Read Yucateco Génesis 11 Bible Online

Génesis 11 - Yucateco bible

Génesis 11

¹Ti' le kiino'obo' tuláacal yóokolcaabe' cu t'anic ca'ach chéen jun p'éelili' t'aan.

²Le ca j jóoko'ob te j lakin lu'umo', tu nuptáantajo'ob jun p'éel táax cúuchil tu lu'umil Sinar, ti' j p'áato'ob cajtal te'elo'

³Jun p'éel kiine' tu ya'alajo'ob tu baatzilo'ob: Co'ox beetic ladrillo'ob[10] c dzu'uyquintico'ob yéetel káak. Bey túuno' meyajnaj ti'ob bey tuunichil le ladrillo'ob, yéetel asfalto[11] bey bokoltbil luuke.

⁴Cu dzo'ocole' tu ya'alajo'ob: Nadzaba'ex, co'ox beetic jun p'éel noj caaj yéetel jun p'éel x witzil naj, ca kuchuc tac ca'an. Bey túuno' yaan u yantal ba'ax o'olal c ka'ajsa'al, u ti'al xan ma' u yantal ba'ax o'olal ki'itpajal yóok lu'um.

⁵Ba'ale' Yuumtzile' j éem u yil le noj caaj bey le x witzil naj cu beetico'ob ca'ach le wíinico'obo',

⁶ca tu tucultaj: Leti'obe' chéen jun p'éelili' caaj, chéen xan jun p'éelili' u t'aano'ob; let o'olal dzo'oc u chunico'ob le meyaja', bejela'a' túune' ti'olal mix ba'al bíin beetic u p'atico'ob.

⁷Utz yanil wa ca éemeco'on u ti'al ca c xa'akbes u t'aano'ob, u ti'al ma' u na'aticuba'ob.

⁸Bey túun úuchic u ki'itbesa'alo'ob tu yóokol lu'um tumen Yuumtzil, ca tu p'atajo'ob u beetico'ob le noj caajo'.

⁹Te j cúuchilo' Yuumtzile' tu xa'akbesaj u t'aano'ob tuláacal u cajnáalilo'ob lu'um, ti' líikbal u ki'itpajlo'ob ti' tuláacal yóokolcaab. Let o'olal tu kaaba'intaj Babel[12] le noj caajo'.

¹⁰Lelo'oba' u ch'i'ilancab Sem. Ca'a p'éel ja'ab máanac ti' le búulcabalilo', cien ja'abo'ob yaan ca'ach ti' Sem ca j síij Arfaxad u paal.

¹¹Cu dzo'ocole' Seme' cuxlaj u láak quinientos ja'abo'ob, yanchaj u j xibil paalal bey u x ch'upul paalal.

¹²Arfaxade' yaan treinta yéetel cinco ja'abo'ob ti' ca j síij Sela u paal.

¹³Cu dzo'ocole' Arfaxad cuxlaj u láak cuatro cientos tres ja'abo'ob, yanchaj u j xibil paalal bey u x ch'upul paalal.

¹⁴Salae' yaan ca'ach treinta ja'abo'ob ti' ca j síij Heber u paal.

¹⁵Cu dzo'ocole' Salae' cuxlaj u láak cuatro cientos tres ja'abo'ob, yanchaj u j xibil paalal bey u x ch'upul paalal.

¹⁶Hebere' yaan ca'ach treinta yéetel cuatro ja'abo'ob ti' ca j síij Peleg[13] u paal.

¹⁷Cu dzo'ocole' Hebere' cuxlaj u láak cuatro cientos ja'abo'ob, yanchaj u j xibil paalal bey u x ch'upul paalal.

¹⁸Pelegue' yaan ca'ach treinta u ja'abo'ob ca j síij Reu u paal.

¹⁹Cu dzo'ocole' Pelegue' j cuxlaj u láak docientos nueve ja'abo'ob, yanchaj u j xibil paalal bey u x ch'upul paalal.

²⁰Reue' yaan ca'ach treinta yéetel dos ja'abo'ob ti' ca j síij Serug u paal.

²¹Cu dzo'ocole' Reue' j cuxlaj u láak docientos siete ja'abo'ob, yanchaj u j xibil paalal bey u x ch'upul paalal.

²²Serugue' yaan treinta ja'abo'ob ca'ach ti' Ca j síij Nacor u paal.

²³Cu dzo'ocole' Serugue' cuxlaj dos cientos ja'abo'ob, yanchaj u j xiibil paalal bey u x ch'upul paalal.

²⁴Nacore' yaan ca'ach veinte yéetel nueve ja'abo'ob ti' ca j síij Taré u paal.

²⁵Cu dzo'ocole' Nacore' cuxlaj u láak ciento nueve ja'abo'ob, yanchaj u j xibil paalal bey u x ch'upul paalal.

²⁶Taré yaan ca'ach setenta ja'abo'ob ti' ca j síijo'ob u paalal: Abram, Nacor yéetel Haran.

²⁷Lelo'oba' u ch'i'ilancab Taré, u taataob Abram, Nacor yéetel Harán. Harane' u taata Lot.

²⁸Harane' j quíim tu caajil Ur tu lu'umil Caldea ma'ili' quíimic Taré u taatae'. J quíim te j caaj tu'ux síijo'.

²⁹Abrame' j dzo'oc u beel x yéetel Sarai. Nacore' j dzo'oc u beel x yéetel Milca u x ch'upul paal Haran, u quiic x Isca.

³⁰Sarai ma' tu páajtal ca'ach yantal u paalal tumen x ma' aalantzil ca'achi.

³¹Taré jóok tu caajil Ur, tu lu'umil j caldeoilo'ob u ti'al u binbal tu lu'umil Canaán, tu bisaj tu paache' Abram u paal, Lot u yáabil x yéetel Sarai u yilib, ba'ale' le ca j kucho'ob tu noj caajil j Harane' j p'áato'ob cajtal te'elo'.

³²Taré yaan ca'ach dos cientos cinco ja'abo'ob ti' ca j quíim tu noj caajil Harán.