Read Yimchungru Naga 1 Sam 9 Bible Online

1 Sam 9 - Yimchungru Naga bible

1 Sam 9

¹Judüki mihtsürü alarü khülang Benjaminrü amung Kish lakheah; api Zeror tsührü Abiel tsührü, Bekorath yamkhün, Aphia guk chingnü alakheah.

²Api tsührü khülang amung Saul, trungdung atsü athrününgtsüng lakheah. Judüki Israel mihtsürü bolung api kheaknü trungdung atsü mülakheah; alala kheaknü api atoshangbe lakheah.

³Kheakü Saul abuh Kish yo donkibo rümde tsoabah. Jumonü Kishnü atsührü Saul ki tha, “Nü lung azürü khülang beang; yüang tüsho donkibo kheahang.”

⁴Anenü Ephraim awung lomi ho tüsho Shalishad lomi hode yü, tüshe anenü müngü. Tüsho ane Shaalim lomi hode yü, tüshe ju ching mülade alakheah. Jushu ane Benjamin lomi hode yü, tüshe anenü müngü.

⁵Küyimki ane Zuph lomi ching arükhea, Saulnü api lung tsahkhi azübuh ki tha, “Ike alode yüanü, jude yungsho I buhnü donkibo thsungkheak mulong sansan tuklobah tüsho ike thsungkheak mulong sansanbah.”

⁶Tüshe azübuhnü Saul ki tha, “ Ha kiuto ching Thrünpuh mihtsürü khülang lah; api kheak wüntre kihde lachoh. Apinü tümüpürü thabanü kamruhroro dünjichoh. Kheakü ike ju ching yüanü; khükijua ike yüpü limro apinü ahuhbah.”

⁷Tüsho Saulnü azübuh ki alo, “ Tüshe ike yüsho, api kilim tümü lubah ayüpü? Tümüde ike qiuqiu ching yikhap bando, tüsho Thrünpuh mihtsürü kilim lubah ayüpü thsambah müla. Ike tümü la le?”

⁸Azübuhnü kheaküshe Saul ki alo, “I khah ching hiki 1 lah; inü ju ike limro thashihpü thsüde Thrünpuh mihtsürü kilim jihbah.”

⁹( Adüso Israel ching, khürünü Thrünpuh dünkheak keokhikeorapü yüsho hade tha, “ Arang, isanü angürü kilim yüanü”; tümüde shepü kheakü wukihrü de jichonü adüso a angürü de ji.)

¹⁰Saulnü azübuh ki tha, “ Tsülah; arang, ike yüanü.” Jumonü anenü kiuto ching ju Thrünpuh mihtsürü lapung yü.

¹¹Ane kiuto lim awung ching wutuchoki, anenü aliberü khürü ke khip akhiukrü ngü, tüsho arü ki tha, “ Angürü ha ching la de?”

¹²Arünü alo, “ Am, ju ching api nüsa müngüh lah. Niokheamang; api kheakü lang kiuto ching arüdo, tümütüsho khihni mihtsürübo kingaün sadam kheak laksah-a kingaünpü lah.

¹³Nüke kiuto ching yüzah akede, kingaün sadam lim yimtsüh muwutuyide api ngübah. Tümüde api marüchokia mihtsürübonü mütsüh, tümütüsho apinü laksah-a kingaünkhi ju müngühjihbeah; ju dunglim sherübo jiyuka lanü arübonü atsühbah. Kheakü wutuang, tümüde nükenü api nahde ashorubah.”

¹⁴Jumonü anenü kiuto limpeang wutu. Ane kiuto ching yüzahde alachoki, anenü kingaün sadam wutu limro ching ane müngüh Samuel atude ngü.

¹⁵Kheakü Saul arüpü müngüh nimung ching, ATUNGPUHNÜ Samuel ki thajung:

¹⁶“Shido ha kim ching inü Benjamin lomi ching yo mihtsürü khülang nü kilim arüshihbah, tüsho nünü api Israel mihtsürü kurungkheak yakzan shuhshihpü mujudemokhitbah. Apinü I mihtsürübo Filistiarü khah chingnü akhümkhitbah; tümüde inü I mihtsürü thsünükhi ngüdo, tümütüsho arünü azhikhi I kilim arüdo.”

¹⁷Küyimki Samuelnü Saul ngükhea, ATUNGPUHNÜ api ki tha, “ Ha ching inü nü ki thakhi mihtsürü lah. Apinü I mihtsürü kurungkheak yakzan shuhbah.”

¹⁸Jushu Saulnü chipimurung khüp Samuel shoru, tüsho tha, “ Muzhobah I ki thaang, angürü yam kükheak la?”

¹⁹Samuelnü Saul ki alo, “I angürü ah; I müngüh kingaün sadam lim wutuang; tümüde khihni nü I lung yimtsühbah, tüsho yapsu inü nü tsoshihbah tüsho nü lüm ching lakhi alala inü nü ki thabah.

²⁰Tüshe nü donkibo dükheakbah nimung mahsam thsükhi dünkheak mulong düsansan, tümüde arübo ngülodo. Tüshe shepü kheak Israelnü mulongkhitkhi yükihcho? Ha nü kheak tüsho nüsa jirüpürü yamkhün kheak ah yung de?”

²¹Saulnü alo, “I Israel trük akheamkhibe Benjamin chingnü lang ah, tüsho I yamkhün ju Benjamin trük bolung ching akheamkhibe ah. Dale tümüde nünü I ki ha ruk thacho?”

²²Judüki Samuelnü Saul le ayamlarü azübuh bebah thüyam lung lim yüzah, tüsho arü 30 bande jiyuka lakhi kumung dükhüm kheak binshih.

²³Tüsho Samuelnü dükihthürarü ki tha, “Inü nü ki büthsüde azopü jihkhi shihcham lubah arang.”

²⁴Dükihthürarünü dübankhüh shuha lubah yünü Saul miki zojih. Samuelnü tha, “ Kheahang, nü miki tümü zojih-a la. Tsühang; tümüde hanrü bolung tsühshihpü thsüde ha nü khilim büthsüde azojihkheah.” Jumonü Saulnü ju nimung Samuel lung yimtsüh.

²⁵Küyimki arü kingaün sadam kheaknü kiuto lim akikhea, Saul khilim thüyam kumung ching yapkiu khima zojih-a lakheah, tüsho api ju kheak yap.

²⁶Tüsho ayinkhichoki Samuelnü thüyam kumung lim Saul ki ji, “ Asürang, junangde inü nü limro ching yüshihbah.” Saulnü asürü, tüsho api le Samuel ane chido wungdo ching wukhiuk.

²⁷Ane kiuto akheam lim khiungde ayüchoki, Samuelnü Saul ki tha, “ Azübuh ki ike müngüh yüpü thaang, tüsho küyimki api yüabahbanü, nü ha kheak sühkhüh aleangang, junangde inü Thrünpuh yu nü ki mükheahshihbah.”