan shuh-a lu, tüsho ju awung kheak Abinadab yam ching hande arü. Arünü ATUNGPUH sangdan kheahshihpü thsüde api tsührü Eleazar müsühkhit.

²Jumonü sangdan ju Kiriathjearim ching kim ashang zo; ju ching kam muku zokheah. Tüsho Israel yamkhünbo alalanü ATUNGPUH ki arung kheangde tüzho.

³Judüki Samuelnü Israel yamkhün alala ki tha, “Nüsa mulong athrünkhinü nüsa ATUNGPUH kilim rholochosho, dale khiungkerü thrünpuhbo tüsho Astar sangthsübo dükheabahang. Nüsa mulong A TUN GPU H kilim anguhang, tüsho api lang tankihang, tüsho nüsa Filistiarü khah chingnü abekhitbah.”

⁴Jumonü Israelnü Baalbo le Astarbo dükheabah, tüsho arünü ATUNGPUH lang tankih.

⁵Judüki Samuelnü tha, “Israel alala Mizpa ching bemukhungang, tüsho inü nüsa thsungkheak ATUNGPUH ki tamkhüntamnüjihbah.”

⁶Jumonü arünü Mizpa ching bemukhung, tüsho ke khipbah ATUNGPUH miki buka bah. Arünü ju nimung khümkeak thsü, tüsho tha, “Isanü ATUNGPUH azhihde neak yihbeakdo.” Tüsho Samuelnü Mizpa ching Israel mihtsürü mahkhap.

⁷Küyimki Filistiarünü Israel mihtsürü Mizpa ching mukhunga lah de asokhea, Filistia kiulongthsürübonü Israel azhihde wutu. Tüsho küyimki Israel mihtsürübonü ju sokhea arünü Filistiarü tre.

⁸Israel mihtsürübonü Samuel ki tha, “Isa thsungkheaknü ATUNGPUH isa Thrünpuh ki zhipü dütuklo, tüsho apinü isa Filistiarü khah chingnü akhümkhitshihpü tamkhüntamnüjang.”

⁹Jumonü Samuelnü namfimihnunu lubah ATUNGPUH kilim abümnü taka kingaün; Samuelnü Israel thsungkheak ATUNGPUH ki zhi, tüsho ATUNGPUHNÜ api ki alojih.

¹⁰Samuelnü taka kingaünkhi jihchoki, Filistiarü ju Israel yanpü thüninde arüa lakheah; tüshe ju nimung Filistiarü azhihde ATUNGPUHNÜ düsheak atonü tsüngmuk tüsho arübo yingyingde kamshih; tüsho Israel müngüh tso.

¹¹Tüsho Israel mihtsürübo Mizpa chingnü wukhiukbah Filistiarü yande müsham, tüsho arübo Beth-kar khiungde laksahde yü.

¹²Judüki Samuelnü lung khülang lubah Mizpa tüsho Shen dükeak khim, tüsho ju Ebenezer de ji; tümüde apinü tha, “ Ha khiungde ATUNGPUHNÜ isa rungdo.”

¹³Jumonü Filistiarü junoabah tüsho Israel lo ching müyüzahlo; Samuel kim amuyung ATUNGPUH khah Filistiarü azhihde alakheah.

¹⁴Filistiarünü Israel kiutobo lukhi Ekronnü Gath khiungde arü kilim jihlokham; tüsho Israelnü arü lo Filistiarü khah chingnü lulo. Judüki Israel tüsho Amorrü dükeak she mungtsü lakheah.

¹⁵Samuelnü api rhangdung amuyung Israel mahkhap.

¹⁶Apinü kam atukde Bethel, Gilgal, tüsho Mizpa ching mühide yü; tüsho apinü harü dangpung alala ching Israel mahkhap.

¹⁷Tüsho apinü Rama lim alode arü, tümüde ju ching api yam lakheah; apinü ju ching she Israel kheak mahkhap, tüsho ATUNGPUH kilim kingaün sadam thsü.