Read Yucateco Génesis 12 Bible Online

Génesis 12 - Yucateco bible

Génesis 12

¹Jun p'éel u kiinile' Yuumtzile' tu ya'alaj ti' Abram: P'at a lu'umil, a láaktzilo'ob bey u yotoch a taata u ti'al ca xi'iquech te j lu'um quin in we'es techo'.

²Bin in ca'aj in beet yéetel a ch'i'ibalo'obe' jun p'éel nojoch caaj, yaan in qui' t'antiquech, yaan in nojochquintiquech, beyo' bíin suunaquech qui' t'aanil ti' u láak máaco'ob.

³Yaan in qui' t'antic le máaxo'ob bíin qui' t'antiquecho'obe', ba'ale' yaan in loolob t'antic le bíin loolob t'antiquecho'obe'; ta wéetel bíin in qui' t'ant tuláacal u yotochnáalilo'ob yóokolcaab.

⁴Abrame' jóok tu lu'umil Haran je'el bix a'ala'abic ti' tumen Yuumtzile'. Setenta yéetel cinco ja'abo'ob yaan ti' ca j jóok te'elo' u ti'al u binbal tu lu'umil Canaán.

⁵Tu bisaj tu yéetel, Sarai u yatan bey xan Lot u paal u yíidzin, tuláacal le ba'alo'ob u ti'ale' je'el bix xan le máaco'ob kuch u ti'alint tu lu'umil Haran. Le ca j kucho'ob tu lu'umil Canaane',

⁶Abrame' tu ch'actaj tuláacal le lu'umo' tac ca j kuch Siquem, tu'ux yaan u quili'ich béequil More. Le j cananitaobo' ti' túun caja'ano'ob ca'ach te j lu'umo'.

⁷Te'elo' ti' j chíicpaj Yuumtzil ti' Abram, ca j a'ala'ab ti': Le lu'uma' ti' a ch'i'ilancab bíin dzáa. Abram túune' tu beetaj jun p'éel u multuunil kultaj ti' u tzicbe'enil Yuumtzil tumen te j chíicpaj ti'o'.

⁸Cu dzo'ocole' ca j bin te j ca'anal lu'um yaan tu lakin u nojoch caajil Betel, te tu beetaj u cúuchil u cajtalil, Betele' ti' j p'áat tu j chikin le tu'ux j p'áat cajtal ca'acho', Hai j p'áat tu lakin. Te j cúuchila' Abrame' tu beetaj jun p'éel u multuunil kultaj ca j payalchi'inaj ti' Yuumtzil.

⁹Cu dzo'ocole' tu ca ch'a'aj u beel, j bin jujun p'íitil tu lu'umil Néguev.

¹⁰Ti' le kiino'obo' j p'áat jach mina'an ba'ax jaantbil ti' tuláacal le cúuchilo'obo', Abrame' yanchaj u bin j cáajal dze'edze'ec kiin Egipto, tumen mina'anchaj ba'ax jaantbil te tu'ux caja'an ca'acho'.

¹¹Le ca tu yilaj Abram ta'itac u kuchulo'ob Egiptoe' tu ya'alaj ti' Sarai u yatan: U'uye, tene' jach in wojel, teche' jun túulech x qui'ichpam ch'uup,

¹²tu yo'olal le lelo' le quéen ila'aquech tumen le egipciobo' yaan u ya'alico'ob: Le co'olela' u yatan le máaco', bíin u quíimseno'ob teech túune' bíin u cha'ob a cuxtal u ti'al ca p'áataco'ob ta wéetel.

¹³Le beetique' u ti'al ca xi'ic teen utzile', u ti'al xan ma' u quíimsiqueno'ob ta wo'olale', beet utz a wa'alic ti'ob teche' in wíidzinech.

¹⁴Le ca j kuch Abram Egiptoe', le j egipciobo' tu yilajo'ob jach qui'ichpam Sarai.

¹⁵Tac u yéet nuuquil faraón u ajawil Egipto, le ca tu yilajo'obe', j bino'ob u ya'alo'ob ti' jach qui'ichpam le co'olelo'. Bey túuno' tu bisajo'ob tu noj naj faraón.

¹⁶Tu yo'olal Sarai, faraone' tu sen beetaj utz ti' Abram. Tu síaj ti' j tamano'ob, wacaxo'ob, j palitzilo'ob, x palitzilo'ob, burro'ob yéetel camello'ob.

¹⁷Ba'ale' tu yo'olal Sarai xane', Yuumtzile' tu beetaj loob ti' faraón yéetel yaayaj koja'anilo'ob bey ti' u láaktzilo'ob.

¹⁸Tu yo'olal lelo' tu túuchi'itaj t'antbil Abram, ca tu ya'alaj ti': ¿Ba'ax teen ta tusajen, ba'axten ma' ta wa'alaj teen wa a watan le x co'olela'?

¹⁹Teche' ta wa'alaj a wíidzin; óolac in ch'a'a' in watante, je'el leti'a' ¡Ch'a'e', xeen!

²⁰Faraone' tu ya'alaj ti' u j meyajo'ob ca jóokesa'ac Abram yéetel u yatan pa'ate' yéetel tuláacal ba'ax u ti'al.